როცა პურის ფასის ზრდის თაობაზე ვსაუბრობთ, უნდა აღვნიშნოთ, რომ გასული წლის 20 დეკემბრიდან, ანუ 9 თვის მანძილზე, საქართველოში პური ოთხჯერ გაძვირდა.
მოსახლეობის საშუალო ფენა, ვისაც ყველაზე ძალიან აწევს ფასის ზრდა ხუთი თეთრითაც კი, ამ ქმედებას შემპარავ “მოხრჩობას” უწოდებენ და გვეუბნებიან, რომ პური თვით შევარდნაძესაც არ გაუძვირებია ყველაზე მძიმე გაჭირვების ჟამს, როცა საქართველოში არეულობა და ბნელი პერიოდი იყო.
ადგილობრივი თვითმმართველობის არჩევნების წინა დღეს, ოზურგეთში, მაღაზიებში წარწერა გამოჩნდა, რომ პური ხუთი თეთრით გაძვირდებოდა.
მოქალაქეებმაც, პურის გაძვირების თაობაზე, მაღაზიებში გამოკრული განცხადებებიდან შეიტყვეს. თუმცა, ყველა სავაჭრო ობიექტებზე, მაგალითად, “მაგნიტის” ქსელში, “გურია ნიუსს” უთხრეს, რომ მათ არაფერი იციან პურის გაძვირების თაობაზე.
შპს “ვასაძის პურის” სარეალიზაციო მარკეტში დაგვიდასტურეს, რომ პური ძვირდება და დირექტორმა ბიძინა ვასაძემ კომენტარიც გააკეთა:
_ რა ვქნათ? ერთი ტომარა პურის ფქვილი წისქვილკომბინატებმა 7-8 ლარით გააძვირეს. ამიტომ ჩვენც იძულებული ვართ, მინიმალურად მაინც გავზარდოთ პურის ფასი, _ გვითხრა მან.
“არჩევნების მეორე დღესვე რომ პურის გაძვირებას გპირდება, კაი ხელისუფლებაა! რას ერჩი, სიმართლის მოყვარული მთავრობაა, ტყუილს ხომ არ გვაკადრებენ?!” _ გაბრაზებული ამბობენ მაღაზიებში, პროდუქტის საყიდლად მისული ადამიანები.
არჩევნების შემდგომ, სამ დღეში, პურის ფასი უკვე 10 თეთრით გაიზარდა, ზოგიერთი სახეობის კი _ 15 თეთრითაც.
_ ამას ჰქვია ნელ-ნელა ადამიანის მოხრჩობა, როცა საარსებო პურსაც ყოველ ხუთ დღეში, ხუთი თეთრით უძვირებ. თან საარჩევნოდ! არჩევნებამდე გავრცელებული ინფორმაცია, რომ მალე ერთი ტომარა 50 კგ-იანი პურის ფქვილის ფასი ასი ლარი გახდება, ასრულდება! შევარდნაძის დროსაც არ გაძვირებულა! წინააღმდეგი გამოვიდა, გვახსოვს! არც ერთ მთავრობას არ გაუძვირებია პური ასეთ გასაჭირში, როცა ყველაფრის ფასი, ლამის, გაორმაგდა. ესენი ვინ არიან? ხმებს კარგად ითხოვენ, ლუკმა პურს კი ურცხვად გვიძვირებენ, _ გვითხრა ოზურგეთელმა სერგო ბოიაჯანმა.
თამარ გაბიტაძე, ოზურგეთის მკვიდრი:
“მახსოვს, ერთ ლარად სამ ცალ პურს ვყიდულობდი და ათ თეთრს უკან გვიბრუნებდნენ. გუშინ ხუთი კილოგრამი ფქვილი ვიყიდე და ათი ლარი გადავიხადე! გაბრაზებული ვარ კი არა, არ ვიცი, რა ვთქვა! ადრე არსებობდა სახალხო კონტროლი, ხალხზე ფიქრობდნენ, ავად თუ კარგად, რომ პური მაინც არ გაეძვირებინათ. ახლა ვინმე არის მაკონტროლებელი? ქუჩაში ვზივარ, რაღაცას ვვაჭრობ, იმიტომ, რომ პენსია წამალს და პურს არ ყოფნის. შევარცხვინე მაგათი ადამიანობა!”
_ პური, კაცო?! პური ასე შემპარავად როგორ უნდა გაუძვირო ადამიანს? წელიწადში ხუთჯერ, ხუთ დღეში ორჯერ… იმდენი ვერ ჰქნეს, რომ მიეღწიათ ერთი რაღაცისთვის _ პური, ზეთი, შაქარი, საპონი, მარილი და ასანთი ჰქონოდა ხალხს შედარებით იაფად, _ გვითხრა ასაკოვანმა პენსიონერმა ნათელა თოდრაძემ.
_ რა უნდა ვთქვათ?! უარესს იზამენ ალბათ და გვეკუთვნის კიდეც! გაბედულად გააორმაგეს ყველაფრის ფასი, მაგრამ პურთან მიმართებაში ვირეშმაკობენ. არ კმაროდა, რვა თვეში ხუთჯერ რომ გააძვირეს? ახლა, ლამის, ყოველ კვირაში აძვირებენ ხუთი თეთრით, რომ ნაკლებად შესამჩნევი გახდეს. ამოსუნთქვას არ დაგვიშლიდნენ, ნეტავ, რომ ლუკმა ჩავყლაპოთ… _ გვითხრეს მიშა სიამაშვილმა, ნინო ქავთარაძემ, მაია თავაძემ და კაპიტონ ხურციძემ.
