გუშინწინ ცნობილი გახდა, რომ პოპულარულმა ბრიტანულმა საფეხბურთო ჟურნალმა “World Soccer”, საქართველოს ნაკრებისა და ესპანური “ვალენსიას” კარის დარაჯი გიორგი მამარდაშვილი ევროპაში მოთამაშე იმ ექვს საუკეთესო ფეხბურთელს შორის დაასახელა, რომლებიც მიმდინარე სეზონში იჯარით გამოდიან, მაგრამ თავიანთი თამაშით უკვე მოასწრეს საყოველთაო ყურადღების მიპყრობა.
მამარდაშვილი ჩამონათვალში რიგით მეორეა. მასთან ერთად ექვსეულში მოხვდნენ: მანუელ ლოკატელი (“იუვენტუსი”), ნუნუ მენდეში (“პარი სენ-ჟერმენი”), მირალემ პაიანიჩი (“ბეშიქთაში”), ტიმო ბაუმგარტლი (“უნიონ ბერლინი”) და დანილა პროხინი (“სოჩი”).
“როდესაც ქართველი მეკარე “მესტალიაზე” თბილისის “დინამოდან” 12-თვიანი იჯარით მივიდა, მოლოდინი მცირე იყო. “ვალენსიას” ხელმძღვანელებისთვის მამარდაშვილი თავდაპირველად სამომავლო გეგმა იყო იმ პოზიციაზე, სადაც ოთხიდან ერთ-ერთი მოთამაშე გახლდათ და ჩანდა, რომ ის გამოსვლას სარეზერვო გუნდში გააგრძელებდა. მაგრამ იასპერ სილესენისა და ხაუმე დომენეკის ტრავმების წყალობით, ახალგაზრდა ქართველს, რომელიც სეზონის წინ შთამბეჭდავად გამოიყურებოდა, “ლა ლიგის” ახალ სეზონში შანსი მიეცა. და რა შთაბეჭდილება მოახდინა მან? შეასრულა შესანიშნავი სეივი “ხეტაფესთან” მოგებულ შეხვედრაში და ახლა ის ჩაბმულია კონკურენციაში, რათა გახდეს ნომერ პირველი მეკარე “ვალენსიაში”, _ დაწერა “World Soccer”-მა.
“World Soccer”-მა გიორგი მამარდაშვილი გამოარჩია, ფიბა-მ კი მსოფლიოს 2023 წლის ჩემპიონატის საკვალიფიკაციო ციკლის პირველი ფანჯარა შეაჯამა და ევროპული ნაკრებების თითო გამორჩეული კალათბურთელი დაასახელა. საქართველოდან ეს პატივი თორნიკე შენგელიას ერგო, რომელმაც მხოლოდ უკრაინასთან მატჩში ითამაშა:
“შენგელიამ საქართველოს ნაკრებისთვის ყველაფერი გაიღო. 24 საათიც კი არ იყო გასული, რაც მან კლუბის რიგებში ითამაშა, რომ ეროვნული გუნდის მაისური მოირგო და უკრაინასთან მოგებულ შეხვედრაში უმნიშვნელოვანესი 16 ქულა და 13 მოხსნა მიითვალა. მან თამაშში მთელი გული ჩადო და ქომაგები არა ერთი საოცარი მომენტით აღაფრთოვანა, თუმცა, ცუდი ამბავიც შეემთხვა. თორნიკემ ტრავმა მიიღო, რაც საქართველოს ნაკრებისთვის დიდი დარტყმა აღმოჩნდა. ქართველებს ესპანურ ხაენში მოგების ისედაც მცირე შანსი ჰქონდათ, შენგელიას გამოკლების შემდეგ კი, სიტუაცია თითქმის უიმედო გახდა”.
მიჩვეულები ვართ რომ რუსულ მასმედიაში ქართველ სპორტსმენებს არ წყალობენ. საბედნიეროდ, ზოგჯერ ერთეული გამონაკლისებიც გხვდება.
