ყაზახეთში 10 იანვარი ეროვნული გლოვის დღედ გამოცხადდა. ამის შესახებ გადაწყვეტილება ქყვეყნის პრეზიდეტმა ყასიმ-ჟომართ თოყაევმა მიიღო.
თოყაევის პრესმდივნის, ბერიკ უალის განცხადებით, შესაბამისი გადაწყვეტილება პრეზიდენტმა ქვეყნის რამდენიმე რეგიონში განვითარებული ტრაგიკული მოვლენების შედეგად მრავალრიცხოვანი ადამიანური მსხვერპლის გამო მიიღო.
“მრავალრიცხოვანი მსხვერპლის გამო, რომელიც ყაზახეთის სხვადასხვა რეგიონში მომხდარმა ტრაგიკულმა მოვლენებმა გამოიწვია, 2022 წლის 10 იანვარი ეროვნული გლოვის დღედ გამოცხადდა”, – ნათქვამია პრესმდივნის მიერ სოციალური მედიით გავრცელებულ განცხადებაში.
როგორც ადგილობრივი მედია წერს, ყაზახეთის შსს-ს ინფორმაციაზე დაყრდნობით წერს, მასობრივი არეულობის შედეგად ქვეყანაში 18 სამართალდამცველი გარდაიცვალა, 700 – ზე მეტი პოლიციელი და სამხედრო მოსამსახურე კი დაშავდა.
ყაზახეთის პრეზიდენტის, ყასიმ-ჟომართ თოყაევის განკარგულებით, შეიარაღებულ ძალებს უფლება აქვთ „ტერორისტებს“ ცეცხლი გაფრთხილების გარეშე გაუხსნან.
მისი თქმით, ხელისუფლება მკვლელებთან მოლაპარაკებებს არ აპირებს.
,,ალმათიში „ბანდიტებისა და ტერორისტების ხელით“ დაშავდა და გარდაიცვალა ასობით სამოქალაქო პირი და სამხედრო. ხელისუფლება მკვლელებთან მოლაპარაკებებს არ აპირებს.
შეიარაღებულ ძალებს უფლება აქვთ „ტერორისტებს“ ცეცხლი გაფრთხილების გარეშე გაუხსნან.“ – განაცხადა პრეზიდენტმა
მასობრივი არეულობის ფონზე, ყაზახეთის ხელისუფლებამ ქვეყნის მთელ ტერიტორიაზე საგანგებო მდგომარეობა გამოაცხადა. 5 იანვარს, სომხეთის პრემიერ-მინისტრმა, ნიკოლ ფაშინიანმა განაცხადა, რომ კოლექტიური უსაფრთხოების ხელშეკრულების ორგანიზაციის საბჭომ გადაწყვეტილება მიიღო, ყაზახეთში კოლექტიური სამშვიდობო ძალები გააგზავნოს.
6 იანვარს, რუსეთმა ყაზახეთში სამხედრო ძალების გადასროლა დაიწყო. კოლექტიური სამშვიდობო ძალების კონტინგენტში რუსეთის, ბელარუსის, სომხეთის, ტაჯიკეთისა და ყირგიზეთის დანაყოფები შედიან.
ცნობისთვის, პროტესტი მანგისტაუს რეგიონში საწვავის ფასის ზრდის გამო 2 იანვარს დაიწყო, მოგვიანებით კი თითქმის მთელი ქვეყანა მოიცვა. ისინი თავდაპირველად ფასის დაწევას ითხოვდნენ, შემდეგ – მთავრობის გადადგომას.
ხელისუფლებამ პირველი იანვრიდან 1 ლიტრი თხევადი აირის ფასი 60 ტენგედან 120-მდე გაზარდა. გამოსვლების შემდეგ სამთავრობო კომისია მომიტინგეებს გაზის ფასის შემცირებას დაჰპირდა. მოლაპარაკებების შედეგად მათ თქვეს, რომ 1 ლიტრის ფასი 50 ტენგე იქნება.
[sexy_author_bio]
