,,ჩვენ სკოლაში მივდივართ” _ ამ სლოგანით დღეს სამტრედიის მუნიციპალიტეტის ქალაქის მეოთხე ბაგა-ბაღში გამოსაშვები საღამო გაიმართა.
ხუთიდან ექვს წლამდე ასაკობრივი ოთხი ჯგუფი წარსდგა მშობლების, მოწვეული სტუმრების წინაშე.
მიუხედავად იმისა, რომ პანდემიის პირობებში ბავშვებს ონლაინ უწევდათ სასწავლო-სააღმზრდელო პროცესის გავლა, მცირე მონაკვეთში მათ მაინც შეძლეს, შეეკრიბათ მთელი წლის ნამუშევარი და ისე თავმომწონედ წარმდგარიყვნენ მაყურებლის წინაშე.
მოწვეულ სტუმართა შორის იყვნენ სკოლამდელი აღზრდის დაწესებულებათა გაერთიანების დირექტორი, ხათუნა გაგუა და მოადგილე, მარინა შენგელია და ადმინისტრაციის სხვა წარმომადგენლები.
საზეიმო საღამოზე წარმოდგენილი იყო თემატური პროექტი_ ,,ითამაშე და განვითარდი”. ჯგუფებმა წარმოადგინეს თემების შემაჯამებელი აქტივობები: ,,ჩემი სამშობლო საქართველოა”, ,,მცენარეები”, ,, მწერები”, ,,ჩემი უბანი”. სივრცეები მოწყობილი იყო თემებთან შესაბამისი მრავალფეროვანი რესურსით, სადაც ბავშვები იკვლევენ, ექსპერიმენტებს ატარებენ ღია კითხვების საშუალებით.
„დღევანდელი დღე სანახაობრივად იყო ძალიან ლამაზი, სასიამოვნო და ნიმუში იმისა, რომ მეოთხე ბაღის თითოეული თანამშრომელი, თავისი. უძლიერესი, დაუშრეტელი ენერგიის მქონე მმართველის, ნანა დუნდუას ხელმძღვანელობით ყოველთვის მოწოდების სიმაღლეზე დგანან და ასე ლამაზად არაერთი ნიჭიერი თაობა გაუცილებიათ სკოლისკენ. დღეს ბოლო დღე იყო სასწავლო სააღმზრდელო პროცესი დასრულდა სამტრედიის მუნიციპალიტეტის 24-ვე საბავშვო ბაღში. ყველგან ჩატარდა გამოსაშვები ღონისძიებები, 350 აღსაზრდელს დავულოცეთ გზა სკოლისაკენ. ვულოცავ ყველა მათგანს ცხოვრების ახალ ეტაპზე გადასვლას და დიდი სიყვარულით ველოდებით აღსაზრდელების ახალ ნაკადს“, თქვა ,, გურია ნიუსთან” საუბრისას სამტრედიის მუნიციპალიტეტის სკოლამდელი აღზრდის დაწესებულებათა გაერთიანების დირექტორმა, ხათუნა გაგუამ.
ავტორი: ნინო ნანიტაშვილი
