2022 წლის პირველი იანვრიდან ავტომობილისთვის კატალიზატორის ქონა აუცილებელი იქნება. ვის მოეთხოვება კატალიზატორის ქონა და რამდენად მზად არიან მძღოლები გამკაცრებული რეგულაციების შესასრულებლად? სახმელეთო ტრანსპორტის სააგენტო ეკონომიკისა და მდგრადი განვითარების სამინისტროს სიპ-ია პასუხსიმგებელი დარგში ტექნიკური რეგლამენტების შემუშავებასა თუ ზედამხედველობაზე.
„იმ სატრანსპორტო საშუალებებზე, რომლებმაც 2020 წლის 1 აპრილამდე გაიარეს საქართველოში პირველადი რეგისტრაცია, პერიოდული ტექნიკური ინსპექტირებისას არ მოწმდება კატალიზური კონვერტორის გამართულობა (აღნიშნული უცვლელი რჩება 2022 წლის 1 იანვრიდანაც). რაც შეეხება იმ ავტოსატრანსპორტო საშუალებებს, რომლებმაც 2020 წლის 1 აპრილის შემდეგ საქართველოში გაიარეს პირველადი რეგისტრაცია, დღეის მდგომარეობით მათზე ვრცელდება გამართული კატალიზური კონვერტორის არსებობის ვალდებულება და მათი ლამბდა კოეფიციენტი არ უნდა გაცდეს 1-ის (+-0.03) დიაპაზონს“, _ აცხადებენ სიპ-ში.
ახალი რეგულაციების ამოქმედება 2022 წლის იანვრიდანაა დაგეგმილი.
ავტომობილების ინსპექტირების ორგანოების ასოციაციის ხელმძღვანელი ვაჟა იორდანიშვილი “კომერსანტთან“ ახალი რეგულაციების ამოქმედების შესახებ აცხადებს, რომ კატალიზატორის ქონა ყველა ავტომობილს არ მოეთხოვება, თუმცა მისი თქმით, იმდენად მკაცრდება პარამეტრები, რომ ავტომობილების დაახლოებით 40 %-ს ინსპექტირების გავლა გაუჭირდება.
მისი თქმით, სახელმწიფომ აქტიური საინფორმაციო კამპანია უნდა დაიწყოს, რათა მძღოლები საქმის კურსში იყვნენ და ცვლილებებს მომზადებულები შეხვდნენ.
„არსებული რეგლამენტის შესაბამისად, კატალიზატორის ქონა 2020 წლის აპრილს შემდგომ განბაჟებულ ავტომობილებს მოეთხოვება. 2022 წლიდან ეს ნორმა შენარჩუნდება, თუმცა კატალიზატორის ქონა ყველა ავტომობილს არ მოეთხოვება, უბრალოდ პარამეტრები მკაცრდება, თუ დღემდე CO-ს შემცველობა გამონაბოლქვში იყო 0,6%, 2022 წლიდან 0,3%-ის დიაპაზონში უნდა მერყეობდეს. ფაქტობრივად გამონაბოლქვზე კონტროლი ორმაგად მკაცრდება, შესაბამისად, საკმაოდ მკაცრი რეგულაციაა და ბევრ ავტომობილს, სავარაუდოდ 40%-ის ფარგლებში, ინსპექტირების გავლა გაუჭირდება“, – ამბობს ვაჟა იორდანიშვილი.
