მთავარი არხის გენერალური დირექტორი ნიკა გვარამია სოციალურ ქსელში პრეზიდენტის საახალწლო მიმართვას ეხმაურება.
როგორც გვარამია წერს თანამდებობის პირების მიმართვას არასდროს უსმენს, ერთადერთი გამონაკლისი სალომე ზურაბიშვილის მიმართვა იყო.
“თანამდებობის პირების საახალწლო მიმართვებს არასდროს არ ვუსმენ. არასდროს. რ2ზეც და მთავარზეც ჩემი ინიციატივით არ გადიოდა/არ გადის არც ერთი ამგვარი მილოცვა, მეორე დღეს შუქდება. მაგრამ იმ მეორე დღესაც არ ვუსმენ.
პირველად ცხოვრებაში, დავჯექი ახლა და ვუსმინე პრეზიდენტის საახალწლო მიმართვას. ხაზს ვუსვამ, პირველად ცხოვრებაში და ისიც სალომე ზურაბიშვილს.
დიახ: დავჯექი, ვუსმინე სრულად და ყურადღებით. ვუსმინე და ყბა ახლაც ჩამომვარდნილი მაქვს. არ მოგეჩვენათ, მე, ნიკა გვარამიას, სალომე ზურაბიშვილის მიმართვით, ყბა ჩამომივარდა და ჯერაც ვერ გავისწორე”.
