ოზურგეთის მუნიციპალიტეტში, ელექტროხაზების დაცვის ზონაში, კომპანია “ენერგო პრო ჯორჯიას” მიერ, კვლავ ხდება კერძო საკუთრებაში არსებულ ნაკვეთებში ხეების გადაბელვა თუ მოჭრა.
ასეთ ნაბიჯს ახლავს მიწის მფლობელთა გულისწყრომა და პროტესტი, რის გამოც მოქალაქეები ხშირად “გურია ნიუსის” რედაქციასაც მომართავენ.
“გურია ნიუსს” არაერთხელ აქვს მსგავსი ფაქტები გაშუქებული. ასე მოხდა ამჯერადაც. სოფელ ლიხაურში, სააგარაკე სახლის მფლობელმა ჯაჯანიძეების ოჯახმა მოგვმართა. ეკა ცინცაძე, კოტე ჯაჯანიძის მეუღლე, აღელვებული გვესაუბრა:
_ ჩვენ ბათუმში ვცხოვრობთ. სოფელ ლიხაურში გვაქვს აგარაკი. ეზოში მოგვიჭრეს თორმეტი ძირი აკაციის ხე. ჩვენთვის არაფერი უცნობებიათ. პირიქით, ახლოს მცხოვრებ მეზობელს რომ არ დაენახა და არ ეკითხა, რას შვებითო, ხეებსაც წაიღებდნენ. რატომ უნდა ხდებოდეს ასეთი ველური ფორმით ადამიანის საკუთრებაში შეჭრა და ამხელა ზარალის მიყენება? ნუთუ, ამ კომუნიკაციის საუკუნეში, შეუძლებელია, ერთი სატელეფონო ზარით ან მეზობლების მეშვეობით, შეგვატყობინონ, რომ ეზოში ჩადიან და ხეებს ჭრიან?! ახლა იქ ღობეც გაფუჭდა. აქეთ დაგვიწყეს დავა, ნაკვეთი უკანონოდ გაქვთო, ამ ადგილზე არ უნდა გქონდეთო. ჩემი მამამთილის სახელზეა გაფორმებული ეს ნაკვეთი. არის ჩვენი საკუთრება. ახლა, თურმე, ჩვენი არ ყოფილა. განუკითხაობაა თუ რა?! _ ამბობს ქალბატონი და როგორც თავად თქვა, აპირებს, ყველა კანონიერი გზით იბრძოლოს საკუთარი უფლებების დასაცავად.
ეკა ცინცაძემ გამოთქვა მზადყოფნა, თუკი აუცილებლობა იქნებოდა, მისი ოჯახი არ იქნებოდა და არ იქნება ხეების მოჭრის ან გადაბელვის წინააღმდეგი, ოღონდ თავად ინფორმირებული უნდა ყოფილიყვნენ.
_ განა, ჩვენ არ გადავბელავდით ან არ მოვჭრიდით, თუ საჭიროა? 12 ძირი ხე მომიჭრეს. წაქცეულია და ჩატეხილია ღობე. როგორ არ აღშფოთდები ადამიანი, როცა გაიგებ, თან შემთხვევით, რომ ეზოში შეიჭრნენ და ძირში მოჭრეს ამდენი ხე?! _ გვითხრა მან.
“ენერგო პრო ჯორჯიას” ოზურგეთის ოფისის მენეჯერმა, გია ნაკაიძემ გვიპასუხა, რომ ელექტროენერგიის მიწოდება რომ არ შეფერხდეს და უბედური შემთხვევა რომ არ მოხდეს, მყისიერად ახდენენ ხეების მოჭრას. კონკრეტულ ფაქტზე პასუხის გასაცემად კი, გვითხრა, კომპანიის პრესსამსახურის წარმომადგენელს, ბექა რომანაძეს დავკავშირებოდით.
ასეთ ფაქტებზე “გურია ნიუსი” არაერთხელ წერდა _ მოსახლეობის წარმომადგენლებში, ზოგჯერ მარტოხელა მოხუცებისგან ისმის საყვედურები, რომ დაუკითხავად შევიდნენ საკარმიდამო ნაკვეთებში, საუკეთესო ხეხილოვნები მოუჭრეს და ასე დაყრილი დაუტოვეს. ერთი მათგანია სოფელ შემოქმედში მცხოვრები, მარტოხელა პენსიონერის, შორენა სიმონიშვილის ოჯახი, რომლის დაზარალების საკითხს, უახლოეს პერიოდში, ენერგო ომბუდსმენი შეისწავლის.
