გუშინ “Eurosport”-მა იმ ევროპელი ფეხბურთელების ათეული შეადგინა, რომლებიც მსოფლიოს ჩემპიონატის საკვალიფიკაციო ეტაპის შედეგებით, ფინალურ ეტაპზე ვეღარ იასპარეზებენ _ საუბარია ათ ყველაზე ძვირადღირებულ მოთამაშეზე.
საინტერესოა, რომ ამ ჩამონათვალში საქართველოს ნაკრების ლიდერი ხვიჩა კვარაცხელიაც მოხვდა. მას “Transfermarkt” ამჟამად 18 მილიონ ევროდ აფასებს, ისევე, როგორც ბოსნია ჰერცეგოვინის ნაკრების ნახევარმცველ მირალემ პიანიჩს. მსოფლიო პირველობის მიღმა დარჩენილი ევროპელებიდან ყველაზე ძვირადღირებული ნორვეგიელი ერლინგ ჰაალანდია (150 მილიონი), რომელსაც კვალში იან ობლაკი (სლოვენია, 70 მილიონი) და მილან შკრინიარი (სლოვაკეთი, 60 მილიონი) უდგანან.
ხვიჩამ მსოფლიოს პირველობის საკვალიფიკაციო ჯგუფური ეტაპი ჩინებულად ჩაატარა _ 6 მატჩში 4 გოლი გაიტანა, გახდა B ჯგუფის ბომბარდირი და სიმბოლურ ნაკრებშიც მოხვდა. ამასთან, იყო ერთი კომპონენტი, რომელშიც კვარაცხელია არა მარტო ჯგუფში, არამედ, ევროპაში გამორჩეული გახლდათ. ის მატჩში საშუალოდ 4 წარმატებულ დრიბლინგს ახორციელებდა, რაც საუკეთესო შედეგია ინგლისელ რაჰიმ სტერლინგთან ერთად.
ზემოთ სიმბოლური ნაკრები ვახსენეთ. გუშინ გამოცემამ “WhoScored” მსოფლიოს 2022 წლის ჩემპიონატის საკვალიფიკაციო B ჯგუფის სიმბოლური ნაკრები დაასახელა, რომელშიც ერთი ქართველია _ ხვიჩა კვარაცხელია. ხვიჩას საშუალო შეფასება 7.5 ქულაა, ის ჯგუფის სიმბოლურ ნაკრებში (4-4-2) მარცხენა ნახევარმცველის პოზიციაზე მოხვდა. მიუხედავად იმისა, რომ ჯგუფი 19 ქულით დამაჯერებლად მოიგო ესპანეთის ნაკრებმა, სიმბოლურში ესპანეთს, შვედეთსა და საბერძნეთს თანაბარი რაოდენობის წარმომადგენელი ჰყავთ: 3-3. ერთი ფეხბურთელი კი კოსოვოელია.
ორი დღის წინ ბათუმში, საქართველოს ახალგაზრდული ნაკრები ინგლისელ თანატოლებს ამხანაგურად დაუხვდა და გაიმარჯვა – 3:2.
“ნისლიანი ალბიონის” ქვეყანაში ეს მარცხი მტკივნეულად აღიქვეს. ცნობილმა გამოცემამ “The Sun” მატჩისადმი მიძღვნილი წერილი შემდეგნაირად დაასათაურა – “კოშმარი”. მიმოხილვაში კი ვკითხულობთ: “ინგლისის 21-წლამდელებმა ბათუმში რთული მატჩი ჩაატარეს. “ახალგაზრდა ლომები” ევროპის 2023 წლის ჩემპიონატის მასპინძლებთან თამაშით გაოგნებულები დარჩნენ. ინგლისისთვის მეორე ტაიმი კოშმარულად დაიწყო, როცა გულიაშვილმა მეტოქეს მეორე გოლი გაუტანა. მწვრთნელი კარსლის ბიჭების “საშინელებათა შოუ” კი გიორგი გოჩოლეიშვილმა დაასრულა, რომელმაც 65-ე წუთზე ანგარიში 3:0 გახადა. ის ლუკ თომასს გასცდა, ინგლისის საჯარიმოში თავისუფლად შევიდა და შორეულ კუთხეში გაიტანა”.
