2020 წლის ნოემბრის თვიდან „ახალგაზრდა პედაგოგთა კავშირის“ გუნდმა „საქართველოს სტრატეგიული კვლევებისა და განვითარების ცენტრის“ ლიდერობითა და „საქართველოს სამოქალაქო განვითარების ასოციაციასთან“ თანამშრომლობით, დაიწყო ახალი პროექტის „უნარების განვითარება და დასაქმების ინოვაციური შესაძლებლობები საქართველოს რეგიონული განვითარებისთვის“ განხორციელება, რომლის მიზანია ადგილობრივი ადამიანური კაპიტალის განვითარება და შენარჩუნება, გურიის, კახეთისა და ქვემო ქართლის რეგიონში სოციალური და ეკონომიკური გაძლიერებისთვის. პროექტის ფინანსური მხარდამჭერია ევროკავშირი საქართველოსთვის და გერმანული ფონდი „პური მსოფლიოს“.
ახალგაზრდა პედაგოგთა კავშირი გურიის, ქვემო ქართლისა და კახეთის რეგიონებში უხელმძღვანელებს პროექტის მნიშვნელოვან ქვემიზანს, რომელიც გულისხმობს მეწარმეობისა და კარიერული განვითარების კლუბების შექმნას საჯარო სკოლებში, რის მეშვეობითაც რეგიონებში მცხოვრები ბავშვები განავითარებენ კარიერული მართვისა და მეწარმეობის უნარს. პროექტის პირველ ეტაპზე შეირჩა სამივე რეგიონის წარმომადგენელი 17 პარტნიორი სკოლა. მომდევნო ეტაპზე კიდევ 11 სკოლას ექნება პროექტში ჩართვის შესაძლებლობა.
მეწარმეობისა და კარიერული განვითარების კლუბების მუშაობა დაეფუძნოს ახალგაზრდა პედაგოგთა კავშირის მიერ მომზადებულ სასწავლო სილაბუსს. სილაბუსი მოიცავს 4 მოდულს, რომლებშიც ყურადღება გამახვილებულია შესაძლებლობების აღმოჩენებზე, სამეწარმეო კომპეტენციასა და კარიერულ განვითარებაზე.
9 და 10 ივნისს „ახალგაზრდა პედაგოგთა კავშირის“ წარმომადგენლების ფასილიტაციით ჩატარდა ორდღიანი ტრენინგი გურიის რეგიონის პარტნიორი სკოლების წარმომადგენელი ფასილიტატორებისთვის, რომლებიც უხელმძღვანელებენ მეწარმეობისა და კარიერული განვითარების კლუბებს. ტრენინგის მიზანს სასწავლო სილაბუსის პირველი მოდულის გაცნობა და მონაწილეების ფასილიტაციის უნარ-ჩვევების გაძლიერება წარმოადგენდა.
რატომ მეწარმეობა და კარიერული განვითარება?
თანამედროვე მსოფლიოში მცირე დაბნეულობას იწვევს, ის, რომ არ არსებობს მეწარმეობის ზუსტი და საყოველთაოდ გაზიარებული განმარტება. სხვადასხვა ქვეყნის საგანმანათლებლო სისტემა ეყრდნობა მეწარმეობის განსხვავებულ გაგებასა და სწავლების პრაქტიკას (enterprise education and entrepreneurship education, entrepreneurial learning, internal entrepreneurship education and external entrepreneurship education…), ერთი ნაწილი ფოკუსირებულია პიროვნულ განვითარებაზე, ხოლო მეორე ბიზნესზე. სილაბუსის მომზადების პროცესში, ძირითადად, დავეყრდნობით ეროვნული სასწავლო გეგმის (2018-2024) განმარტებას, ასევე ევროსაბჭოსა და ევროპარლამენტის რეკომენდაციებს. 2000 წელს ამ უკანასკნელის რეკომენდაციით განისაზღვრა რვა საბაზისო უნარ-ჩვევა, რომლებსაც უნდა ფლობდეს მოქალაქე, მათ შორისაა- მეწარმეობა. აღნიშნული დოკუმენტის თანახმად, მეწარმეობის კომპეტენციის მატარებელი ადამიანი ხასიათდება შესაძლებლობების ამოცნობის, იდეების განვითარებისა და განხორციელების, რესურსების ეფექტიანი მართვის უნარით. ასევე, იგია ინიციატორი და დამოუკიდებელი პირად და სოციალურ ცხოვრებაში. გამოირჩევა მაღალი მოტივაციით, ფლობს ამოცანის გადაჭრისა და გადაწყვეტილების მიღების უნარს.
ზოგადი განათლების საფეხურზე, ეროვნული სასწავლო გეგმის (2018-2024) თანახმად, მეწარმეობა არის ინდივიდის უნარი იდეები აქციოს საქმედ და მოიცავს როგორც შემოქმედებითი მიდგომის, ინოვაციისა და რისკის, ასევე დასახული მიზნის მისაღწევად დაგეგმვისა და პროექტების მართვის უნარს. ვფიქრობთ, ამგვარი სტრატეგიის არჩევით მეტად შევძლებთ მოზარდებში პიროვნული განვითარების ხელშეწყობასა და თვითდასაქმებისთვის საჭირო უნარ-ჩვევების ამაღლებას.
გარდა ამისა „მეწარმეობას გადამწყვეტი მნიშვნელობა აქვს სასკოლო თემის ცხოვრებაში მოსწავლეთა აქტიური ჩართვისთვის. მეწარმეობის საფუძვლების გათავისება მოსწავლისთვის ფართო ასპარეზია ინოვაციური იდეების დაგეგმვის, განვითარებისა და განხორციელებისთვის. იგი სასიცოცხლოდ მნიშვნელოვანი უნარია, რომლის მქონე თითოეული ინდივიდი ავტომატურად ხდება საკუთარი ქვეყნის ეკონომიკის განვითარების ხელშემწყობი, რაც მისი მოქალაქეობრივი მოვალეობებისა და პასუხისმგებლობების ზრდასაც განაპირობებს. ამის გათვალისწინებით, სკოლის კულტურა სასკოლო საზოგადოების წევრებს უნდა აძლევდეს საკუთარი ინიციატივების რეალიზებისა და თავისუფალი არჩევანის შესაძლებლობას“ (ეროვნული სასწავლო გეგმა 2018-2024).
უმნიშვნელოვანესი საკითხია მოზარდების თვალსაწიერის გაფართოება პროფორიენტაციის მიმართულებით. ხშირ შემთხვევაში მოზარდები გაუაზრებლად ირჩევენ მომავალ პროფესიას, გარდა ამისა წლების განმავლობაში ყალიბდებოდა სტერეოტიპული მიდგომები პრესტიჟული და ნაკლებად პრესტიჟული პროფესიების შესახებ. ჩამოთვლილ ფაქტორებს კონკრეტული, საჭირო პროფესიების დეფიციტთან მივყავართ. ცნობიერების ამაღლება ამ მიმართულებით, საკუთარი ინტერესებისა და შესაძლებლობების შეფასება უმნიშვნელოვანესია. ვფიქრობთ, პროექტის საშუალებით შევძლებთ მნიშვნელოვანი პოზიტიური ცვლილების გამოწვევას. მადლობა ევროკავშირსა და გერმანულ ფონდს „პური მსოფლიოსთვის“ ფინანსური მხარდაჭერისთვისა და ასეთი შესაძლებლობისთვის.
პროექტი სამი წლის განმავლობაში გაგრძელდება.
(R)
