რამდენიმე დღის წინ, ახლო წარსულში ცნობილმა ლიეტუველმა კალათბურთელმა არვიდას საბონისმა უკრაინაში რუსეთის აგრესიის წინააღმდეგ გაილაშქრა.
„უკრაინაში ომი რომ დაიწყო, სულ ტელევიზორის წინ ვიჯექი. ვინ იფიქრებდა, რომ ჩვენს დროში ეს შესაძლებელია. ომის დაწყებისთანავე ალექსანდრ ვოლკოვს კიევში დავუკავშირდი, მან კი ქალაქის დაბომბვის ამსახველი ვიდეოკადრები გამომიგზავნა. მასთან ხშირი ურთიერთობა მაქვს, რუსებს კი არ ველაპარაკები. ახლა ზოგიერთი რუსი ბოდიშს იხდის, უმეტესობა – დუმს. სხვას რას უნდა ველოდოთ მას შემდეგ, რაც ომის საწინააღმდეგო გამოსვლებისთვის 15-წლიანი პატიმრობა დააკანონეს. მათი პროპაგანდა გუშინ არ დაწყებულა. ჩვენ აღარასოდეს ვენდობით ამ მატყუარებს. ვითომ მშვიდობის მტრედები არიან და ამ დროს ბავშვებსა და მშვიდობიან მოსახლეობას ბომბავენ. მათთან კომუნიკაციის სურვილი საერთოდ არ მაქვს! სტატისტიკა აჩვენებს, რომ რუსეთში ხალხის 70% ომს უჭერს მხარს. რუსეთმა მთელ მსოფლიოს აჩვენა, რომ მისი ნდობა არ შეიძლება.
მთელი ცხოვრება მეგონა, რომ სპორტი პოლიტიკა არ არის. თუმცა, სამწუხაროდ, სპორტი ყოველთვის იყო, არის და იქნება პოლიტიკა. ამიტომ რუსული გუნდების ევროლიგიდან და სხვა ტურნირებიდან გაძევება სწორია. ძნელი სათქმელია, როდის დაბრუნდებიან, ვერ წარმომიდგენია, როგორ შეძლებენ უკრაინელები რუსებთან ერთად მომავალში თუნდაც სპორტულ ცხოვრებას“, – განაცხადა არვიდას საბონისმა.
გუშინ კიევის „დინამოს“ გულშემატკივართა დიდმა ჯგუფმა საგანგებო განცხადება გაავრცელა:
„დინამოს“ მფლობელები ძმები სურკისები ომის პირველივე დღეს უკრაინიდან გაემგზავრნენ და უკვე 19 დღეა, მათგან ერთი განცხადებაც კი არ მოგვისმენია, სადაც ისინი ქომაგებს, კიეველებსა თუ უკრაინელებს მიმართავდნენ. 23 თებერვალის შემდეგ მათგან არაფერი ისმის. კლუბის ფეხბურთელები ქალაქიდან განარიდეს, ლეგიონერებს კი წასვლის უფლება მისცეს. იძახიან, რომ ისინი არმიას ფინანსურად ეხმარებიან, თუმცა, ამის აფიშირებას არავინ ახდენს. გუშინ, გუნდის მთავარმამწვრთნელმა მირჩა ლუჩესკუმ ერთ-ერთ იტალიურ გაზეთს ინტერვიუ მისცა და განაცხადა, რომ უკრაინელები და რუსები ყოველთვის ძმებივით ცხოვრობდნენ, თითქოს ომი უკრაინაში მხოლოდ პოლიტიკური პრობლემაა და ხალხებს გასაყოფი არაფერი აქვთ. მეტიც, ის წინააღმდეგი ყოფილა, რომ რუსი სპორტსმენები საერთაშორისო შეჯიბრებებიდან ჩამოეცილებინათ.