საქართველოს ახალგაზრდული გუნდის წარმატებას ესპანეთშიც გამოეხმაურნენ. გამოცემამ “AS” გიორგი მამარდაშვილს მორიგი წერილი მიუძღვნა და საქართველო – ინგლისის ამხანაგური მატჩის შესახებაც ისაუბრა.
“გიორგი მამარდაშვილს 22 სექტემბრის შემდეგ არ უთამაშია. “ვალენსიაში” ძირითადი მეკარის სტატუსი მას იასპერ სილესენმა ჩამოართვა, მაგრამ ბოლო სანაკრებო პაუზისას, გიორგიმ კიდევ ერთხელ გაიღიმა.
მამარდაშვილი მოედანს დაუბრუნდა და საქართველოს 21 წლამდე ნაკრებში ითამაშა, რომელიც ინგლისელ თანატოლებს დაუპირისპირდა. საქართველომ – 3-2 მოიგო. მამარდაშვილმა მოედანზე 90 წუთი გაატარა და ქართველებმა გამარჯვება განსაკუთრებულად აღნიშნეს, რადგან მათთვის ეს შეხვედრა ამხანაგურ მატჩზე გაცილებით მეტი იყო.
მამარდაშვილს ღიმილი დაუბრუნდა და მისი “ვალენსიური” მომავალი უახლოეს მომავალში გაირკვევა. “ღამურებს” შეუძლიათ, გიორგის კონტრაქტში ჩადებული პუნქტი აამოქმედონ და იგი 250 000 ევროს სანაცვლოდ გაიფორმონ. ოღონდ, ეს პირველ იანვრამდე უნდა გააკეთონ. კლუბმა მის აგენტებს შეატყობინა, რომ ამ პუნქტის ამოქმედებას აპირებს, მაგრამ ამის შემდეგ სერიოზული პროგრესი არ ყოფილა. 2021 წლის დასრულებამდე თვე-ნახევარია დარჩენილი და მამარდაშვილის მომავლის საკითხი ამჟამად “ვალენსიას” ხელმძღვანელების მაგიდაზეა. ერთადერთი, რაც დარჩა, ტელეფონის ყურმილის აღება და თბილისის “დინამოსთან” ყველაფრის გაოფიციალურებაა”.
ორი დღის წინ რუსულ სპორტულ მასმედიაში გამოითქვა ვარაუდი, რომ უახლოეს მომავალში შოთა არველაძე კლუბ “კრასნოდარს” ჩაიბარებდა. გუშინ ცნობილი გახდა რომ ქართველი ფეხბურთის სპეციალისტი უფრო ინგლისური “ჰალისაკენ” იხრება.
ცნობილი თურქი ჟურნალისტის, სალიმ მანავის ინფორმაციით, არველაძემ გაერთიანებულ სამეფოში მუშაობის უფლების მისაღებად განაცხადი უკვე შეიტანა და ყველაფერი უახლოეს პერიოდში გაოფიციალურდება. არველაძე “ჰალის” ახალ მფლობელ ილიჩალის, რომელიც მისი ახლო მეგობარია, უკვე შეუთანხმდა და ქართველი სპეციალისტის “ნისლიან ალბიონზე” ხილვას წინ არაფერი უდგას.
“ჰალი” მიმდინარე სეზონში არც თუ ისე კარგად გამოიყურება. 17 ტურის შემდეგ გუნდის ანგარიშზე მხოლოდ 12 ქულაა და ისინი სატურნირო ცხრილის 22-ე ადგილს იკავებენ. “ჰალი” გასავარდნ ზონაშია და სავარაუდოდ, არველაძის თავდაპირველი უმთავრესი ამოცანა ინგლისის “ჩემპიონშიპში” ადგილის შენარჩუნება იქნება.
[sexy_author_bio]
