ისტორიკოსი, მეცნიერი მანანა ლომაძე ოზურგეთის ისტორიულ მუზეუმში 1976 წლიდან მუშაობს.
ის ეთნოგრაფიისა და ხელოვნების განყოფილებაში, ჯერ მეცნიერ-თანამშრომლის მოვალეობას ასრულებდა. შემდგ კი უფროს-მეცნიერ თანამშრომლად გადაიყვანეს. ჩაიბარა რა არქეოლოგიის განყოფილება, იმ დღიდან მოყოლებული, მისი ინიციატივით მნიშვნელოვნად შეივსო მუზეუმის ფონდები. განსაკუთრებით საყურადღებოა გრიგოლეთის ბრინჯაოს ნივთების კოლექცია და ასევე, ბრინჯაოს ცულების კოლექცია, რომლებიც მოქალაქეებმა გადასცეს.
„ლაითურის განძად“ წოდებული კოლექციის მუზეუმისთვის გადაცემაში, ქალბატონ მანანას ლომი წვლილი მიუძღვის. ლაითურელი მხარეთმცოდნე კორესპონდენტის, კამო ვარდანიანის დახმარებით გადაცემული ეს ბრინჯაოს განძი, რიგით მეთხუთმეტეა (გურიის ტერიტორიაზე 14 ბრინჯაოს განძია აღმოჩენილი).
თავდადებული, პროფესიის და სამშობლოს სიყვარულით ანთებული ქალბატონი 2007 წელს მუზეუმის ფონდების მთავარ მცველად დაინიშნა.
იმ დღიდან მოყოლებული დღემდე ამ თანამდებობაზეა და აუწონელი შრომის და ჯაფის ფასად ეწევა ფონდების დაცვა-აღრიცხვას, მოწესრიგებას და პოპულარიზაციას.
რაც შეეხება ამა თუ იმ ხანის ძეგლების კვლევას, ის ისეა დახელოვნებული, რომ უძველესი ხანის ძეგლებსაც არ ეპუება და ხშირად გამოაქვს სამეცნიერო კონფერენციებზე. ერთ-ერთი საუკეთესოა „გურიის ქვის ხანის ძეგლები“, რომელიც 2008 წელს ოზურგეთის საერთაშორისო კონფერენციაზე გამოიტანა და როგორც ქართველი, ისე უცხოელი მეცნიერების მოწონება დაიმსახურა.
მანანა ლომაძემ დაწერა მუზეუმის ისტორია.
ქალბატონი მანანას პროექტით შეიქმნა სოფელ დვაბზუში, შალვა რადიანის სახლ-მუზეუმის ბაზაზე, ოზურგეთის ისტორიული მუზეუმის ფილიალი-დვაბზუს ეთნოგრაფიული მუზეუმი. მისი ინიციატივითა და თავგამოდებული მოწადინებით აღდგა ძველი ოზურგეთის მივიწყებული დღესასწაული „ალეგრობა“, რაც ბევრმა არც კი იცის.
დღეისთვის დასაბეჭდად ჩაშვებულია მისი წიგნი: „ ეკატერინე გურიელის მარტვილობა“. ხოლო წიგნი: „გურიის ახალი დიდგორი“, დასაბეჭდადაა გამზადებული.
დაწყებული აქვს მუშაობა თემაზე _ „გურულების გაბნეული საფლავები“.
ქალბატონ მანანა ლომაძეს თავდადებული და დაუღალავი სამეცნიერო შრომისთვის არ აკლია სიგელები, მადლობები თუ ღირსების ორდენი.
ახლა ოცნებობს, რაც შეიძლება მალე მოეწყოს ახლად გარემონტებულ მუზეუმში საგამოფენო სივრცე. ასევე, მოხდეს ხელნაწერთა ფონდის გაციფრულება, რათა ადვილად ხელმისაწვდომი იყოს დაინტერესებულთათვის.
თუ როგორ ელოლიავებოდა თითოეულ ექსპონატს, როგორ დაინტერსებულია, მუზეუმმა იზრუნოს საგანმანათლებლო და შემეცნებით პროექტებზე არა მარტო სკოლის მოსწავლეებთან, არამედ მოზრდილებთან, სოციალურ, ინკლუზიურ ჯგუფებთან, თუნდაც პენსიონერებთან და ზოგადად, მუზეუმი იქცეს კულტურულ-საგანმანათლებლო კერად, მალე სრულად ვუამბობთ ჩვენს მკითხველებს.
დღეს კი, უნიჭიერეს ისტორიკოსს, ოზურგეთის ისტორიულ მუზეუმში რომ 45 წელი დაუღალავ შრომაში გალია, საუკეთესო იუბილე აქვს _ 70 წლის გახდა და ძველებური ენერგიით ზუსტად ისე გამოიყურება, როცა ამბობენ, ასაკი მხოლოდ რიცხვებიაო.
გაზაფხულის და ასევე, ისტორიის იუბილარს, წინ უამრავი სამეცნიერო საქმე ელოდება, რასაც თავისი მრავალმხრივი უნარების წყალობით, თავს ყოველთვის უნაკლოდ ართმევს და გვჯერა, ასე იქნება მომავალშიც!
„გურია ნიუსი“ დღეგრძელობას და კვლავ სამეცნიერო წარმატებებს უსურვებს ჩვენს მეგობარს, აქტიურ რესპონდენტს და ზოგჯერ კორესპონდენტსაც, ქალბატონ მანანა ლომაძეს!
