ლანჩხუთის მუნიციპალიტეტის მასშტაბით, ყველგან გამალებული სამუშაოები მიმდინარეობს. სოფლებში ხრეშავენ და აგებენ ცემენტის გზებს, იწმინდება სანიაღვრე არხები, ხდება ხიდების აღდგენა-შეკეთება და ა.შ. ქალაქში კი უპირატესად, ცენტრალური ნაწილის გაკეთილშობილებაზეა აქცენტი აღებული, რაც ოპოზიციისა თუ უბრალო ადამიანების კრიტიკის საფუძველი გახდა.
კერძოდ, ქალაქში ცენტრალური მოედნის ირგვლივ მდებარე მრავალბინიანი საცხოვრებელი სახლების გარე ფასადების მოწესრიგება ხდება.
ლანჩხუთელთა ნაწილის აზრით, მაშინ, როცა პერიფერიულ ქუჩებზე არც გზაა ნორმალური და არც სხვა რამ, ფასადების შეღებვაზე გვარიანი თანხების დახარჯვა, ცოტა არ იყოს გაუმართლებელია _ “კარგია რომ იერსახე იცვლება, მაგრამ ქალაქის მცხოვრებლებს სხვა უამრავი პრობლემა აწუხებთ და ასეთი ფასადური სამუშაოები გამაღიზიანებელია კიდეც”.
თუ მართლა ფასადზეა საუბარი, უპირველესად, ჟორდანიას ქუჩაზე, “გადარეული გურულის” ძეგლის მიმდებარე ტერიტორიაზე არსებული კორპუსი იყო მისახედი, რომლის გარე ფასადი ვერავითარ კრიტიკას ვერ უძლებს. იქ გაკრული “ცინკა” ისედაც უსახური იყო და ახლა, როცა მოძველდა, თანაც ალაგ-ალაგ ჩამოვარდა, უკვე თვალნათელი გახდა იმის საჭიროება, რომ იქ სასწრაფოდ უნდა დაწყებულიყო ასეთი ფასადური სამუშაოები.
“ქარიან ამინდში ბევრჯერ იყო შემთხვევა, როცა აღნიშნული სახლიდან სხვადასხვა სამშენებლო საგნები ჩამოვარდა. ეს ტერიტორია, იქედან გამომდინარე, რომ მიმდებარედ არაერთი სავაჭრო ობიექტი ფუნქციონირებს და ამავდროულად, მიკროავტობუსებისა და ტაქსების გაჩერების ადგილია, მუდმივად ხალხმრავალია და შესაბამისად, ყოველთვის არსებობს რისკი, რომ მსგავსმა შემთხვევებმა სავალალო შედეგი გამოიწვიოს. იყო შემთხვევები, როცა შენობიდან ჩამოვარდნილი სამშენებლო მასალა იქვე გაჩერებულ ავტომანქანას დაეცა და დააზიანა.
მდგომარეობას ისიც ართულებს, რომ აღნიშნული კორპუსის გარე ფასადი ათეული წლებია, თუნუქითაა შეფუთული და დღევანდელი მდგომარეობით, საკმაოდ დაზიანებულია. ეს, ერთი მხრივ, ძირეულად ამახინჯებს სახლის იერსახეს, ნამდვილად ულამაზოა ქალაქის ცენტრში ასეთი უსახური შენობა. ასევე, საფრთხის შემცველია მოქალაქეებისთვის და პრობლემა უკვე დიდი ხანია, გადაწყვეტას ითხოვს”, _ ამბობენ მოქალაქეები.
იმ ფონზე, როცა ქალაქის უმეტესი ქუჩები წლებია, ელის მოასფალტებას, მოსახლეობის ნაწილისთვის ძნელი აღსაქმელია ის ქმედება, რაც ქალაქის ცენტრში მდებარე პარკინგზე ხდება ზემოთ ნახსენები პროექტის ფარგლებში. აქ ახალდაგებული ასფალტის საფარი აიღეს და ქვაფენილის საპარკინგეს აგებენ, რაზეც, დიდი ალბათობით, საკმაოდ სოლიდური თანხები იხარჯება. არადა, რამდენიმე დღის წინ, როცა ლანჩხუთს პრემიერი სტუმრობდა, ეს საპარკინგე ადგილი ხელახლა დაიხაზა, რისთვისაც დამატებით თანხა დაიხარჯა.
მოსახლეობის ინფორმაციით, რკინიგზის სადგურის მიმდებარედ სასწრაფო წესითაა მოსაგვარებელი როგორც გზის საფარის, ისე სანიაღვრე არხების პრობლემა:
“რატომღაც ქალაქის ტერიტორიის ის ნაწილი, რომელიც რკინიგზის სადგურის მიმდებარედაა, უკვე ბევრი წელია ყველასგან მივიწყებულია და აქაურობის მოწესრიგებაზე თავს არავინ იწუხებს.
კარგია მოწესრიგებული და გალამაზებული ცენტრი, მაგრამ რა დააშავა ქალაქის არა ცენტრალურმა ნაწილმა?! პირველ რიგში, რკინიგზის ლიანდაგის მიმდებარე არხები უნდა გაკეთებულიყო, ყველა ქუჩის ნიაღვარი აქეთ იყრის თავს. ერთხელაც, წყალდიდობა არ აცდება აქაურობას. გაუსაძლისია უკვე აქ ცხოვრება, ინფიცირების კერად იქცევა მალე აქაურობა.
