“ეპიდმდგომარეობა ოზურგეთში გვაქვს საყურადღებო”

ოზურგეთში კოვიდინფიცირების 380 ახალი შემთხვევა დაფიქსირდა. ამის შესახებ “გურია ნიუსს” ოზურგეთის საზოგადოებრივი ჯანდაცვის ცენტრში განუცხადეს.

ჯანდაცვის ცენტრის ეპიდემიოლოგი ელზა სიმონიშვილი მდგომარეობას საყურადღებოს უწოდებს და ჩვენთან საუბრის დროს ყურადღებას რისკჯგუფების ბუსტერდოზით აცრის აუცილებლობაზე ამახვილებს.

“ეპიდმდგომარეობა ოზურგეთში გვაქვს საყურადღებო, იმის გამო რომ მატულობს ინფიცირების შემთხვევები. გუშინდელი მაჩვენებელი გვქონდა შედარებით ნაკლები, მაგრამ ეს გამოწვეული იყო შაბათ-კვირით, რადგან ამ დღეებში პსრ ტესტი არ კეთდება. გუშინდელი მონაცემები რაც დღეს დაიდო, არის საკმაოდ შთამბეჭდავი ციფრები. მომართვიანობა გაზრდილია, უმეტესად არის სიმპტომიანი პაციენტები. ძირითადად აქვთ გრიპის მსგავსი სიმპტომები, რაც დამახასიათებელია როგორც კორონასათვის, ასევე ომიკრონის შტამისთვის. ინფიცირების შემთხვევები ფიქსირდება ასევე მცირე ასაკის ბავშვებში. საყურადღებო არის ის რომ ძალიან სწრაფად გადამდებია. უმნიშვნელოვანესია რეგულაციის წესების დაცვა, პირადი ჰიგიენა, ნიღბის ტარება, სოციალური დისტანცირება. გარდა ამისა, დადგენილი ფაქტია უკვე მედიცინაში, რომ დაახლოებით 75%-ით იცავს ბუსტერ დოზა რეინფიცირებისგან და ომიკრონისგან, ამიტომ კიდევ ერთხელ სასურველია რომ ვაქცინაციის ტემპი  იყოს უფრო მაღალი ზოგადად მოსახლეობაში და რისკჯგუფებში, როგორიცაა ქრონიკული დაავადების მქონე პირები, ასაკიანები, რადგან უფრო მოწყვლადები არიან. ინფიცირების შემთხვევების ისევ მაღალ ციფრებს ველოდებით ამ დღეების განმავლობაში და იმედი გვაქვს, რომ თვის ბოლოს დაიწყებს კლებას”,_ ამბობს სიმონიშვილი.

ოზურგეთში სულ დაფიქსირებულია ინფიცირების 17697 შემთხვევა, გამოჯანმრთელებულია 15698 შემთხვევა, გარდაცვლილია 96. ამ დროისთვის აქტიურია ინფიცირების 1903 შემთხვევა, საიდანაც სტაციონარში 106, საკარანტინე სივრცეში 181, ბინაზე კი 1616 პაციენტი მკურნალობს. იზოლაციაშია 621.

[sexy_author_bio]