FACTCHEK COVID-19-ზე გავრცელებული დეზინფორმაციების შესახებ დაიჯესტს აქვეყნებს.
დაიჯესტში წარმოდგენილია სოციალურ ქსელში ფართოდ გავრცელებული, ბოლო სამი კვირის (29.06.2021-20.07.2021) ყველაზე აქტუალური დეზინფორმაციული ნარატივი კორონავირუსთან და კოვიდვაქცინებთან დაკავშირებით. ამასთან, ქვემოთ მოცემული მტკიცებების უმრავლესობა განმეორებითად და კამპანიურად ვრცელდება. დაიჯესტში ასევე მიმოხილულია დეზინფორმაციის გამავრცელებელი ძირითადი წყაროები და გავრცელების მასშტაბურობა.
დეზინფორმაცია კოვიდვაქცინებზე
დეზინფორმაცია: სინოფარმის ინექციიდან რამდენიმე საათში თბილისის სატრანსპორტო კომპანიის თანამშრომელი გარდაიცვალა
სოციალურ ქსელში ვაქცინაციის შემდეგ ადამიანის გარდაცვალებასთან დაკავშირებით დეზინფორმაციის შემცველი პოსტი გავრცელდა. პოსტში, რომელსაც ამ დროისთვის 243 გაზიარება ჰქონდა, ნათქვამია, რომ სინოფარმის მეორე დოზის ინექციიდან რამდენიმე საათში თბილისის სატრანსპორტო კომპანიის თანამშრომელი გიორგი (გოგა) ალაშვილი გარდაიცვალა.
დეზინფორმაცია: ვაქცინის გამოცდის კლინიკური ფაზები, არც ჩინურ ვაქცინას აქვს გავლილი
სოციალურ ქსელში გავრცელდა ყალბი ინფორმაცია, რომ ჩინურ ვაქცინებს (სინოფარმი და სინოვაკი), ასევე სხვა კოვიდვაქცინებს, ვაქცინის გამოცდის კლინიკური ფაზები არ გაუვლია.
დეზინფორმაცია: ვაქცინები „უძლიერეს ნეიროტოქსინს” „სპაიკ ცილას” შეიცავს, რომელიც ადამიანის ორგანიზმის ყველა ორგანოში აღწევს
ანტივაქსერმა ჰომეოპათმა თინა თოფურიამ სოციალურ ქსელში ი-რნმ ვაქცინებთან დაკავშირებით მორიგი ყალბი ამბავი გაავრცელა. იგი ამტკიცებს, რომ რნმ ტექნოლოგიის შემქმნელის თანახმად, ვაქცინები „უძლიერეს ნეიროტოქსინს” სპაიკ ცილას შეიცავს, რომელიც ყველგან აღწევს. თინა თოფურიას თქმით, რნმ ტექნოლოგიის გამომგონებელი მოითხოვს, რომ სასწრაფოდ შეაჩერონ ვაქცინაცია, სანამ არ დაღუპულა და არ დაზიანებულა კიდევ უამრავი ადამიანი. თოფურიას პოსტს თან დეზინფორმაციის გამავრცელებელი ვებგვერდის Mercola.com-ის სტატია ერთვის.
გამოცემა „საქართველო და მსოფლიო” Pfizer-ისა და Moderna-ს ვაქცინების შესახებ მანიპულაციას ავრცელებს
2021 წლის 14 ივლისს პრორუსულმა გამოცემამ „საქართველო და მსოფლიო” გამოაქვეყნა სტატია, სათაურით – „ევროკავშირის რეგულატორის განცხადებით, Phaizer-ი და Moderna სახიფათოა გულისთვის”. სტატია რუსულ გამოცემა Iz.ru-ზე გამოქვეყნებული მასალის მიხედვითაა მომზადებული, სადაც ნათქვამია, რომ BioNTech/Pfizer-ისა და Moderna-ს ვაქცინებს მიოკარდიტი და პერიკარდიტი შეუძლია გამოიწვიოს. საქართველო და მსოფლიოს მიერ გავრცელებული მასალის მიხედვით, BioNTech/Pfizer-ით აცრის შემდეგ მიოკარდიტის 145 და პერიკარდიტის 138 შემთხვევაა აღრიცხული, ხოლო Moderna-თი ვაქცინაციის შემდეგ ამავე დაავადებების 19-19 შემთხვევა დაფიქსირდა. მართალია, სტატიაში მოყვანილი რიცხვები მიოკარდიტისა და პერიკარდიტის შემთხვევების შესახებ სიმართლეს შეესაბამება, თუმცა აღნიშნული ინფორმაცია სტატიასა და მის სათაურში მანიპულაციურადაა მოცემული. კერძოდ, არც სტატიასა და არც სათაურში არაა აღნიშნული, რომ ევროპის წამლის სააგენტომ (EMA) კორონავირუსის საწინააღმდეგო ი-რნმ ვაქცინებსა და გულის დაავადებების ძალიან იშვიათ შემთხვევებს შორის შესაძლო კავშირი დაადგინა. გარდა ამისა, სტატიაში არაა მოცემული ინფორმაცია, თუ რა რაოდენობის Pfizer და Moderna ვაქცინა გაკეთდა საერთო ჯამში, რაც მკითხველს არ აძლევს სრულყოფილ სურათს იმის შესახებ, თუ გულის დაავადებები ვაქცინირებულ ადამიანების რა წილზე მოდის.
