გუშინ პეკინში მიმდინარე ოლიმპიურ თამაშებზე ფიგურულ ციგურაობაში ვაჟებმა თავისუფალი პროგრამით იასპარეზეს. ქართველი მორის ყვითელაშვილი მოკლე პროგრამით გამოსვლის შემდეგ 97.98 ქულით მეხუთე ადგილზე იმყოფებოდა.
თავისუფალ პროგრამაში მორისმა მსაჯებისგან 170.64 ქულა დაიმსახურა (მე-11 შედეგი), ორი გამოსვლის ჯამში 268.62 ქალა დააგროვა და ოლიმპიადა მე-10 ადგილზე დაასრულა.
გუშინ ამერიკული გამოცემა „The Advance-Titan” კლუბი „მილუოკის“ ქართველ მოთამაშე სანდრო მამუკელაშვილს ესაუბრა.
22 წლის მამუკელაშვილი „ბაქსში“ საშუალოდ მხოლოდ 9:48 წუთს თამაშობს და 3.2 ქულას, 1.9 მოხსნასა და 0.5 გადაცემას აკეთებს. NBA-ის ჩემპიონ გუნდში თავის დამკვიდრება ახალბედას ჯერჯერობით უჭირს, ამიტომ საჭირო სათამაშო პრაქტიკას „ვისკონსინ ჰერდში“ იღებს, რომელიც პატარა, 70-ათასიან ქალაქ ოშკოშში თამაშობს.
„საქართველოდან NBA-ში მოხვედრა ძნელია, ჩვენ სულ რამდენიმე ასეთი კალათბურთელი გვყავს. ოჯახიდან წასვლა ადრევე მომიწია, ბევრიც ვიშრომე და ვიბრძოლე, თუმცა შუაგზაზეც არ ვარ ჩემს მიზნამდე. ჯერ კიდევ ბევრი უნდა ვისწავლო, ვიშრომო და დავამტკიცო“, – აცხადებს ქართველი კალათბურთელი.
„მილუოკიში“ თამაში საოცარია. მეგობრებს ვეუბნებოდი, რომ იმედი მქონდა, ერთ დღესაც „ბაქსში“ ვითამაშებდი. საოცარია, 2-3 წელიწადში, როგორ სწრაფად განვითარდა მოვლენები და ახლა მართლა „ბაქსში“ ვთამაშობ და იმედი მაქვს, რომ იქ ძალიან დიდხანს დავრჩები. ხანდახან თავს ახალბედად გრძნობ, მაგრამ ვიცი, რომ „მილუოკიში“ თამაში დიდი შესაძლებლობაა. ხანდახან გინდა, რომ არ აურიო თამაშისას, მაგრამ რაღაცები თავისით ხდება. უნდა იყო მშვიდი, რადგან ბევრი რამ მოხდება და ყველაფერი მომავალი წარმატებისთვის უნდა გამოიყენო”.
გუშინ „ფიფამ“ მიმდინარე წლის პირველი რეიტინგი გამოაქვეყნა, რომელშიც საქართველოს ნაკრები ერთი პოზიციით დაქვეითდა.
ვილი სანიოლის გუნდი 1269 ქულით 86-ე ადგილზეა. აღსანიშნავია, რომ საქართველოს იგივე რაოდენობის ქულები აქვს, რაც დეკემბრის რეიტინგში ჰქონდა, მაგრამ აფრიკის თასის გამო სხვა გუნდებმა მოახერხეს ქულების დაგროვება. ამრიგად, საქართველოს ნაკრებმა 85-ე საფეხურიდან 86-ეზე გადაინაცვლა.
გუშინ თურქეთში, წინასასეზონო შეკრებაზე მყოფი თბილისის „დინამო“ ამხანაგურად მოსკოველ თანაკლუბელებს დაუპირისპირდა და ანგარიშით 1:0 დაამარცხა.
მატჩის ბედი ერთადერთმა გოლმა გადაწყვიტა, რომელიც გიორგი გაბედავასა და თორნიკე კირკიტაძის კარგ კომბინაციას მოჰყვა, რის შემდეგაც, უსმანე კამარამ მოსკოველთა ცარიელი კარი დალაშქრა და ანგარიში გახსნა. ეს მე-20 წუთზე მოხდა. ამის შემდეგ სახიფათო მომენტები ორივე გუნდს ჰქონდა, თუმცა, გოლი აღარ გასულა და თბილისელებმა 1:0 მოიგეს.
მომავალ კვირას ევროპის კონტინენტზე ფეხბურთში ჩემპიონთა ლიგის შეხვედრები განახლდება. ესპანური გამოცემა „მარკას“ მტკიცებით ქარიმ ბენზემა შეიძლება მადრიდის „რეალს“ ფრანგულ „პსჟ“-სთან ჩემპიონთა ლიგის პირველ მერვედფინალურ მატჩში ვერ დაეხმაროს.
ბენზემამ ბარძაყის ტრავმა კი მოირჩინა, მაგრამ ინდივიდუალურად ვარჯიშობს და ფორმაში არ არის. ბენზემას 12 თებერვალს „ვილიარეალთან“ თამაში პრაქტიკულად გამორიცხულია და ნაკლებად სავარაუდოა პსჟ-სთან მატჩისათვის მწყობრში ჩადგეს. მიმდინარე სეზონში მან 28 შეხვედრაში 24 გოლი გაიტანა და 9 საგოლე გადაცემა გააკეთა.
„პსჟ“ – „რეალის“ პირველი დაპირისპირება 15 თებერვალს გაიმართება.
„მანჩესტერ იუნაიტედი“ კი გამდიდრდა. გუშინ ბრიტანულ მასმედიაში გავრცელდა ცნობა რომ კლუბმა ნიუ-იორკში დაფუძნებულ ბლოკჩეინ პლატფორმასთან „Tezos“-თან მრავალწლიანი კონტრაქტი გააფორმა და უახლოეს მომავალში გუნდის სავარჯიშო ფორმაზე კომპანიის ემბლემა გამოჩნდება.
ბრიტანულმა კლუბმა გარიგების დეტალები არ გაასაჯაროვა. თუმცა „BBC“-ის მიერ მოპოვებული ინფორმაციის თანახმად, „იუნაიტედი“ წელიწადში დაახლოებით 24 მილიონ ფუნტს მიიღებს.
წინა სპონსორი, რომლის სახელიც გუნდის სავარჯიშო კომპლექტზე იყო, ამერიკული სადაზღვევო კომპანია „Aon“-ი გახლდათ. კონტრაქტი, რომელიც 8 წლით მოქმედებდა, გასული სეზონის ბოლოს ამოიწურა. კლუბმა ამ დროის განმავლობაში 120 მილიონი ფუნტი მიიღო.
[sexy_author_bio]
