უკრაინის პრეზიდენტმა ვლადიმირ ზელენსკიმ, სამხრეთ კორეის პარლამენტში სიტყვით გამოსვლისას, კანონმდებლებს იარაღით დახმარება სთხოვა, რათა დაეხმაროს თავისი ქვეყნის თავდაცვას რუსეთის წინააღმდეგ – მიუხედავად იმისა, რომ სამხრეთ კორეის თავდაცვის სამინისტრომ ადრე უარყო ეს მოთხოვნა. ამის შესახებ CNN წერს.
“უკრაინას სჭირდება მხარდაჭერა თავისი სამხედროებისთვის, მათ შორის თვითმფრინავებისა და ტანკებისთვის”, _ განუცხადა ზელენსკიმ კანონმდებლებს და დასძინა:
“სამხრეთ კორეას შეუძლია, დაეხმაროს უკრაინას. სამხრეთ კორეას აქვს სხვადასხვა თავდაცვის სისტემა, რომელსაც შეუძლია რუსული ტანკებისგან, გემებისგან და რაკეტებისგან დაიცვას თავი. ჩვენ მადლობელი ვიქნებით, თუ სამხრეთ კორეა დაგვეხმარება რუსეთთან ბრძოლაში. თუ უკრაინას ექნება ეს იარაღი, მათ ექნებათ შესაძლებლობა გადაარჩინონ უბრალო ადამიანების სიცოცხლე. ისინი გადაარჩენენ უკრაინას.”
CNN წერს, რომ სამხრეთ კორეის თავდაცვის სამინისტროს სპიკერმა ბუ სეუნ-ჩანმა თქვა, რომ სამინისტრომ უარყო უკრაინის მოთხოვნა საზენიტო იარაღის სისტემის შესახებ და რომ მათ არ შეუძლიათ მომაკვდინებელი იარაღის მიწოდება მისი საკუთარი “ეროვნული უსაფრთხოების სიტუაციისა და სამხედრო მზადყოფნის” გათვალისწინებით.
სეული მუდმივად აცხადებდა, რომ არ მიაწვდის ლეტალურ იარაღს და არ განათავსებს სამხედროებს უკრაინის მხარდასაჭერად. გასულ თვეში მან მიაწოდა დაახლოებით 800,000 აშშ დოლარის ღირებულების არალეტალური სამხედრო მარაგი, მათ შორის ტყვიაგაუმტარი ჩაფხუტები, კარვები, საბნები, საწოლები, მზა კერძები (MREs), პირველადი დახმარების ნაკრები და მედიკამენტები.
