ერთი წელი გავიდა მას შემდეგ, როდესაც აფხაზეთში დააკავეს ირაკლი ბებუა. ოჯახის წევრები ჩვენთან საუბრის დროს აცხადებენ, რომ ამ ეტაპზე ირაკლის ჯანმრთელობის პრობლემები აქვს.
ხვალ თბილისში დაგეგმილია მორიგი აქცია.
“მოვითხოვთ მთავრობისგან ოჯახთან პირდაპირი კომუნიკაციის დამყარებას და ჩვენი თანამოქალაქის გასათავისუფლებელად კონკრეტული ნაბიჯების გადადგმას!“ – აღნიშნულია ხვალინდელი აქციის ანონსში.
“დემოკრატიის კვლევის ინსტუტუტის“ იურისტი ანა გახოკიძე “გურია ნიუსთან“ საუბრის დროს ამბობს, რომ ირაკლი ბებუა გალში, აფხაზეთის დროშის დაზიანებისთვის დააკავეს, ადგილობრივი კანონმდებლობა აღნიშნული ქმედებისთვის პატიმრობის ერთ წელს ითვალისწინებს, მაგრამ ის დღესაც ციხეში არის.
“ბებუას ბრალი ხელოვნურად დაუმძიმეს, დააბრალეს თითქოს სახლში ჰქონდა ხელყუმბარა და ავტომატური ცეცხლსასროლი იარაღი. ირაკლი ბებუა იყო სტიქაროსანი, გალის რაიონში ყველა იცნობს და ხასიათდება როგორც დადებითი, პატრიოტი ადამიანი. მას მიესაჯა უკანონო პატიმრობის ცხრა წელი.
საჯაროდ გავრცელებულ ვიდეოში, სადაც ირაკლი ბებუა, სავარაუდოდ, დაკითხვაზე იმყოფება, თავად ადასტურებს დროშის დაწვის ფაქტს და განმარტავს, რომ აფხაზების საწინააღმდეგო არაფერი აქვს, პირიქით, მიიჩნევს, რომ არ უნდა აღინიშნებოდეს ეთნიკური ქართველების აფხაზების დაყოფის თარიღი და კვლავ მეგობრული ურთიერთობების მომხრეა.“- თქვა ჩვენთან საუბრის დროს ანა გახოკიძემ.
ანა გახოკიძე ასევე ჩვენთან საუბრის დროს აღნიშნავს, ირაკლი ბებუას საქმეში აქტიურად ლობირებენ ადგილობრივი რადიკალური ჯგუფები.
“ირაკლი ბებუას პატიმრობას და დამატებით სასტიკად დასჯას დღემდე, აქტიურად, ლობირებენ ადგილობრივი რადიკალური ჯგუფები. დემოკრატიის კვლევის ინსტიტუტის ინფორმაციით 2021 წლის 7 ივნისს მიტინგი ჩატარდა გალის კულტურის სახლში – სადაც ითქვა, რომ – „ბებუა დასახვრეტი იყო საჯაროდ მოედანზე“. ყოფილი დე-ფაქტო შსს მინისტრი ასლან კობახია სიტყვით გამოვიდა და განაცხადა: – „მე ადგილზე დავხრეტდი, გალელებმა ლინჩის წესით უნდა გაასამართლოთ…“.- გვითხრა ანა გახოკიძემ.
“დემოკრატიის კვლევის ინსტიტუტი“, მოუწოდებს საქართველოს ხელისუფლებას და საერთაშორისო საზოგადოებას, დაუყონებლივ გააძლიეროს პოლიტიკური და სამართლებრივი მექანიზმების გამოყენება ირაკლი ბებუას საკითხის თაობაზე და უზრუნველყოფილი იყოს მისი უკანონო პატიმრობიდან გათავისუფლება.
ირაკლი ბებუას ბიძაშვილის თამუნა ბებუას თქმით, ირაკლის ჯანმრთელობის მხრივ აქვს სერიოზული პრობლემები.
“ყველანაირად ვცდილობთ, რომ ყველას გავაგებინოთ ჩვენი ოჯახის საკითხი. ბოლო დროს ვითხოვთ საქართველოს პრემიერ-მინისტრთან ირაკლი ღარიბაშვილთან შეხვედრას. თუმცა, მან დღემდე ჩვენთვის გრაფიკი, ვერ გამოანთავისუფლა. ჩვენი მთავარი მოთხოვნა ღარიბაშვილთან შეხვედრაა იმისთვის რომ გაგვცენ პასუხები რა კეთდება ირაკლის გათავისუფლებისთვის.
ირაკლისთან არ გვაქვს კავშირი, ბოლო ინფორმაციით ჯანმრთელობის მდგომარეობა უკიდურესად მძიმეა.
ირაკლი ბოლო 3-4 წლის წინ გადავიდა საცხოვრებლად აფხაზეთში. მანამდე ფეხბურთს თამაშობდა რაღაც პერიოდი. ჯანმრთელობის მდგომარეობის გამო მოუწია თავი დაენებებინა. ბებიას სანახავად წავიდა და იქ დარჩა. ერთი წლის წინ დააკავეს აფხეთის დროშის დაწვის გამო.“ – გვითხრა თამუნა ბებუამ.
[sexy_author_bio]
