სამტრედიელმა ზაზა სვანაძემ დედას დედის დღის მილოცვასთან ერთად უკრაინის ომში გამგზავრება აუწყა, _ ამის შესახებ ზაზა სვანაძე საკუთარ ფეისბუქ გვერდზე წერს.
“იმაზე მეტად, თუ რა მელოდება უკრაინაში, ვფიქრობ, როგორ “ვახარო” ჩემი იქ გამგზავრების ნიუსი დედაჩემს.. წარმოვიდგინე მისი ხმა, ჩამორეკვა ბელგიაში მცხოვრებ ქართველებთან, ( იქნებ გადააფიქრებინოთ ტექსტებით ) ერთ ვარიანტად განვიხილე ვერსია, სტატუსიდან გაეგო და შემდეგი მინიმუმ 24 საათის განმავლობაში ტელეფონი რომ გამომერთო, მაგრამ ისიც წარმოვიდგინე ამ ვერსიის ფარგლებში, რომ ჩემი ფოტო-პლაკატებით / იძებნება / მთელი ევროპა აჭრელდებოდა… ძმაკაცთან მოვწრუპე ( ომში მიდიხარ არ დაგლოცოო?
სითამამე მომეძალა და აქაური დროით 12 ზე დავურეკე, ( თბილისში ღამის სამია ) მეთქი გაემზადე, კიდევ რა გააკეთეო ? მთქნარებით მითხრა, არც ვაციე, არც ვაცხელე, კიევში მივდივარ-მეთქი და ტელეფონი ოდნავ გავწიე – შესაბამისი რეაქციის მოლოდინში.
– ვისთან ერთადო? მშვიდად მითხრა, მეთქი კიევში მივდივარ, ( ვიფიქრე ნამძინარევზე ვერ გაიგო და სხვა ქალაქში აერია – მაგალითად გერმანიის კიოლნში ) როდის ? ასევე მშვიდად კიევში, უკრაინაში, ვვარაუდობ, ჩემი ხმა არ ესმის. მალე დაბრუნდები ბელგიაში ? _ რეაქცია რატომ არ გაქვს-მეთქი? მეტი რაღა უნდა მანერვიულო, რაც აქამდე მანერვიულეო.
ფოტო სტატუსთან პირდაპირ კავშირში არ არის, ( გარდა იმისა, რომ ამ ტელეფონში სხვა ერთობლივი ფოტო ვერ ვიპოვე ) აბჯარასხმულს შემთხვევით გამახსენდა, რომ დედის დღეა და ჩვენი ბოლო კონტაქტი გავიხსენე. ცუდი სიტყვაა ბოლო, იქ, სადაც დედაშვილობაა. დედებო, გილოცავთ თქვენს დღეს!”
“გურია ნიუსი” ზაზა სვანაძეს დაუკავშირდა.
“ჩემი უკრაინაში გამგზავრება არ ემსახურება ჟურნალისტურ ექსტრიმს, ადრენალინს. კი, გარკვეულწილად, შეიძლება, ესეცაა, თუმცა, გარკვეულწილად, ეს არის ჩემი, როგორც ევროპაში მცხოვრების პასუხისმგებლობა ვიდგე ფრონტის წინა ხაზზე, თუნდაც ჰუმანიტარული ან საინფორმაციო მისიით, ფრონტის ხაზზე, რომლის მეორე მხარეს ველური ურდოები დანარჩენ სამყაროზე რევანშს ცდილობენ. პუტინი დაასრულებს ისე, როგორადაც ასრულებენ დიქტატორები.
ევროპაში ორი წლის წინ, 2020 წლის თებერვალში ჩამოვედი, როგორც თავშესაფრის მაძიებელი პირი. ვინაიდან საქართველოში ჩემი საქმიანობა მედიასთან და სამოქალაქო აქტივიზმთან იყო დაკავშირებული, რამოდენიმეჯერ დამაკავეს, ჩემი პოლიტიკური შეხედულებების გამო და ეს სუბიექტური შეფასება არ არის. ბრიუსელის კომისარიატმა, ჩასვლიდან ერთი წლის თავზე, ჩემს მიერ მიწოდებული მასალების ( საგაზეთო სტატიები და ვიდეოკადრები, როგორც მტკიცებულებები წარვუდგინე ) მომანიჭეს პოლიტიკური დევნილის სტატუსი. ბელგიაში ცხოვრების ორი წლის თავზე, დასავლეთ ევროპის ქვეყნებში ვმოგზაურობ, თუმცა აღმოსავლეთ ევროპის მიმართულებით არ წამოვსულვარ. ახლა უკრაინაში ომია – ცივილიზებული სამყარო და პირველ რიგში ევროკავშირის წევრი სახელმწიფოები, ამ ომში არ აპირებენ უკრაინის რუსეთის პირისპირ მარტო შეტოვებას – ეს არის კონტინენტური ომი, ორ ცივილიზაციას შორის და არ მსურს ამ ომში განზე ვიდგე, მაშინ როდესაც მაქვს შანსი, ჩემი ქვეყნის მოსახლეობის, მიუკერძოებლად ინფორმირება მოვახდინო. იმ პერიოდის განმავლობაში, რაც ბელგიაში ვცხოვრობ, არაერთი რეპორტაჟი გადავაგზავნე, რამდენიმე გამოცემისთვის, თუმცა, აქამდე ომი არასდროს გამიშუქებია.
მაშინ, როდესაც, თქვენთან ინტერვიუს ვწერ, პოლონეთის დედაქალაქიდან, დაახლოებით, 80 კმ ში ვიმყოფები.
ხუთი წუთის წინ, გზის მეორე მხარეს ტანკებმა ჩაიარეს.
შემიძლია ექსკლუზიური ფოტოც მოგაწოდოთ. რუსი ოკუპანტების მიერ უკრაინაში დატრიალებული ომის სურნელი მეზობელ პოლონეთში შეიგრძნობა”, _ გვითხრა ზაზა სვანაძემ.
