საქართველოს ყოფილი პრემიერ-მინისტრი ბიძინა ივანიშვილი უახლოეს კვირებში Credit Suisse-თან დავაზე საერთაშორისო მედიისთვის პრესკონფერენციების სერიას მოაწყობს, — ამის შესახებ ნათქვამია ივანიშვილის მიერ დაქირავებული PR კომპანია Cision-ის მიერ გავრცელებულ ინფორმაციაში.
Green Vals Trust-ში მიმდინარე წარუმატებლობების საპასუხოდ, ბენეფიციარებმა შეიტანეს სარჩელი გერნსის სასამართლოში მნიშვნელოვანი წარუმატებლობისა და პოლიტიკური ზეწოლის შესახებ Credit Suisse-ის მიერ დანიშნული რწმუნებულის მხრიდან. სარჩელი წარმოიშვა ბენეფიციარების აქტივების მართვასთან დაკავშირებით რწმუნებულის ვალდებულებების სერიოზული დარღვევისა და კლიენტის კანონიერი ინტერესების უგულებელყოფის შედეგად.
განცხადებაში ნათქვამია, რომ ივანიშვილის მიერ წამოწყებული გლობალური სასამართლო პროცესი Credit Suisse-ისა და მისი განყოფილებების წინააღმდეგ მრავალი წელია მიმდინარეობს და 2022 წლის 29 მარტს, ბერმუდის უზენაესმა სასამართლომ სრულად დააკმაყოფილა ივანიშვილისა და მისი ოჯახის სარჩელები. სინგაპურში სასამართლო დავა კი 2022 წლის სექტემბერში დასრულდება. პიარკომპანიის განცხადების თანახმად, ივანიშვილის მიზანია ამ საკითხზე საზოგადოების სათანადო ინფორმირება და უახლოეს კვირებში საერთაშორისო მედიისთვის პრესკონფერენციების სერიის მოწყობას აპირებს.
განცხადების თანახმად, ივანიშვილი მედიასთან ყოველ შეხვედრას ზემოაღნიშნულ თემას მიუძღვნის და „დაამსხვრევს მითებს“, რომლებიც დაკავშირებულია შვეიცარიის საბანკო და სასამართლო სისტემის შეუბღალავ იმიჯთან, ისაუბრებს ბოლო დროს განხორციელებულ პოლიტიკურ ზეწოლაზე და იმაზე, რაც აღმოაჩინა ბანკსა და რწმუნებულზე.
