ლანჩხუთის საკრებულოს სხდომაზე, სადაც მუნიციპალიტეტის სარეზერვო ფონდიდან უკრაინელთა დასახმარებლად 15 ათასი ლარის გამოყოფას დეპუტატებმა ერთსულოვნად დაუჭირეს მხარი, ენმ-ის წევრმა გია გოგუაძემ ლანჩხუთში ალტ-ინფოს ოფისის შესაძლო გახსნაზე გააკეთა განცხადება.
“მაქვს ინფორმაცია რომ ალტ- ინფოს წარმომადგენლები საკუთარი პატრიის ოფისისთვის ლანჩხუთში ფართს ეძებენ. მესტიიდან, ამბროლაურიდან ისინი გამოაძევეს, არც ჩვენ უნდა დავუშვათ მათი ოფისის გახსნა. ამის სხვადასხვა ბერკეტი აქვს ხელისუფლებას და შეუძლია, გამოიყენოს. როცა ჩვენი ოფისის კარი დილით იღება, პოლიციის მანქანა ყოველთვის ადგილზეა გასაკონტროლებლად. იყო შემთხვევები, როცა შეთანხმების მიუხედავად, მეპატრონეებმა უარი გვითხრეს ფართის მოქირავებაზე”, _თქვა გოგუაძემ.
მისივე თქმით, შექმნილ ვითარებაში აუცილებელია, გაკონტროლდეს ყველა ის პირი, ვინც უცხოეთიდან შემოვა მუნიციპალიტეტის ტერიტორიაზე.
“ვრცელდება ინფორმაციები, რომ ბოლო დღეებში რუსეთისა და ბელორუსიის მოქალაქეები მასობრივად შემოდიან საქართველოს ტერიტორიაზე. იმისთვის, რომ შემდეგ გარკვეული უხერხულობები რომ არ წარმოიშვას, უმჯობესია შეიქმნას სპეციალური ბაზა და გაკონტროლდეს მათი ეს შემოსვლა მყნიციპალიტეტის ტერიტორიაზე”, _ დასძინა გოგუაძემ.
