გუშინ იტალიური გამოცემა „Corriere dello Sport“ ხვიჩა კვარაცხელიას თემას კიდევ ერთხელ შეეხო. გაზეთმა საქართველოს პირველობაზე „დინამო“ (ბათუმი) – „ლოკომოტივის“ შეხვედრა განიხილა და კვარაცხელიას კარგი თამაში განსაკუთრებულად გამოყო.
„ხვიჩა კვარაცხელიას მორიგი არაჩვეულებრივი ასპარეზობა. „ნაპოლის“ სამომავლო შენაძენი საქართველოს ჩემპიონატში თამაშობს და „დინამო“ ბათუმის მაისურით გამოდის. მან თავის მონაგარს კიდევ ერთი გოლი შესძინა და თანაგუნდელ თორნიკე გაფრინდაშვილსაც გაატანინა.
ორი აზრი არაა, რომ ქართველ მესის „დინამო“ ბათუმი საქართველოს ჩემპიონატის უმაღლესი ადგილისკენ მიყავს. „დინამო ბათუმს“ 31 ქულა აქვს და უშუალო კონკურენტებთან, „დინამო“ თბილისთან და „სამგურალთან“ 5-ქულიანი ჰანდიკაპი აქვს. ხვიჩამ 9 შეხვედრა ჩაატარა და მის ანგარიშზე 5 გოლი და 2 საგოლე გადაცემაა“, – დაწერა გამოცემამ.
გუშინ ცნობილი გახდა რომ „ვირტუს ბოლონიას“ ქართველი მძიმე ფორვარდის, თორნიკე შენგელიას ტრავმა სერიოზული არ აღმოჩნდა და იგი გუნდს მალე დაუბრუნდება.
იტალიელი ჟურნალისტის, დარიო რონცულის მტკიცებით, შენგელია მოედანს ათ დღეში დაუბრუნდება. საქართველოს ნაკრების კაპიტანმა მკურნალობა უკვე დაიწყო და სარეაბილიტაციო პერიოდი დიდხანს არ გაგრძელდება.
„სკარიოლოს გუნდი ამაზე კარგ სიახლეს ვერ შეიტყობდა და არ მოუწევს, ფლეი-ოფის გადამწყვეტ ეტაპზე ერთ-ერთი ლიდერის გარეშე იასპარეზოს. ახლა, ყველაზე მნიშვნელოვანია, რომ მკურნალობის პროცესმა კარგად ჩაიაროს, რათა შენგელია პარკეტს საუკეთესო ფორმაში დაუბრუნდეს და არ იჩქაროს“.
გუშინ კალათბურთის საერთაშორისო ფედერაციამ რუსეთისა და ბელარუსის ნაკრებები თავისი ეგიდით გასამართი ტურნირებიდან ოფიციალურად მოკვეთა.
ფიბა-ს აღმასრულებელი კომიტეტის მიხედვით, უახლოეს პერიოდში რუსეთსა და ბელარუსში ფიბა-ს ეგიდით გასამართი ტურნირები არ უნდა ჩატარდეს და რუსეთისა და ბელარუსის ნაკრებები მომდევნო საერთაშორისო ტურნირებიდან მოიკვეთონ. საუბარია 2023 წლის მსოფლიო ჩემპიონატის საკვალიფიკაციო ეტაპზე, 2022 წლის ქალთა მსოფლიო ჩემპიონატზე და 2022 წლის 17-წლამდე ნაკრებების მსოფლიო ჩემპიონატზე.
რუსეთის საკალათბურთო ნაკრებს, რომელსაც ევრობასკეტის თბილისურ ჯგუფში უნდა ეთამაშა, დიდი ალბათობით, მონტენეგროს ეროვნული გუნდი ჩაანაცვლებს. როგორც მონტენეგროული ვებ-გვერდები წერენ, ეს საკითხი ფაქტობრივად გადაწყვეტილია და ოფიციალურად ლიეტუვის დედაქალაქ ვილნიუსში მომავალ შაბათს დაგეგმილ შეხვედრაზე გაფორმდება.
ფიბა-ს რეგლამენტის თანახმად, თუკი რომელიმე ნაკრები ევროპის ჩემპიონატიდან იხსნება ან დისკვალიფიცირებულია, მის ადგილს ის გუნდი იკავებს, რომელსაც საკვალიფიკაციო ტურნირში საუკეთესო შედეგი ჰქონდა.
მძიმე წონაში ყოფილი მსოფლიო ჩემპიონი, ვლადიმირ კლიჩკო კი ოლიმპიური თამაშებიდან რუსი სპორტსმენების მოკვეთას ემხრობა.
მოკრივე საერთაშორისო ოლიმპიურ კომიტეტს მოუწოდებს, რომ აგრესორი ქვეყნის სპორტსმენებს სანქციები რაც შეიძლება მალე დაუწესოს.
„საერთაშორისო ოლიმპიურმა კომიტეტმა რუსეთის ნაკრები უნდა შეაჩეროს. ომი გრძელდება და ამის გამო მომავალ ოლიმპიადაზე მონაწილეობა ვერ უნდა მიიღოს. ისინი უნდა მოიკვეთონ ყველა შეჯიბრიდან, რადგან ამ ომს სწორედ რუსეთი წარმოადგენს. მოქმედება სიტყვებზე მაღლა დგას, იზოლაცია კი ყოველთვის უფრო ხმამაღალია, ვიდრე ნებისმიერი სიტყვა ან წინადადება. მათი მოკვეთა მტკივნეული იქნება როგორც სპორტსმენებისთვის, ისე ეკონომიკისთვის. მტკივნეული იქნება ყველა ადამიანისთვის, ვინც რუსეთთან არის დაკავშირებული“, – განაცხადა ვლადიმირ კლიჩკომ.
გუშინ „Forbes“-მა მსოფლიოს 20 ყველაზე ძვირადღირებული საფეხბურთო კლუბი დაასახელა და ისტორიაში პირველად მოხდა, რომ რეიტინგს „ბარსელონა“ ლიდერობს, რომელმაც მადრიდის „რეალი“ ჩამოიტოვა.
„ბარსელონას“ ღირებულება 4.76 მილიარდი აშშ დოლარი გახლავთ, „რეალი“ კი 4.75 მილიარდადაა შეფასებული. მესამე ადგილს „ბაიერნი“ იკავებს – 4.215 მილიარდი, მეოთხე „მანჩესტერ იუნაიტედი“ გახლავთ – 4.2 მილიარდი, ხუთეულს კი „ლივერპული“ ასრულებს – 4.1 მილიარდი.
მეექვსე ადგილზეა „მანჩესტერ სიტი“ 4 მილიარდია. „ჩელსი“ მეშვიდეა – 3.2 მილიარდი, „არსენალი“ მერვე – 2.8 მილიარდი, „პარი სენ-ჟერმენი“ და „ტოტენჰემი“ კი მე-9 და მე-10 ადგილებს იკავებენ – 2.5 მილიარდი, 2.3 მილიარდი.
ავტორი