რამდენიმე დღის წინ ქართველმა ძიუდოისტებმა შერეულ გუნდებს შორის ევროპის ჩემპიონატზე გაიმარჯვეს, რომელსაც რუსეთის ქალაქმა უფამ უმასპინძლა. რუსეთის ძიუდოს ფედერაციის პრეზიდენტმა ვასილი ანისიმოვმა 2024 წლის ოლიმპიადასთან დაკავშირებულ გეგმებზე ისაუბრა და რუსი ძიუდოისტებისთვის მაგალითად ქართველი სპორტსმენები მოიყვანა:
“ყველაფერს გავაკეთებთ, რათა 2024 წელს პარიზში გასამართ ოლიმპიადაზე, თამაშების ისტორიაში ჩვენთვის საუკეთესო შედეგები ვაჩვენოთ. ძალიან მნიშვნელოვანია ფსიქოლოგიური ფაქტორი _ ჩვენს სპორტსმენებს თვალებში ცეცხლი უნდა ენთოთ. და ამ მხრივ სამაგალითო საქართველოს ნაკრებია. ეს გუნდი ფინანსური კუთხით არცთუ ძალიან უზრუნველყოფილია, მაგრამ ქართველ ძიუდოისტებს თითქოს ცეცხლი უკიდიათ, გამოდიან და უკანასკნელ ამოსუნთქვამდე იბრძვიან გამარჯვებისთვის”, _ განაცხადა ანისიმოვმა რუსულ მედიასთან.
ფეხბურთს დავუბრუნდეთ. გუშინ ბრიტანულ მასმედიაში გაჟღერდა ინფორმაცია რომ 34 წლის ურუგვაელი თავდამსხმელი ედინსონ კავანი “მანჩესტერ იუნაიტედის” დატოვებას გეგმავს და ახალი სეზონიდან კარიერას ისევ რომელიმე ძლიერ კლუბში გააგრძელებს. ურუგვაელს კონტრაქტი მიმდინარე სეზონის ბოლოს უმთავრდება და მისი სურვილია, რომ კატალონიის “ბარსელონაში” ითამაშოს.
კავანიმ მედიასთან რამდენჯერმე განაცხადა, რომ კატალონიურ გუნდში თამაშზე ოცნებობს. “ბარსელონას” ამჟამად ურუგვაელის დამატების ფინანსური რესურსი არ გააჩნია, ამიტომ ფეხბურთელთან მოლაპარაკებებს სეზონის ბოლოს დაიწყებს, როცა ედინსონი თავისუფალი აგენტი გახდება.
“მანჩესტერ იუნაიტედი” რამდენიმე დღის წინ გერმანელმა ფეხბურთის სპეციალისტმა რალფ რანგნიკმა ჩაიბარა, თუმცა მხოლოდ მიმდინარე სეზონის ბოლომდე და რასაკვირველია ბრიტანული კლუბი მთავარ მწვრთნელს ისევ ეძებს.
გამოცემა “Telegraph”-ის მტკიცებით, “იუნაიტედის” სიაში ფავორიტად იტალიის ნაკრების მთავარი მწვრთნელი რობერტო მანჩინი რჩება, თუმცა, ყველაფერი მარტის შემდეგ გაირკვევა, როდესაც ევროპის მოქმედი ჩემპიონი იტალიის ნაკრები მსოფლიოს 2022 წლის ჩემპიონატის “ფლეი ოფში” ითამაშებს და ცნობილი გახდება გავა თუ არა მუნდიალზე.
ესპანური “AS”-ის ცნობით კი პოლონეთის ნაკრების თავდამსხმელი რობერტ ლევანდოვსკი მომავალი წლის ზაფხულში მიუნჰენის “ბაიერნის” დატოვებას გეგმავს.
“AS”-ის მტკიცებით, ფეხბურთელმა ცოტა ხნის წინ თავის აგენტ პინი ზაჰავის დაავალა, რომ მთავარი პრიორიტეტი მადრიდის “რეალში” შესაძლო ტრანსფერი ყოფილიყო.
ცნობილია რომ მადრიდში რობერტ ლევანდოვსკის მიმართ დადებითად არიან განწყობილნი, თუმცა “რეალი” მომავალი წლის ზაფხულში ნორვეგიელი ერლინგ ჰოლანდისთვის ბრძოლას გეგმავს, რომელზეც დიდი ალბათობით გრანდები ნადირობას მალე დაიწყებენ.
[sexy_author_bio]
