რუსეთის ფედერაციის მთავრობამ გამოაქვეყნა იმ უცხო სახელმწიფოებისა და ტერიტორიების სია, რომლებიც ჩადიან არამეგობრულ ქმედებებს რუსეთის, მისი კომპანიების და მოქალაქეების მიმართ. ინფორმაციას tass ავრცელებს.
შესაბამისი დოკუმენტი მინისტრთა კაბინეტმა უკვე დაამტკიცა, აღნიშნული სიიდან კი საქართველო ამოღებულია.
სიაში შედიან: აშშ, კანადა, ევროკავშირის ქვეყნები, დიდი ბრიტანეთი, უკრაინა, მონტენეგრო, შვეიცარია, ალბანეთი, ანდორა, ისლანდია, ლიხტენშტაინი, მონაკო, ნორვეგია, სან-მარინო, ჩრდილოეთი მაკედონია, იაპონია, სამხრეთ კორეა, ავსტრალია, მიკრონეზია, ახალი ზელანდია, სინგაპური და ტაივანი.
ოკუპანტი ქვეყნის მთავრობის განცხადებით, აღნიშნულმა ქვეყნებმა დააწესეს ან შეუერთდნენ რუსეთის წინააღმდეგ სანქციებს უკრაინაში რუსეთის შეიარაღებული ძალების „სპეციალური სამხედრო ოპერაციის“ დაწყების შემდეგ.
გარდა ამისა, რუსეთის მოქალაქეები და კომპანიები, თავად სახელმწიფო, მისი რეგიონები და მუნიციპალიტეტები, რომლებსაც აქვთ სავალუტო ვალდებულებები უცხოელი „არამეგობრული“ ქვეყნების წარმომადგენელი კრედიტორების მიმართ, მათ რუბლში გადახდას შეძლებენ. ახალი დროებითი პროცედურა ვრცელდება კრედიტებზე, რომელიც თვეში 10 მილიონ რუბლზე მეტ გადასახადს არ აღემატება.
როგორც გამოცემა წერს, სია დამტკიცდა, როგორც რუსეთის ფედერაციის პრეზიდენტის 2022 წლის 5 მარტის ბრძანებულების ნაწილი “გარკვეული უცხოელი კრედიტორების წინაშე ვალდებულებების შესრულების დროებითი პროცედურის შესახებ”
პრემიერ-მინისტრმა მიხაილ მიშუსტინმა ხელი მოაწერა დადგენილებას, რომელიც ადგენს სანქციების ქვეშ მყოფ უცხოურ კომპანიებთან ტრანზაქციების წესებს.
„რუსული კომპანიების ყველა ტრანზაქცია და ოპერაციები მოქალაქეებთან და ფირმებთან რუსეთის მიმართ არამეგობრული ქვეყნებიდან დამტკიცდება უცხოური ინვესტიციების კონტროლის სამთავრობო კომისიის მიერ“, – ნათქვამია მინისტრთა კაბინეტის განცხადებაში.
2021 წლის რუსეთის მიმართ „არამეგობრული“ ქვეყნების სიაში საქართველოც იყო, თუმცა წელს ოკუპანტებმა სიიდან „ამოგვშალეს“.
