ოზურგეთში, თხილის მიმღებ პუნქტებთან, დღის განმავლობაში, ნაკლებად დაინახავთ თხილის ჩასაბარებლად მისულ ადამიანებს.
_ყველაფერს ფასი მოემატა. თან ერთხელ კი არ მატულობს. ეკონომისტი ქალი ვარ, უმაღლესი განათლება მივიღე თავის დროზე. ვზივარ და ველოდები, ვიღაც როდის მოიტანს თხილს. დამთავრდა სეზონი… თხილის ფასს არ ეხება მატება, დანარჩენს კი-ყველაფერს. უნდა გავტეხო. 65 თეთრია ერთი საღი გულის ფასი და ამის მიხედვით ვიბარებთ. ქარხნები ასე გვავალებენ. რად გინდა? რა დღეში ვართ. პურის ფულსაც ვეღარ ვშოულობთ უკვე. იტყვი რაიმეს და ერთი გეძახის „ნაცი“ ხარო, მეორე გეუბნება, „ქოცი“ ხარო. საზოგადოებაც ორად გაიხლიჩა. ასე ყოფნა უკვე არ შეიძლება, – გაბრაზებული გვეუბნება გვეუბნება თხილის მიმღები ოპერატორი ქალბატონი ნინო რამიშვილის ქუჩაზე, სასტუმრო „გურიას“ მიმდებარედ არსებულ თხილის მიმღებ პუნქტში. თან გვთხოვს, ფოტო მას არ გადავუღოთ. ვინაობის დასახელებაზეც უარს გვეუბნება.
__ კარგია, ყველაფერი უნდა გაძვირდეს კიდევ უარესად. საწვავი 4 და 5 ლარი უნდა გახდეს… იქნებ, მიხვდეს ამ ხალხმა, რომ არჩევნებზე 50 ლარად და მაცივრების საფასურად არ გაიყიდონ..არაფერი არ გვეშველება. უარესი გასაჭირი იქნება, – ასევე გაბრაზებით მოგვაძახა მამაკაცმა, რომელმაც მოტანილი თხილი სასწრაფოდ დადო სასწორზე და ვინაობის დასახელებაზე მანაც უარი განგვიცხადა, – რად გინდათ ჩემი გვარი, ყველა ჩემ დღეშიაო.
ქალაქის სხვა პუნქტებში თხილის ფასს უმეტესად, კვლავ გატეხვის მეთოდით იბარებენ. ამჯერად ხშირად ნახავთ გაბრაზებულ რეალიზატორებს, რომლებიც თხილის ფასის ზრდას, მათივე თქმით, მსოფლიო ბაზარზე ფასის აწევის მუხედავად, ვერ ხედავენ. პირიქით, ქარხნებიდან ხშირია მითითება, რომ რაც შეიძლება ხარისხიან გული ეძებონ და გატეხონ ბევრი, რომ ზარალი მინიმალური დარჩეს.
არის შემთხვევები, როცა გაუტეხავადაც ღებულობენ, თუმცა ეს უმეტესად გვიან შეგროვებულ, საგვიანო, ველურად წოდებული ჯიშის თხილს ეხება და ერთ კილოგრამს, საშუალოდ, თუ საღია და ფერიც ვარგისია, 4 ლარად იბარებენ.
როგორც ვთქვით, თხილის სეზონი უკვე მიილია და დღის განმავლობაში, ხშირად ამაოდ ელოდებიან თხილის მიმღებ პუნქტებში, ტომრით მოსულ მოქალაქეებს.
[sexy_author_bio]
