რამდენიმე დღის წინ საქართველოს ეროვნული გუნდისა და ესპანური “ლენოვო ტენერიფეს” ქართველმა ცენტრალურმა თავდამსხმელმა გიორგი შერმადინმა წელის ტრავმა მიიღო. მოგვიანებით გაირკვა, რომ 3 ადგილას სერიოზული დაზიანება აქვს და სხვადასხვა სახის თერაპიული კურსი სჭირდება. ექიმების ვერდიქტით, ქართველს ექვსი კვირის განმავლობაში იძულებითი უქმობა და ინტენსიური მკურნალობა მოუწევს.
გუშინ “ტენერიფეს” სოციალურ ქსელში შერმადინს მხარდაჭერა ასობით ქომაგმა გამოუცხადა და მალე გამოჯანმრთელება უსურვა, მათ შორის, ქართულ ენაზეც: “გაიხარე გიო, ჩვენ გვჭირდები”, _ დაწერა ერთ-ერთმა ესპანელმა გულშემატკივარმა.
საქართველოს ნაკრების ყოფილი კალათბურთელი მანუჩარ მარკოიშვილი კი ფრანგულ “მონაკოში” მწვრთნელის ასისტენტად იმუშავებს. 34 წლის მარკოიშვილი ბოლოს საქართველოს სუპერლიგაში მუშაობდა და კლუბი “ტიტების” მთავარი მწვრთნელი გახლდათ.
“მონაკოში” წელს მაიკ ჯეიმსი გადავიდა, რომელიც მოსკოვის “ცსკა”-ს ლიდერი იყო. მის გარდა, ამ გუნდში უილ ტომასიც თამაშობს, რომელსაც საქართველოს მოქალაქეობა აქვს, თუმცა ეროვნულ ნაკრებში არ უთამაშია. მარკოიშვილი ახალ სეზონს “მონაკოსთან” ერთად ევროლიგაში დაიწყებს.
გუშინ დაბადების დღე ჰქონდა საქართველოს ნაკრებისა და ესპანური “ვალენსიას” კარის დარაჯ გიორგი მამარდაშვილს, რომელიც 21 წლის გახდა.
ესპანელებს მამარდაშვილის იუბილე არ გამოჰპარვიათ და სოციალურ ქსელებში ახალგაზრდა მეკარეს დაბადების დღე მიულოცეს.
“დაბადების დღეს გილოცავთ გიორგი” – წერია “ვალენსიას” მიერ “ტვიტერის” საკუთარ გვერდზე გამოქვეყნებულ პოსტში.
იგივე წარწერა გვხვდება “ინსტაგრამზე”, ხოლო “ფეისბუქზე” გამოქვეყნებულ პოსტში ვკითხულობთ: “დღეს ვიღაც სანთლებს ჩააქრობს. დაბადების დღეს გილოცავთ, გიორგი!”
ორი დღის წინ ევროპის ჩემპიონთა ლიგაზე მოასპარეზე ტირასპოლის “შერიფმა” ნამდვილი სენსაცია გამოაცხო და მადრიდის “სანტიაგო ბერნაბეუს” სტადიონზე თვით “რეალი” დაამარცხა _ 2:1. გადამწყვეტი გოლი სებასტიან ტილის ანგარიშზე გახლდათ, რომელმაც ტიბო კურტუას კარი ულამაზესი დარტყმით აიღო და პირველი ლუქსემბურგელი ფეხბურთელი გახდა, რომელმაც ჩემპიონთა ლიგაზე თავი გამოიჩინა.
ტილის საფეხბურთო კარიერა ლუქსემბურგში დაიწყო და 2020 წელს, რუსულ კლუბს, “ტამბოვს” მიაშურა, სადაც ურთულესი პერიოდის გადატანა მოუწია. სებასტიანს პრობლემები ჰქონდა და რამდენიმე თვე ხელფასის გარეშე იყო, რის შემდეგაც “შერიფს” შეუერთდა, გუშინ კი ისტორია დაწერა და “რეალს” გაუტანა.
