საქართველოს ყოფილი პრეზიდენტის მიხეილ სააკაშვილის განცხადებით, დღეიდან უვადო შიმშილობას აცხადებს, _ იუწყება 1tv.ge.
„მე ვაცხადებ დღეიდან უვადო შიმშილობას, სრულს. ეს არის შიმშილობა, რეაქცია იმაზე, როგორც გვეპყრობა რეჟიმი მე და ჩემს ხალხს, ჩვენს ხალხს. აქ ჩემი ჯანმრთელობა არის მეასე ხარისხოვანი. ნახოს ყველამ, რას ნიშნავს სამშობლოს სიყვარული. ნახოს ყველამ, რას ნიშნავს ამბიციები, თუ საკუთარი ქვეყნის უფრო მაღლა დაყენება კომფორტზე და ყველაფერზე. მხოლოდ სულელებს შეუძლიათ, დაიჯერონ ის ბრალდებები, რომლებიც მე მაქვს წაყენებული. დაწყებული კოსტუმების საქმიდან, შეწყალება და ა.შ. ამ საქმეს რაც ეხება, მთელი ფაბულა ამ საქმისა არის ძირითადი ჩვენებები ნინო ბურჯანაძის, რომელიც იძახის, რომ მე მაქვს პოლიტიკური პასუხისმგებლობა, ამას მე თვითონ ვიზიარებდი და არჩევნები ჩავატარე, ყველაზე მაღალი ვერდიქტი მივიღე ქართველი ხალხის. მეორე – გენერალი გოგავა, რომელიც იძახის, რომ ყველაფერი სწორად გავაკეთე და ხელახლა რომ გაგვეკეთებინა, ესე უნდა გაგვეკეთებინა, ყოველ შემთხვევაში, ტელევიზორში ასე იძახის და მესამე – არის ლაპარაკი იმაზე, რომ მართალია, სააკაშვილს პირდაპირ არავისთვის არაფერი განკარგულებები არ მიუცია, მაგრამ ვანო მერაბიშვილს ყურში ურჩურჩულებდა, მართალია, ვანო მერაბიშვილი ამას უარყოფს, მაგრამ ვიღაცა სამხედროები, თუ პოლიცილები დაგვიჯილდოვებია ამის შემდეგ და ეს არის დამამტკიცებელი“, _ განაცხადა სააკაშვილმა დღევანდელ სასამართლო პროცესზე.
მან კიდევ ერთხელ განმარტა, თუ რას უკავშირდება შიმშილობის დაწყება.
„ჩემი მოთხოვნაა ადეკვატური ჯანმრთელობის დაცვის განხორციელება, როგორც ეს არის მოთხოვნილი სახალხო დამცველის კონსილიუმის და ცენტრ „ემპათიას“ მიერ. დარწმუნებული ვარ, საერთაშორისო ექსპერტების მიერ, რომლებიც რომ შემოეშვათ, იტყოდნენ ზუსტად იგივეს. ეს არის კონკრეტული მოთხოვნა. ეს არ არის ის, რომ მორიგი ვიღაც საცოდავი, დაშინებული ექიმი შემომიყვანონ და მერე ქმარი მოუხსნან, ან შვილი ინსტიტუტიდან გამოუშვან, ან კიდევ სხვადასხვანაირი ხრიკები, რაც უკვე კარგად ავითვისე სისტემის მაფიოზურ საქართველოში, ეს არ გამოუვათ“, _ აღნიშნა სააკაშვილმა.
