კიევის „დინამო“ სერიოზულ სკანდალში გაეხვია

გუშინ ცნობილი გახდა რომ ესპანური „ვალენსია“ მომავალი სეზონისთვის ახალი კარის დარაჯის შეძენას აპირებს. საიდუმლოს არ წარმოადგენს რომ საქართველოს ნაკრების წევრმა გიორგი მამარდაშვილმა ნიდერლანდელ იასპერ სილესენს კლუბის ძირითად შემადგენლობაში ადგილი დააკარგვინა და ეს უკანასკნელი დიდი ალბათობით კარიერას კლუბ „ეინდჰოვენში“ გააგრძელებს.

გამოცემა „larazon-ის მტკიცებით, „ვალენსია“ 35 წლის ვისენტე გუაიტას დაბრუნებას შეეცდება, რომელიც ამ გუნდიდან 2014 წელს „ხეტაფეს“ მიჰყიდეს, 2018 წელს კი თავისუფალი აგენტის სტატუსით „კრისტალ პალასში“ გადავიდა და ამჟამად ამ გუნდის ძირითადი მეკარეა.

23 აპრილს, ესპანეთის „კოპა დელ რეის“ ფინალი გაიმართება და „ვალენსია“ „ბეტისს“ დაუპირისპირდება. ამ შეხვედრას გამოცემამ „El Desmarque“ სპეციალური წერილი მიუძღვნა და როგორ იქნებოდა გიორგი მამარდაშვილის შესახებ რამდენიმე სიტყვა არ დაეწერა:

„ერთადერთი, ვისაც ძირითად შემადგენლობაში ადგილი თითქმის გარანტირებული აქვს, გიორგი მამარდაშვილია. „კოპა დელ რეის“ ფინალურ შეხვედრაში იგი სასტარტოში გამოჩნდება და მანამდე, 19 მარტს, ჩემპიონატის მატჩში „ვილიარეალთან“ სხვა მეკარისთვის სათამაშო დროის მიცემა ალოგიკური იქნება“.

უკრაინაში კი კიევის „დინამო“ სერიოზულ სკანდალში გახვეული აღმოჩნდა. ამ დღეებში კლუბი ევროპის სტადიონებზე საქველმოქმედო შეხვედრებს მართავს და შემოსავალს უკრაინის დახმარების ფონდში რიცხავს.

გუშინ სენსაციური ამბავი გავრცელდა – კიევის „დინამოს“ აპრილის ბოლოს საკუთარი ფეხბურთელების ეროვნული ნაკრების შეკრებაზე გაშვება არ სურს, რადგან „აუსტრიასთან“, „ბაზელთან“, „რენთან“, სოფიის „ლევსკისა“ და ფრანკფურტის „აინტრახტთან“ ამხანაგური საქველმოქმედო შეხვედრები აქვს დაგეგმილი. კლუბის პრეზიდენტმა იგორ სურკისმა განაცხადა, რომ პრობლემას ვერ ხედავს, თუ კიევის „დინამოს“ 12 ფეხბურთელი ეროვნულ გუნდს 23 მაისს, შოტლანდიასთან გასამართი მუნდიალის „ფლეი-ოფის“ მატჩამდე 1 კვირით ადრე შეუერთდება. პრეზიდენტმა ისიც დაამატა, რომ საქველმოქმედო ტურნეს შემდეგ ფეხბურთელები უკეთეს ფორმაში იქნებიან და ნაკრებსაც მეტად გამოადგებიან.

ამ ამბავზე უარყოფითი რეაქცია ჰქონდა უკრაინის ნაკრების ყოფილ მთავარ მწვრთნელ მირონ მარკევიჩს. 71 წლის სპეციალისტმა განაცხადა, რომ კიევის „დინამოს“ მხრიდან წამოსული განუკითხაობა ერთხელ და სამუდამოდ უნდა დასრულდეს, ხოლო ფეხბურთელებს მიმართა, რომ თუ უკრაინა ნამდვილად უყვართ კლუბი მიატოვონ და ნაკრებში წავიდნენ.