დღეის მდგომარეობით, ოზურგეთში (როგორც გვატყობინებენ, მთელ საქართველოში), პურზე ფასის ზრდას კვლავ ელოდებიან.
რაც შეეხება ერთ ტომარა ხარისხიან, 50 კგ. პურის ფქვილს, ყველა მაღაზიაში 84-85 ლარი ღირს!
ამ ზაფხულს, ივლისში, პურის ფასის მატებისას, “პურის მცხობელთა ასოციაციის” თავმჯდომარემ, მალხაზ დოლიძემ “გურია ნიუსთან” საუბარში განაცხადა, რომ პურ-პროდუქტების ფასის მატება არა მარტო საქართველოში, არამედ მსოფლიოში იქცა დიდ პრობლემად.
“ეს არ არის მარტო საქართველოს პრობლემა. მთელ მსოფლიოში ძალიან დიდ პრობლემად იქცა პურ-პროდუქტების, ხორბლის და ფქვილის ფასები. რუსეთში 12 %-თ გაიზარდა ხორბლის და ფქვილის ფასი, პურ-პროდუქტების ფასი კი 6%-ით. რუსეთი არის ერთ-ერთი მწარმოებელი და გამყიდველი ამ პროდუქტების, ერთ-ერთი მდიდარია დღეს მსოფლიოში. ასევე, არის ავსტრალია, რომელსაც ხორბლის მოსავალი ყველაზე მეტი მოუვიდა, რასაც აწარმოებს და ყიდის.
მსოფლიოში 8 ქვეყანაა ხორბლის მწარმოებელი და გამყიდველი. ჩვენს რეგიონშია: რუსეთი, უკრაინა, ყაზახეთი. ევროპაშია რუმინეთი და საფრანგეთი. ამერიკის კონტინენტზე კი ამერიკა და კანადა.
ყველაზე დიდი მოსავალი ავსტრალიამ მიიღო, მაგრამ იქიდან ვერ წამოიღებს, მაქედან კი არა აგერ, ჩვენები ყაზახეთიდანაც ერიდებიან ხორბლის წარმოებას, იმიტომ, რომ სატრანსპორტო ლოჯისტიკა, დაახლოებით, 100 დოლარი ჯდება, გზა ძალიან ძვირია. თუ რუსეთს შევადარებ 18 დოლარი ჯდება ჩამოტანა. ძალიან დიდი სხვაობაა.
არსებობს ორი ბირჟა, სადაც ხდება მსოფლიოში ხორბლის ფასების ჩამოყალიბება. ამ ბირჟებზე ფასი, საშუალოდ, 250 დოლარია, თუ შარშანდელს ავიღებთ იმ დროს 180-200 დოლარი იყო საშუალო ფასი. ხორბლის ფასი, საკმაოდ შესამჩნევად არის გაზრდილი.
საქართველოს წელიწადში, დაახლოებით, მილიონ ტონამდე ხორბალს მოიხმარს, მაგრამ 180 ათას ტონას აწარმოებს. ეს არის ყველაზე დიდი ციფრი, რასაც საქართველო აწარმოებს, კახეთის რეგიონში. რაც საკმარისი არ არის. ფასის მატება მარტო საქართველოში არ ხდება, ეს მთელ მსოფლიოში ხდება, ამას ხელს უწყობს კორონავირუსის პანდემიის გამო ეკონომიკური კრიზისი”, _ გვეუბნება დოლიძე.
მისი თქმით, საქართველოში პურზე ფასების მატება, მოსალოდნელი არაა.
მალხაზ დოლიძე ამბობს, რომ სუბსიდირების პროგრამას ქარხნული ტიპის პურის მწარმოებელი საცხობები იმ პირობით იღებენ, რომ პურზე ფასს არ გაზრდიან, რაც შეეხებათ თონეებს და მსგავსი სახის პატარა საცხობებს, მათ სუბსიდირება არ ეხებათ. ამიტომ შესაძლოა ფასს ზრდიან და უფრო მეტიც, ბალანსისთვის, მათი ნაწილი პურს წონას აკლებს:
“რაც შეეხება საქართველოში პურზე ფასების მატებას, მოსალოდნელი არაა, რადგან სუბსიდირების პროგრამა და საცხობები, რომლებიც ქარხნული ტიპის პურს, ანუ ქვის პურს აწარმოებენ ამ სუბსიდირებას იმ პირობით იღებენ, რომ ფასს არ გაზრდიან პურზე. თუ ავიღებთ პატარა საცხობებს და თონეებს, მათზე სუბსიდირება არ კეთდება და შეიძლება ისინი ზრდიან ფასს 20-25 თეთრით. მათი ზოგი ნაწილი კი პურს წონას აკლებს, რომ დააბალანსონ და მომხმარებლები არ დააფრთხონ.
წარმოების პროცესს რაც შეეხება, მოგეხსენებათ, ბუნებრივი გაზის ფასის ზრდა პურის მწარმოებლებს არ შეხებიათ, რაც ხელშესაწყობია”, _ თქვა დოლიძემ.
თუმცა, დღეს, აღნიშნული საუბრიდან, სამიოდე თვის შემდეგ, პური კვლავ გაძვირდა.
[sexy_author_bio]
