გუშინ იტალიურმა გამოცემამ „Tuttomercato“ საინტერესო ინფორმაცია გაავრცელა. ცნობილი გახდა რომ კლუბი „ნაპოლი“ საქართველოს ნაკრებისა და ყაზანის „რუბინის“ თავდამსხმელი ხვიჩა კვარაცხელიათი დაინტერესდა. იტალიელმა ჟურნალისტებმა ფეხბურთელის აგენტები „ნაპოლის“ საწვრთნელ ბაზასთან შეამჩნიეს.
„ნაპოლის“ მომდევნო სეზონიდან გაძლიერება სურს. კვარაცხელიას ტრანსფერზე ასევე „იუვენტუსი“ და „რომაც“ მუშაობენ, თუმცა დიეგო მარადონას ყოფილ გუნდს უპირატესობა აქვს და ამ კლუბის ხელმძღვანელობა ცდილობს, ყველას დაასწროს.
ფიფას განკარგულების წყალობით, იტალიურ კლუბს „რუბინთან“ შეუთანხმებლად შეუძლია კვარაცხელიას დამატება 30 ივნისამდე. არის შანსი, რომ თუ კლუბები ზაფხულში ტრანსფერზე მოილაპარაკებენ, 21 წლის ქართველი ფეხბურთელი „სერია A“-ში ამ სეზონშივე აღმოჩნდეს.
ცნობილი გახდა რომ უკრაინაში შეჭრილმა რუსულმა ჯარმა საბა კვერკველიას კლუბის, „მეტალისტი 1925“-ის საწვრთნელი ბაზაც დაბომბა, რომელიც ხარკოვის სიახლოვეს, სოფელ ვისოკიში მდებარეობს.
რამდენიმე დღის წინ ესპანურ მასმედიაში გავრცელდა ცნობა რომ საბა კვერკველია კარიერას დროებით კლუბ „ალმერიაში“ გააგრძელებს, გუნდში, რომელშიც ქართველი კარის დარაჯი გიორგი მაკარიძეც ასპარეზობს.
„მეტალისტი – 1925“-ის ხელმძღვანელთა ნაწილი ქალაქ ლუცკში იმყოფება, ხარკოვში კი გუნდიდან მხოლოდ 2-3 მოთამაშეა დარჩენილი. რაც შეეხება ლეგიონერებს, კლუბი ცდილობს რომ მათ კარიერა იჯარით სხვა კლუბებში გააგრძელონ.
გუშინ ცნობილი გახდა, რომ საქართველოს ეროვნული გუნდის კარის დარაჯი გიორგი ლორია კარიერას კვლავ კვიპროსულ „ანორთოსისში“ გააგრძელებს. 36 წლის მოთამაშემ ამჟამინდელ კლუბთან ხელშეკრულება, რომელსაც ვადა სეზონის დასრულების შემდეგ ეწურებოდა, 2024 წლის ზაფხულამდე გაახანგრძლივა.
ლორიასთან თანამშრომლობის გაგრძელების შესახებ ინფორმაციას „ანორთოსისი“ სოციალურ ქსელებში ოფიციალურ გვერდებზე ავრცელებს.
„გიორგი ლორია ჩვენთან რჩება! „ანორთოსისი“ აცხადებს, რომ საქართველოს ნაკრების მეკარე გიორგი ლორიასთან ხელშეკრულება 2024 წლის ზაფხულამდე გრძელდება. ფეხბურთელს ჩვენს გუნდთან ერთად კიდევ ბევრ წარმატებას ვუსურვებთ“. – ნათქვამია კლუბის განცხადებაში.
გუშინ ცნობილი გახდა რომ რუსეთის ჰოკეისტთა ეროვნული ნაკრები ორი წლით ევროტურიდანაც მოკვეთეს. რუსეთის ადგილს ევროტურზე შვეიცარია დაიკავებს. ევროტურში ფინეთი, შვედეთი, ჩეხეთი და შვეიცარია ითამაშებენ. შვეიცარიელები მაისში რუსების ნაცვლად პირველ მატჩს შვედებთან ჩაატარებენ.
„ევროტურიდან ჩამოშორება? ამით ევროპული ჰოკეი დაზარალდება, ჩვენ კი არა, პირიქით. ჩვენ რუსულ ჰოკეის ავაღორძინებთ. შევქმნით ახალ ტურნირებს. აბა, რა ფასი აქვს საერთაშორისო ტურნირებს რუსეთის ნაკრების გარეშე, არც სანახაობა იქნება და არც ხარისხი“. – განაცხადა რუსეთის ნაკრების თავკაცმა, წარსულში ცნობილმა ჰოკეისტმა ვალერი კამენსკიმ.
მსოფლიოს ნომერ პირველი ჩოგბურთელი, რუსი დანიილ მედვედევი დიდი საფრთხის წინაშეა. შესაძლოა მას უიმბლდონის ტურნირში ასპარეზობა აუკრძალონ. ამ დღეებში „დიდი სლემის“ ტურნირის ორგანიზატორებს დიდი ბრიტანეთის მთავრობასთან მოლაპარაკება აქვთ, თუ, რა ფორმით შეიძლება, დაუშვან ტურნირზე რუსი ჩოგბურთელები, მათ შორის მედვედევიც.
ბრიტანეთის სპორტის მინისტრი ნაიჯელ ჰადლსტონის აზრით, მედვედევი ვალდებულია მკვეთრად დააფიქსიროს თავისი აზრი უკრაინაში ომთან დაკავშირებით და დაგმოს პუტინის ქმედებები. მან უნდა აჩვენოს საჩოგბურთო სამყაროს, რომ არ ამართლებს რუსულ აგრესიას უკრაინაში.
დანიილ მედვედევმა ომის დაწყების შემდეგ საჯაროდ განაცხადა, რომ მშვიდობის მომხრეა, მან სოციალურ ქსელში, პროფილზე რუსეთის დროშაც მოაშორა, მაგრამ საჯაროდ პუტინის ქმედებები ჯერ არ დაუგმია.
გუშინ, იტალიური „რომას“ მთავარმა მწვრთნელმა ჟოზე მოურინიომ უკრაინაში მიმდინარე ომზე ისაუბრა. პორტუგალიელი სპეციალისტი კონკრეტულ შეფასებებს მოერიდა, მოწოდება კი ძალიან კონკრეტული ჰქონდა.
„ვეცდები, მაქსიმალურად მკაფიო ვიყო. გააჩერეთ ომი. ეს ომიც და კიდევ სხვაც, რომლებიც მსოფლიოშია. მორჩით. თუკი ამის თქმა ყოველდღეა საჭირო, ასეც მოვიქცევი. პოლიტიკაზე საუბარი არ მსურს. პოლიტიკა ძალიან მაინტერესებს, თუმცა, საზოგადოებაში მასზე არასდროს ვსაუბრობ. მიუხედავად ამისა, ახლა, მზად ვარ ვიყვირო, რომ ომი უნდა დასრულდეს“.