მადა ჭამაში მოდისო და “შერიფის” კაპიტანმა ფრენკ კასტანედამ ისტორიული გამარჯვების შემდეგ კომენტარი გააკეთა. როგორც მან განაცხადა, ახლა მიზნად ფლეი-ოფში გასვლა დაისახეს და ამისთვის ყველაფერს გააკეთებენ:
“აქ გამარჯვება ოცნების ახდენაა. ბედნიერი ვართ და ამ გრძნობით ვტკბებით. გვჯეროდა, რასაც ვაკეთებდით და ახლა ამის შედეგს ვხედავთ. აქ გამარჯვებისთვის ჩამოვედით, არა დასასვენებლად, რადგან ვიცით ჩვენი ღირსების დაცვა. საბედნიეროდ, “რეალმა” მომენტები ვერ გამოიყენა. ფლეი-ოფში გასვლაზე ვოცნებობთ და საკუთარ თავს ამ ამოცანას ვუსახავთ. ახლა მთელი ყურადღება “ინტერთან” მატჩზეა გადატანილი. ყველანაირად ვეცდებით, რომ კვლავ დადებით შედეგს მივაღწიოთ”.
არადა, ორი წლის წინ ჩემპიონთა ლიგის საკვალიფიკაციო ეტაპის პირველ წრეში, “საბურთალომ” სწორედ რომ “შერიფის” ბარიერი დაძლია. თბილისურმა კლუბმა პირველი შეხვედრა, რომელიც მოლდოვაში გაიმართა, 3:0 მოიგო, განმეორებითი მატჩი 1:3 წააგო და ორი შეხვედრის ჯამში, მომდევნო ეტაპის საგზური მოიპოვა.
“საბურთალო” “შერიფის” მადრიდულ გმირობას თავისებურად გამოეხმაურა. წაგებული შეხვედრის შემდეგ, “რეალმა” “ფეისბუქის” საკუთარ გვერდზე მატჩის ერთ-ერთი მომენტის ამსახველი ფოტო გამოაქვეყნა და ქომაგებს ანგარიშისა და გოლის ავტორების შესახებ ამცნო. “საბურთალოს” ოფიციალურმა გვერდმა კომენტარი სწორედ ამ პოსტზე დატოვა და ასე იხუმრა: “შეგვიძლია, გასწავლოთ “შერიფი” როგორ დაამარცხოთ”.
დღეს ევროპის კონფერენსლიგის მეორე ტურის მატჩები გაიმართება. ბელგიაში გიორგი ჩაკვეტაძის “გენტი” თემურ ქეცბაიას “ანორთოსისს” უმასპინძლებს. კვიპროსული გუნდის ღირსებას გიორგი ლორია, ნიკა კაჭარავა და ნიკა ნინუა იცავენ.
გუშინ ბელგიური მედია “გენტისა” და “ანორთოსისის” ყოფილ ფეხბურთელს, გიორგი ქვილითაიას დაუკავშირდა, რომელიც ამჟამად კვიპროსის “აპოელის” ღირსებას იცავს.
“ვაღიარებ, “გენტში” გატარებული პერიოდი არცთუ წარმატებული გამოვიდა, რისი მიზეზიც გარკვეულწილად ტრავმაც იყო. კლუბის გამოსვლას თვალყურს აღარ ვადევნებ, თუმცა ძალიან მახარებს ის, რომ ჩაკვეტაძე დაუბრუნდა მისთვის ნორმალურ დონეზე თამაშს და კარგ ფორმაშია. “გენტში” ყველაზე საშიში მოთამაშე ალბათ სწორედ ჩაკვეტაძეა და ხუთშაბათს ფამაგუსტას გუნდმა ყურადღება სწორედ მას უნდა მიაქციოს”, – განაცხადა საქართველოს ნაკრების 27 წლის თავდამსხმელმა.
გუშინ ჩემპიონთა ლიგის მეორე ტურის მორიგი შეხვედრები გაიმართა.
E ჯგუფი: “ბაიერნი” _ “დინამო” (კიევი) 5:0, “ბენფიკა” _ “ბარსელონა” 3:0;
F ჯგუფი: “ატალანტა” _ “იანგ ბოისი” 1:0, “მანჩესტერ იუნაიტედი” _ “ვილიარეალი” 2:1;
G ჯგუფი: “ზალცბურგი” _ “ლილი” 2:1, “ვოლფსბურგი” _ “სევილია” 1:1;
H ჯგუფი: “ზენიტი” _ “მალმიო” 4:0, “იუვენტუსი” _ “ჩელსი” 1:0.
[sexy_author_bio]