ამ სკანდალის დეტალები უკრაინულმა ტელეარხმა “Футбол 1/2/3“ გაასაჯაროვა:

„წინა კვირას ალეკსანდრ პეტრაკოვმა (უკრაინის ნაკრების მთ. მწვრთნელი) რეზო ჭოხონელიძისაგან (კიევის „დინამოს“ გენერალური დირექტორი) საგანგაშო ზარი მიიღო. ქართველმა ეროვნული გუნდის მწვრთნელს „დინამოს“ მოსამზადებელ ბანაკზე დასწრება შესთავაზა. ამასთანავე, ჭოხონელიძემ აღნიშნა, რომ პეტრაკოვს კიეველთა ძირითადი გუნდის ფეხბურთელები ნაკრებში არ უნდა გამოეძახა და მხოლოდ 23 მაისს ეხმო. პეტრაკოვმა ეს „შემოთავაზება“ კატეგორიულად უარყო და ნაკრების მოთამაშეების  მოსამზადებელ პროცესში გაშვება მოითხოვა.“

საბოლოოდ შეთანხმება ვერ შედგა და ნაკრების შტაბმა სარეზერვო შემადგენლობის სია შეადგინა, რომლებსაც ეროვნულ გუნდში იმ შემთხვევაში მიიწვევენ, თუ „დინამო“ პოზიციას არ შეიცვლის. უკრაინის ნაკრები 1-ელ ივნისს შოტლანდიის ეროვნულ გუნდთან 2022 წლის მუნდიალის „ფლეი ოფის“ შეხვედრას გამართავს. 29 აპრილს კი სლოვენიაში მოსამზადებელ შეკრებას დაიწყებს, რომელიც, როგორც ჩანს, კიევის „დინამოს“ ფეხბურთელების გარეშე ჩატარდება.

ამასობაში, უკრაინის პირველი ლიგის „პრიკარპატიეს“ ფეხბურთელები და მწვრთნელები ქვეყნის შეიარაღებული ძალების წევრები გახდნენ.  გუნდის კაპიტანმა ვასილი ციუციურამ განაცხადა, რომ ფეხბურთელები ჯერ წვრთნას გადიან, სროლას სწავლობენ და ყარაულში დადიან.

„იმის შიში კი არ გვქონდა, რომ გვემსახურა, არამედ ხელი არ შეგვეშალა, რადგან აქ თავისი საქმის პროფესიონალები არიან. სამხედრო კომისარმა აგვიხსნა, რომ თანდათან მოგვამზადებენ და სამშობლოს დასაცავად მზად ვიქნებით“.

მოსკოვის „სპარტაკის“ კაპიტანი და რუსეთის ნაკრების ერთ-ერთი კაპიტანი გიორგი ჯიქია რუსეთის ნაკრებებისა და კლუბების საერთაშორისო ტურნირებიდან მოკვეთის გამო უკმაყოფილობას ვერ მალავს:

„რა ვაკეთოთ არ ვიცი? სულ ვარჯიში და ერთმანეთს შორის თამაში არ მგონია ვინმეს სურდეს. სიტუაცია საკმაოდ მძიმეა, მაგრამ უნდა მოვითმინოთ და დაველოდოთ. ჩემთვის ლევანდოვსკის წინააღმდეგ თამაში საინტერესო იქნებოდა. სიმართლე გითხრათ, ძალიან გამაკვირვა პოლონელ ფეხბურთელთა განცხადებამ, რომ ჩვენთან არ ითამაშებდნენ. მე ვთვლი, რომ საკითხის გადაწყვეტამდე, მათ თავიანთი გამონათქვამებით ცოტა გადააჭარბეს”, – განაცხადა გიორგი ჯიქიამ.