დეზინფორმაცია: ჯანმომ აღიარა, რომ COVID-19-ის ვაქცინები დაუტესტავია
Facebook-მომხმარებელმა სოციალურ ქსელში ვიდეომიმართვა გაავრცელა. ვიდეოში COVID-19-ის ვაქცინებთან დაკავშირებით ცრუ ინფორმაციის შემცველი მტკიცებები გაჟღერდა, თითქოს ვაქცინა დაუტესტავია და ადამიანები ექსპერიმენტის მონაწილეები არიან. როგორც ვიდეოს ავტორი ამტკიცებს, თვითონ აღიარა ჯანდაცვის მსოფლიო ორგანიზაციამ, რომ ერთ წელში ვაქცინის შექმნა შეუძლებელია. ეს ვაქცინები საექსპერიმენტოა და ადამიანები ამ ექსპერიმენტის მონაწილეები ვართ. ვიდეომიმართვას 3 ათასზე მეტი ნახვა და 430-მდე გამოხმაურება აქვს.
დეზინფორმაცია: ვაქცინირებული მკლავი 1 ლარიანის მონეტას იკრავს
Facebook-მომხმარებელმა სოციალურ ქსელში გამოაქვეყნა ვიდეო, წარწერით – „აი ამაზე გამეცით ვინმემ კითხვაზე პასუხი რატო იკრავს რა ადგილასაც აცრა გვაქვს გაკეთებული მონეტას”. გამოქვეყნებულ ვიდეოში ჩანს, თუ როგორ ეკვრის ქალს მკლავზე 1 ლარიანის მონეტა, ამ მიზიდულობის მიზეზად კი აღნიშნულ მკლავზე ვაქცინის გაკეთებაა დასახელებული. პოსტის ავტორი კომენტარებში აღნიშნავს, რომ ქალი, რომელიც ვიდეოში ჩანს დედამისია და მან Pfizer-ის ვაქცინა გაიკეთა. გარდა ამისა, ის წერს, რომ ყველას, ვინც მის ირგვლივ ვაქცინა გაიკეთა, აცრის ადგილას მონეტა ეკვრის. Facebook-მომხმარებლის მიერ გავრცელებულ ვიდეოში არ არის მოცემული რაიმე მტკიცებულება, რომელიც დაადასტურებს, რომ ვიდეოში გამოსახულმა ქალმა ვაქცინა ნამდვილად გაიკეთა და მისი მკლავი მონეტას ბუნებრივად იკრავს. აღნიშნული დეზინფორმაცია სხვადასხვა კოვიდ-დეზინფორმაციულ ჯგუფში გაზიარდა.
ანტივაქსერული გადაცემები
ტელეკომპანია „ობიექტივში” ანტივაქსერული და დეზინფორმაციული გზავნილები ვრცელდება
სოციალურ ქსელში ტელეკომპანია „ობიექტივის” ეთერში გასული გადაცემის – „განათლების რეფორმების კვალდაკვალ” ჩანაწერი გავრცელდა. მანანა ნიკოლაიშვილის საავტორო გადაცემაში სტუმრად გიორგი ლილუაშვილი იყო მიწვეული, რომლიც გადაცემაში სამხედრო ექიმისა და იურისტის სტატუსით იყო წარდგენილი. მან გადაცემაში მორიგი ანტივაქსერული და დეზინფორმაციული მტკიცებები გააჟღერა. მაგალითად, აუცრელი ადამიანი არანაირ პრობლემას არ წარმოადგენს საზოგადოებისთვის; აცრილები დაინფიცირებულები არიან და ავრცელებენ ვირუსს; ვაქცინა მოძველებულია, იმიტომ, რომ მუტაცია განიცადა ვირუსმა და შესაბამისად, ეს ვაქცინა არ მოქმედებს უკვე მუტირებულ ვირუსზე. თავად გადაცემის წამყვანმა პანდემიასა და ვაქცინაციის პროცესს მსოფლიო მასშტაბით მიმდინარე „მაფიოზურ-კლანური პროცესები” უწოდა. როგორც გადაცემის წამყვანის, ისე სტუმრის მხრიდან გაჟღერებული ანტივაქსერული, დეზინფორმაციული მოწოდებები ვაქცინაციის პროცესის მიზანმიმართულ დისკრედიტაციას და საზოგადოებაში ვაქცინებისადმი უნდობლობის გაჩენას ემსახურება.
