გუშინ ცნობილი გახდა რომ საქართველოს ეროვნული გუნდისა და ყაზანის „რუბინის“ მოთამაშე ხვიჩა კვარაცხელია რუსული კლუბიდან ნამდვილად წამოვიდა.
თავდაპირველად ეს ინფორმაცია ოფიციალურად „Match TV“-იმ დაადასტურა. მისი მტკიცებით ეს იმითაა გამოწვეული, რომ ახალგაზრდა შემტევის ოჯახზე უკრაინაში მიმდინარე ომის ფონზე რუსულ კლუბში ასპარეზობის გამო დიდი ზეწოლა მიმდინარეობდა.
მოგვიანებით „რუბინის“ პრესსამსახურმა გაავრცელა ცნობა რომ დიდი ალბათობით კვარაცხელია ყაზანში აღარ დაბრუნდება. რუსულ მასმედიაში დაიდო კვარაცხელიას გამომგზავრების ფოტოსურათიც, შესაბამისი კომენტარით: – „კვარაცხელია საქართველოს ნაკრებში სათამაშოდ მიდის, თუმცა რაღაც ძალიან ბევრი ჩემოდანი მიაქვს. ეს „რუბინიდან“ გაქცევა ხომ არაა?“.
კვარაცხელიას საკითხზე რუსეთის სახელმწიფო დუმაშიც კი მოიცალეს. კომენტარი დეპუტატმა სვეტლანა ჟუროვამ გააკეთა: – „არ მინდა, მას რამე იარლიყი მივაწებო. მიმდინარე სიტუაციაში ჯანსაღი ანალიზის გაკეთება შეუძლებელია. ახლობლების გამო ნებისმიერი ადამიანი ნერვიულობს, ამიტომ, მას ვერ განვსჯი. იმის გამო, რომ რუსეთში თამაშობს, შესაძლოა, მის ქვეყანაში უსიამოვნებები შეემთხვეს. სურვილი თავად მას უნდა ჰქონდეს. შესაძლოა, სამუდამოდ წავიდეს, თუმცა, არავინ იცის, როგორი იქნება შედეგები“.
გუშინ გავრცელდა ინფორმაცია, რომ ბათუმის „დინამოში“ კვარაცხელიას გადასვლა გადაწყვეტილია. ხვიჩა აჭარულ გუნდში მიმდინარე წლის ზაფხულამდე დარჩება, კლუბს ევროტურნირების შესარჩევ ციკლში დაეხმარება და შემდეგ სერიოზულ ევროპულ კლუბში გადავა.
ცნობილი გახდა რომ ბათუმის „დინამოში“ კარიერას დროებით გააგრძელებს ზურიკო დავითაშვილიც, რომელიც ტულის „არსენალში“ თამაშობს, მაგრამ გავრცელებული ცნობით, რუსეთს ისიც ტოვებს.
უკრაინაში კი ფართომასშტაბიანი საომარი დაპირისპირება კვლავ გრძელდება…
გუშინ ახლო წარსულში ცნობილი უკრაინელი ფეხბურთელი ანდრეი შევჩენკო ბრიტანულ „Daily Mail“-ს ესაუბრა.
„რუსებთან ძველებური ურთიერთობა ვეღარ გვექნება. იქ არიან ადამიანები, რომლებსაც ომის შეჩერება სურთ, თუმცა მე მათ ვეუბნები – გამოდით ქუჩაში! ეს მარტივი არაა, თუმცა ერთადერთი შანსია, ხალხმა სიმართლე გაიგოს. რუსი სპორტსმენების ტურნირებიდან მოხსნას ვეთანხმები, მათზე ყველანაირი ზეწოლა უნდა გამოვიყენოთ! პუტინმა განაცხადა, რომ ეს „სპეცოპერაციაა“, არადა, უდანაშაულო ხალხის ხოცვაა. ბავშვები იღუპებიან – ამას გამართლება არ აქვს!“
უკრაინის 19-წლამდელთა ნაკრების მწვრთნელმა სერგეი ნაგორნიაკმა რუსებს ბიომასა უწოდა, რომელთა დიდი უმეტესობა უკრაინაში პუტინის ხელმძღვანელობით დაწყებული ომის შეჩერებას არ ცდილობს.
„როდესაც ომი დაიწყო, საზღვარგარეთ ვიყავი. 2 მარტს უკრაინაში დავბრუნდი. მას შემდეგ კიევსა და მშობლიურ ვინიცას შორის ვმუშაობ. დასაქმებული ვარ, უხეშად რომ ვთქვა, მოხალისის სამუშაოთი. ჩვენს შეიარაღებულ ძალებს სხვადასხვა მეთოდით ვეხმარები. მომიტევეთ უხეშობისთვის, მაგრამ არ შემიძლია თავი შევიკავო – ეს ხალხი კი არა, არამედ ბიომასაა. მსოფლიოში უზარმაზარი რესურსით, სადაც ყოველი მეხუთე სიღატაკის ზღვარს მიღმა ცხოვრობს, ყოველი მესამე სახლს შეშით ათბობს, მათი ოლიგარქები მდიდრდებიან, მოსახლეობის 75% კი უკრაინის განადგურებას უჭერს მხარს. დიახ, მათ ჰყავთ ნორმალური ადამიანები, თუმცა ცოტა. ნიშანდობლივია: რუს სპორტსმენებს შორის ნორმალური ადამიანები თითქმის არ არიან. ენები უკანალში შეიყვეს და ისე იქცევიან, თითქოს ეს მათ არ ეხებათ“. – განაცხადა სერგეი ნაგორნიაკმა.
უკრაინელი ფეხბურთელი, სერგეი შესტაკი, რომელიც სამოყვარულო დონეზე ასპარეზობდა, რუსეთ-უკრაინის ომს ემსხვერპლა. მომხდარს უკრაინის ფეხბურთის ასოციაციაც გამოეხმაურა.
„უკრაინის ფეხბურთის ასოციაციის პრეზიდენტისა და მთელი საფეხბურთო საზოგადოების სახელით, სერგეის ოჯახის წევრებსა და ახლობლებს გულწრფელ თანაგრძნობას ვუცხადებთ. ნათელი მის ხსოვნას. გმირები არ კვდებიან! ისინი მანამ იცოცხლებენ, სანამ მათი სახელები გვემახსოვრება“. – ნათქვამია უკრაინის ფეხბურთის ასოციაციის განცხადებაში.
რამდენიმე დღის წინ, საფეხბურთო სამყარო უკრაინელ ფეხბურთელებს, დმიტრო მარტინენკოსა და ვიტალი საპილოს გამოემშვიდობა. ეს უკანასკნელი ტანკს მართავდა და 25 თებერვალს, კიევთან ახლოს საომარი მოქმედებებისას გმირულად დაიღუპა, მარტინენკო კი დედასთან ერთად, ერთ-ერთ საცხოვრებელ სახლზე განხორციელებული დაბომბვის შემდეგ გარდაიცვალა.