ჩვენთვის, კიევის „დინამოს“ გულშმატკივრებისათვის ეს ამბები მოულოდნელობა ნამდვილად არ ყოფილა. უკვე რამდენიმე წელია ვცდილობდით ყველასთვის გაგვეგებინებინა, რომ სურკისები კლუბის სირცხვილია, ლუჩესკუ კი უნდა წავიდეს. იმედია, მათ ვინც არ გვიჯერებდა, დღეს მაინც აეხილათ თვალები“, – წერია გულშემატკივრების მიერ გავრცელებულ ოფიციალურ განცხადებაში.
ცნობილმა მოჭადრაკე გარი კასპაროვმა რუსეთის ამჟამინდელი ხელისუფლების წინააღმდეგ კიდევ ერთხელ გაილაშქრა:
„ბევრისგან მესმის, თუ როგორ დაისაჯნენ სანქციებით უბრალო რუსი ადამიანები, რომელთაც არაფერი დაუშავებიათ. და ეს ის ადამიანები არ არიან, რომლებიც აგრესორ ქვეყანას წარმოადგენენ? რა გააკეთეს მათ 22 წლის განმავლობაში, რაც რუსეთს ეს ურჩხული მართავს? უდანაშაულო ხალხი ახლა კიევსა და ხარკოვშია, რომელთაც თავზე ბომბები აცვივათ. ასე რომ, შეწყვიტეთ ისტერიკა და შეეგუეთ, რომ პასუხისგება მოგიწევთ და მხოლოდ ეს პერიოდი არა, კიდევ მრავალი წლის განმავლობაში. პუტინის სამხედრო მანქანის გაჩერების ერთადერთი შანსი სწორედ ფინანსური სანქციებია. არ იქნება ფული, არ იქნება პოლიცია, ვერ იქნებიან კადიროვის მსგავსი არსებები და გაჩერდება არმიაც, რომელიც ისედაც ერთ ადგილას არის გაჭედილი.
პუტინმა დაიჯერა, რომ მას ყველაფერი გაუვიდოდა. უკრაინასთან ომი სწორედ სრული დაუსჯელობის გამოძახილია. ის თვლიდა, რომ 2-3 დღეში კიევში შევიდოდა, იქ თავის მარიონეტს დასვამდა და შემდეგ ყველა მასთან მოსალაპარაკებლად გაიქცეოდა. მადლობა ღმერთს, უკრაინული არმიისა და უბრალო მოქალაქეების გმირობამ მას ამის საშუალება არ მისცა. უკრაინასთან ომში დამარცხება და რუსული ეკონომიკის ტოტალური დაქცევა – მხოლოდ ეს კომბინაცია მოგვცემს იმის შანსს, რომ რეჟიმი დაემხოს, რუსეთმა კი ამ საშინელი ორმოდან ამოსვლა მოახერხოს. ხელისუფლებაში პუტინის ყოფნის თითოეული დღე რუსეთს, როგორც ქვეყანასა და სახელმწიფოს, კიდევ უფრო აახლოვებს საფლავთან“.
დიდი ბრიტანეთის პრემიერ-მინისტრ ბორის ჯონსონის პრესსპიკერმა მოუწოდა ლონდონის „ჩელსის“ გულშემატკივრებს, შეწყვიტონ რომან აბრამოვიჩის სახელის სკანდირება საფეხბურთო მატჩების დროს.
„გასაგებია, რომ ადამიანებს აქვთ რაღაც გრძნობები, მაგრამ ყველა უნდა ხვდებოდეს, რომ ასეთ სიტუაციაში აბრამოვიჩის სახელის სკანდირება უადგილოა. გულშემატკივრებს შეუძლიათ, გუნდის მიმართ მხარდაჭერა სხვაგვარად გამოხატონ.
რაც შეეხება „ჩელსის“ გაყიდვას, ჩვენ განვიხილავთ განაცხადს ლიცენზიაზე და სწორ გამოსავალს ვიპოვნით“.
ავტორი: გიორგი გაჩეჩილაძე
