ოზურგეთში და მუნიციპალიტეტის სოფლებში, ხანგრძლივი წვიმების შემდეგ, როგორც კი ამინდი გამოვიდა, აზიური მავნებელი ფაროსანა, დიდი რაოდენობით გამოჩნდა.
_ ამას ნამდვილად არ ველოდით. გვიშველეთ, ფაროსანა გაათმაგებული იერიშით გვიტევს. როგორ შემოგვესია. შარშან ცოტა უკეთესობა იყო. სავსეა ყველაფერი. სამომავლოდ, ალბათ, ვერაფერს მოვიწევთ. ვყიდულობთ წამალს, შევასხურეთ. არაფერი არ ქნა. აბსოლუტურად უხარისხოა. დაგვეხმარეთ, გვიშველეთ. გაზეთიდან მაინც მიაწვდინეთ ხმა, _ მომართეს „გურია ნიუსს“ სოფელ ბოხვაურის მცხოვრებმა მანანა არობელიძემ და მისმა მეზობლებმა.
სოფელ ჭანიეთიდან, დვაბზუდან, წითელმთიდან გვატყობინებენ, რომ ძალიან ცუდი მდგომარეობაა _ მავნებლით ავსებულია ეზოები და სახლები.
„გურია ნიუსი“ ამ გაზაფხულზე აქტიურად აშუქებდა ფაროსანასთან ბრძოლის მიზნით, შეწამვლითი ღონისძიების დაწყებას, მაისის ბოლოს.
თუმცა, ამ წლის გაზაფხულზე ხანგრძლივი წვიმების გამო, რამაც მერე ზაფხულშიც გადაინაცვლა, შეწამვლა არ მომხდარა. როგორც სეს-ის გურიის რეგიონული სამმართველოდან გვეუბნებიან, აზრი არ ჰქონდა წვიმაში შეწამვლას.
_ ძალიან ცუდი ამინდების გამო, შეწამვლა არ მოხერხდა. წვიმიან ამინდში კი, მთლიანად უშედეგოა შეწამვლა, ეს ცნობილი ამბავია. წვიმაში ეს მავნებელი საერთოდ არ ჩნდება, დამალულია. ამიტომ ხალხიც ვერ ხედავდა. ჩვენ ახლა ვახდენთ შეწამვლას, რადგან კარგი ამინდები დადგა. დღეს, მაგალითად, ქალაქ ოზურგეთში მოხდება შეწამვლა. ასევე შეიწამლება სოფლებიც. თავადაც უნდა დარეკონ ცხელ ხაზზე. სადაც უფრო ცუდი მდგომარეობაა გადიან ჩვენი ჯგუფები. ისე კ ი, ძალიან ხშირად ხდება, რომ შეწამვლის დროს, ეკიპაჟს გამოუვარდებიან ხოლმე და აქ არ გაიაროთ, იქეთ არ გაიაროთო, დევნიან თვითონ მოსახლეობის წარმომადგენლები. ეს თითქმის ყველა სოფელში ხდება. ასე არ შეიძლება. ვხედავთ, რომ მდგომარეობა კვლავ ცუდია, _ გვითხრა სეს-ის გურიის რეგიონული სამსახურის უფროსმა მანანა ერქომაიშვილმა.
მან ასევე გვითხრა, რომ დღეს შეწამვლითი სამუშაოები ჩატარდება სოფლებში: ვაკიჯვარში, ცხემლისხიდსა და ასკანაში. ასევე ქალაქ ოზურგეთში.
ხვალიდან კი შეწამვლითი სამუშაოები გაგრძელდება სოფელში: მაკვანეთში, სილაურში, ჯუმათში და ბაილეთში.
[sexy_author_bio]