ჯაჯანიძების ოჯახიც აპირებს, მიმართონ ენერგო ომბუდსმენს:
_ აუცილებლად მივმართავთ ენერგოომბუდსმენს. ჩვენ ყველამ უნდა დაგვიჭიროს მხარი და ასეთი განუკითხაობა უნდა დამთავრდეს. ელემენტარული პასუხისმგებლობა მაინც უნდა გამოიჩინონ ენერგოკომპანიის წარმომადგენლებმა და ადამიანებს, კერძო მესაკუთრეებს, ერთი სატელეფონო ზარით მაინც შეატყობინონ, რომ მათ ეზოებში ხეების მოჭრას აპირებენ. საოცარია, რაზე ვსაუბრობთ ოცდამეერთე საუკუნეში, _ ამბობენ ისინი.
“გურია ნიუსი”, როგორც კომპანიის ოზურგეთის სერვისცენტრის მენეჯერმა, გია ნაკაიძემ გვითხრა, ბექა რომანაძეს ესაუბრა.
რომანაძემ გვთხოვა, გადაგვეგზავნა მოჭრილი ხეების ფოტოები, მალე კი ასეთი პასუხი მოგვწერა:
“აღნიშნულ საკითხზე კომენტარი “ენერგო პრო ჯორჯიამ” არაერთხელ გააკეთა. ოზურგეთის მუნიციპალიტეტში, სოფელ ლიხაურში, სადაც მიმდინარეობს ხე-მცენარეების მოჭრა და ხშირ შემთხვევაში, გადაბელვა, გადის მაღალი ძაბვის სადენები. “ენერგო -პრო ჯორჯიას” ყველა საჭირო უწყებიდან აქვს შესაბამისი ნებართვა, სამუშაოების გასახორციელებლად. ამ ეტაპზე მიმდინარეობს ისეთი ხე-მცენარეების მოჭრა და გადაბელვა, რომელიც მდებარეობს სადენის დაცვის ზონაში, დაცვის ზონას შესაბამისი დადგენილება განსაზღვრავს. იმისთვის, რომ ელეტროენერგიის მიწოდება არ შეფერხდეს, აღნიშნული სამუშაოების გახორციელება აუცილებელია. ასევე, მთავარია, ადამიანის სიცოცხლეს არ შეექმნას საფრთხე”.
ბექა რომანაძემ ხაზგასმით აღნიშნა, რომ ელექტროენერგიის გათიშვის მიზეზი, უმეტესად, სწორედ ხე-მცენარეებია:
“აღსანიშნავია, რომ ავარიული გათიშვების 50% უკავშირდება ხე-მცენარეების მიერ გამოწვეულ დაბრკოლებებს. საჰაერო ხაზების დაცვის ზონებში საერთოდ არ უნდა არსებობდეს ნარგავები. აღნიშნული წარმოადგენს მუდმივ პრობლემას, რაც იწვევს ავარიებს და ქმნის უსაფრთხოების პრობლემას”, _ გვითხრა მან.
ჩვენს კითხვაზე, ეს ხეები, რომლის ფოტოებიც წარმოვადგინეთ, გადაბელილი კი არ არის, ძირშია მოჭრილი და რატომ საუბრობს მხოლოდ გადაბელვაზე, გვითხრა, რომ საჭიროების შემთხვევაში, ხეები ძირში უნდა მოიჭრას. რაც შეეხება სხვის საკარმიდამოში შესვლას და ხეების მოჭრას მაშინ, როცა პატრონი სახლში არ არის, რომანაძე ამბობს, რომ ყველას წინასწარ ეგზავნება შეტყობინება, შემდეგ კი ნებისმიერ შემთხვევაში უფლება აქვთ, შევიდნენ ეზოში და მოჭრან ხეები, რომელიც საფრთხეს უქმნის ელექტროგადამცემი ხაზების უსაფრთხო ფუნქციონირებას.
[sexy_author_bio]
