2021 წლის სექტემბერში, დაბა ბახმაროში დასასვენებელი პარკის მშენებლობა ისე დაიწყო, რომ მოსახლეობამ ამის შესახებ სოციალურ ქსელიდან გაიგო. ამის შემდეგ მედიის წარმომადგენლები დაინტერესდნენ, რა პარკი შენდებოდა კურორტზე და რატომ მაინცდამაინც პარკი, როცა ბახმაროში სხვა, მრავალი პრობლემაა მოსაგვარებელი.
როგორც გავარკვიეთ, საქართველოს მუნიციპალური განვითარების ფონდის მიერ გამოცხადებულ ტენდერში გაიმარჯვა შპს “ქართლმა“ და დასასვენებელი პარკის მშენებლობაც დაიწყო. სოციალური ქსელის მომხმარებლები “ჩაბეტონებული“ პარკის მშენებლობით უკმაყოფილონი არიან.
“გურია ნიუსმა“ საქართველოს მუნიციპალური განვითარების ფონდს წერილობით მიმართა და შესაბამისი კითხვები დაუსვა:
_ როდის დაიწყო პარკის მშენებლობა დაბა ბახმაროში და როდის უნდა დასრულდეს?
_ რომელმა კომპანიამ მოიგო ტენდერი?
_ რა თანხაა გამოყოფილი პროექტის შესასრულებლად?
_ თუ მოხდა აღნიშნული პროექტის გაცნობა საზოგადოებისთვის და თუ მოხდა, კონკრეტულად სად ჩატარდა ეს შეხვედრა და ვინ ესწრებოდა? თუ არ მოხდა პროექტის გაცნობა საზოგადოებისთვის, არის თუ არა დაგეგმილი შეხვედრა, სადაც მოსახლეობასთან დეტალურად ისაუბრებთ, რა შენდება ბახმაროში?
_ როგორც ჩვენთვის გახდა ცნობილი, პროექტს არ იცნობენ ადგილობრივი ხელისუფლების წარმომადგენლების ერთი ნაწილი. მოხდა თუ არა მათთვის პროექტის გაცნობა?
სოციალურ ქსელში არაერთი გამოხმაურება მოყვა ამ პარკის მშენებლობას. კონკრეტულად საზოგადოების ერთი ნაწილი ამბობს, რომ “არა ჩაბეტონებულ ბახმაროს“…
გთავაზობთ მუნიციპალური განვითარების ფონდის პასუხებს ამ კითხვებზე
„ჩოხატაურის მუნიციპალიტეტის დაბა ბახმაროში დასასვენებელი პარკის რეაბილიტაცია მიმდინარეობს. დასასვენებელი პარკის მშენებლობის პროექტის გახორციელება დაიწყო 2020 წლის სექტემბერში და მისი დასრულება 2022 წლის ზაფხულშია დაგეგმილი.
პირველ ეტაპზე მომზადდა სკვერის პროექტი და მხოლოდ პროექტის დამტკიცების შემდეგ დაიწყო სამშენებლო სამუშაოები. როგორც საპროექტო დოკუმენტაციის, ისე სამშენებლო სამუშაოების ჩატარებაზე პასუხისმგებელი კომპანიის გამოსავლენად ჩატარდა ტენდერები.
სკვერის საპროექტო დოკუმენტაცია მოამზადა ტენდერში გამარჯვებულმა კომპანია შპს „როიალ არტ ჯგუფმა“. კომპანიამ შეისწავლა და მომამზადა სრულყოფილი საპროექტო დოკუმენტაცია, რომლის დაინტერესებულ მხარესთან შეთანხმების ვალდებულებაც შედიოდა კომპანიის ვალდებულებაში. რაც შეეხება სამშენებლო სამუშაოებს, მას ასრულებს ასევე ტენდერში გამარჯვებული კომპანია შპს „ქართლი“.
პროექტი საქართველოს მთავრობის დაფინანსებით ხორციელდება და მისი საერთო ღირებულება შეადგენს 1 293 997 ლარს (დღგ-ს ჩათვლით).
საპროექტო დოკუმენტაცია შეთანხმებულია ყველა დაინტერესებულ მხარესთან. საპროექტო-სახარჯთაღრიცხვო დოკუმენტაციის მომზადების პროცესში არაერთი შეხვედრა გაიმართა ადგილობრივი მუნიციპალიტეტის წარმომადგენლებთან. ასევე, საპროექტო დოკუმენტაცია შეთანხმებულია სივრცითი მოწყობის სამსახურთან და მთავრობის განკარგულებით, დამტკიცდა ტერიტორიის გენგეგმა. პროექტი შეთანხმებულია ადგილობრივ მუნიციპალიტეტთან და მასზე გაცემულია ნებართვა.
პროექტის ფარგლებში, ბახმაროს პარკში მოეწყობა ბილიკები, ამფითეატრი, საბავშვო და სპორტული ზონები, ფანჩატურები. ტერიტორიაზე დამონტაჟდება სკამები, წყლის სოკოები, ნაგვის ურნები, ლამპიონები.
პროექტი ითვალისწინებს პარკის ტერიტორიის დამატებით გამწვანებას. ტერიტორია დაიყოფა სხვადასხვა დანიშნულების ზონებად.
პარკი სრულად იქნება ადაპტირებული შეზღუდული შესაძლებლობების მქონე პირებისთვის“, _ აღნიშნულია ფონდის წერილში.
[sexy_author_bio]