იმის გამო, რომ სანიაღვრე არხები არ იწმინდება, ყოველი წვიმის შემდეგ მოვარდნილი ნიაღვარი პირდაპირ სამანქანო გზაზე მიედინება, ფეხით მოსიარულეებისთვის კი, გადაადგილების პრობლემა დგება. ეს არხები ქვეწარმავლებისა და ანტისანიტარიის ბუდედაა ქცეული. ფაქტობრივად, ჭაობია. აუტანელია უკვე ეს ყველაფერი. პირად საუბრებში ყველა აღიარებს, რომ მისახედია აქაურობა, მაგრამ, სამწუხაროდ, რეალურად არაფერი კეთდება”, _ ამბობენ ადამიანები, რომლებიც ლანჩხუთში, რკინიგზის სადგურის მიმდებარე ტერიტორიაზე ცხოვრობენ.
საგულისხმოა, რომ ზემოთ ნახსენები პრობლემის თაობაზე ურუშაძის ქუჩის მცხოვრებლებმა ერთობლივი განცხადებით ლანჩხუთის მერიას გასული წლის გაზაფხულზე მიმართეს და საკითხის მოსაგვარებლად დახმარება ითხოვეს.
“ყოველი წვიმის შემდეგ იტბორება ძველი ბაზრის მიმდებარე ტერიტორია, რომელიც გამოწვეულია რკინიგზის სადგურის წინ მდებარე არხის უფუნქციობით. მოსახლეობის თხოვნაა, მოხდეს ამ სანიაღვრე არხის რეაბილიტაცია ან ახალი სანიაღვრე არხის მოწყობა. არხის მოუწყობლობა გამოიწვევს სხვადასხვა ინფექციის კერის წარმოქმნას”, _ ეწერა ურუშაძის ქუჩის მცხოვრებთა ერთობლივ განცხადებაში, რომელსაც ხელს ათეულობით ადამიანი აწერდა და მისი უშუალო ადრესატი მუნიციპალიტეტის პირველი პირი ალექსანდრე სარიშვილი იყო.
ურუშაძის ქუჩის მოსახლეობა ამბობს, რომ მაშინდელ მათ განცხადებას გარკვეული შედეგი მოჰყვა, თუმცა, სამწუხაროდ, დროებითი ეფექტის მქონე.
ლანჩხუთში ქალაქის ცენტრალური ნაწილის რეაბილიტაცია “განახლებული რეგიონების” პროგრამის ფარგლებში ხორციელდება. პროგრამა ოთხწლიანია, 63 მუნიციპალიტეტს მოიცავს და რეგიონების ურბანული განახლების მიზნით, სახელმწიფოს, მუნიციპალიტეტის და კერძო საკუთრებაში არსებული მნიშვნელოვანი ობიექტის გარე ხედის გარემონტებას ითვალისწინებს. მთლიანი პროგრამის პირველი ეტაპის საორიენტაციო ღირებულება 500 მილიონი ლარია.
ლანჩხუთის მერიის ინფრასტრუქტურის სამსახურის უფროსის, ლევან ჩხაიძის თქმით, პროგრამის ფარგლებში კონკრეტულად რა თანხის დახარჯვა იგეგმება, ამაზე ინფორმაციას ლანჩხუთის მერიაში არ ფლობენ, ჯერჯერობით მაინც:
“პროექტი, რომელიც ამჟამად ხორციელდება ქალაქის ცენტრში, საკმაოდ მასშტაბურია და ის მხოლოდ შენობების გარე ფასადების მოწესრიგებას არ ითვალისწინებს, კეთდება საპარკინგე ადგილები, იგეგმება ცენტრალური სკვერის სრული რეაბილიტაციაც. მართლა საკმაოდ ლამაზი და კარგი პროექტია, დამერწმუნეთ”, _ ამბობს ჩხაიძე.
რაც შეეხება “გადარეული გურულის” ძეგლის მიმდებარე ტერიტორიაზე არსებულ კორპუსს, ჩხაიძის თქმით, პროექტის ფარგლებში აქ ფასადის მოწესრიგება არ იგეგმება:
“ამ კორპუსის ფასადის მოწესრიგება აღნიშნულ პროექტში არაა გათვალისწინებული, თუმცა, მომავალი წლისთვის გვაქვს გეგმაში, ადგილობრივი სახსრებით მოვაგვაროთ ეს პრობლემა. ამ ეტაპისთვის იმას საშიშროება ნამდვილად არ არსებობს, რომ შენობიდან რაიმე სახის სამშენებლო მასალა ჩამოვარდეს, ეს პრობლემა მოგვარებულია, სამომავლოდ კი ნამდვილად ვგეგმავთ გაკეთებას. ახლა მთლიანად რომ ავხსნათ ეს “ჟეშტებიც” არ გამოდის, მერე მოსახლეობის მხრიდან იქნება პრეტენზიები წყალი შემოვიდაო და ასე შემდეგ. წელს სახურავის პრობლემა მოვაგვარეთ აქ, მომავალში ფასადსაც მოვაწესრიგებთ”, _ ამბობს მერიის ინფრასტრუქტურის სამსახურის ხელმძღვანელი.
რაც შეეხება რკინიგზის სადგურის მიმდებარე ტერიტორიას, სადაც, მოსახლეობისვე ინფორმაციით, სასწრაფო წესითაა მოსაგვარებელი როგორც გზის საფარის, ისე სანიაღვრე არხების პრობლემა, ლანჩხუთის მერიაში ამბობენ, რომ ამ კუთხითაც იგეგმება საჭირო ინფრასტრუქტურული სამუშაოების გახორციელება: “გეგმაშია, როგორც სანიაღვრე არხების გაწმენდა, ისე რკინიგზის სადგურის მიმდებარე ტერიტორიაზე გზის საფარის მოწესრიგება”.
[sexy_author_bio]