COVID-19-ის პანდემიასთან დაკავშირებული დეზინფორმაციები „ქართული TV”-ის ეთერში
სოციალურ ქსელში „ქართული TV” გადაცემის „სტუმრად მაკა ბრეგაძესთან” ჩანაწერი გავრცელდა, გადაცემის სტუმრები იყვნენ ანტივაქსერები ნონო აღდგომელაშვილი და გიორგი ლილუაშვილი. დეზინფორმაციული შინაარსის გადაცემაში შემდეგი მანიპულაციური და ყალბი გზავნილები გაჟღერდა: 1) „პირბადეს ძალიან ბევრი ნეგატიური გავლენა აქვს, მაგრამ მთავარი ეს არის თავის ტვინის, მთელი ცენტრალური ნერვიული სისტემის და ორგანიზმის ჰიპოქსიას იწვევს”. 2) „ამერიკაში ჩატარებული გამოძიების თანახმად, PCR ტესტები თავიდანვე დაინფიცირებული აღმოჩნდა, ანუ სპეციალურად ვრცელდებოდა მთელ მსოფლიოში… ესპანეთმა, ინგლისმა, ჩეხეთმა და რამდენიმე ქვეყანამ ჩინეთიდან მიღებული ტესტები უკან დააბრუნეს და განაცხადეს, რომ ეს ტესტები არ იყო სტერილური… ეს დაინფიცირებული ტესტი აჩვენებდა, რომ ადამიანს ჰქონდა ვირუსი და ამ ტესტებით დგინდებოდა დაავადება”. 3)”სტატისტიკურად საქართველოში 2020 წელს 5 ათასი კაცით ნაკლები არის გარდაცვლილი”.
4) „როდესაც ვირუსი მუტაციას განიცდის, აზრი ეკარგება იმ ვაქცინის გაკეთებას. აგერ ისრაელის მაგალითი, ვაქცინაცია ჩატარდა, 2-ჯერ ჩატარდა, და დღეს იფეთქა ისევ, ეპიდემიაა და უფრო მწვავე მდგომარეობაში არიან”.
დეზინფორმაცია კორონავირუსის სადიაგნოსტიკო ტესტებზე
დეზინფორმაცია: ტესტის ჩხირების სტერილიზაციისთვის გამოყენებულ ეთილენის ოქსიდს ადამიანის ჯანმრთელობის დაზიანება შეუძლია
ანტიგენის სწრაფი ტესტების შესახებ დეზინფორმაციული მტკიცებები ვრცელდება. დეზინფორმატორთა თანახმად, ჩხირები, რომლებსაც ტესტებში იყენებენ, ეთილენის ოქსიდშია სტერილიზირებული, რაც საზიანოა ადამიანის ჯანმრთელობისთვის. მისი შეყნოსვა აზიანებს ადამიანის დნმ–ს, იწვევს ლიმფომას, ლეიკემიას, კატარაქტს, ნევროლოგიური ფუნქციის მოშლას, სასუნთქი გზების დაბლოკვას, კუჭნაწლავის დაზიანებას და ა.შ – აღნიშნულია Facebook-პოსტში. დეზინფორმაციის გამავრცელებელი წყაროები არიან ანტივაქსერული, დეზინფორმაციული გვერდები – „ბოლო ჟამის ქრისტიანები” და „ბიბლიის მორწმუნე ქრისტიანები”. აღნიშნული ორი გვერდის გარდა, დეზინფორმაცია ჩხირებზე არსებული ეთილენის ოქსიდის შესახებ განსხვავებული სახით სხვა გვერდებმაც გაავრცელეს. გვერდი „სულიერი სამყაროს” მიერ გავრცელებულ 2-წუთიან ვიდეოში, რომელსაც დღემდე 216 გაზიარება აქვს ჟღერდება მტკიცება, თითქოს ჩხირებზე დატანილი ეთილენის ოქსიდი სიმსივნესა და სხვა დაავადებებს იწვევს. აღნიშნულ დეზნფორმაციას სოციალურ ქსელში საკმაოდ მაღალი გამოხმაურება მოჰყვა.
