ახლახან საავტომობილო გზების დეპარტამენტმა ასეთი განცხადება გაავრცელა: “გურიის რეგიონში, მსოფლიო ბანკის დაფინანსებით, 7 სხვადასხვა მონაკვეთზე, 62.4 კმ გზის რეაბილიტაცია მიმდინარეობს. აღნიშნული პროექტების ჯამური ღირებულება 58.5 მლნ. ლარია.
კომპანიამ, გარკვეული სახის სამუშაოები დაიწყო ცალკეულ მონაკვეთებზე, მაგრამ გეგმა-გრაფიკთან მიმართებით სამუშაოების ტემპი საკმაოდ დაბალია. დეპარტამენტმა, უკვე აამოქმედა ხელშეკრულებით გათვალისწინებული სანქციები კომპანიის მიმართ და სამუშაოების ტემპი თუ ვერ დაეწევა გეგმა-გრაფიკს, საჯარიმო სანქციების გარდა განიხილება ხელშეკრულების შეწყვეტაც.
გზების რეაბილიტაციისთვის გამოცხადებულ საერთაშორისო ტენდერში, ჩინურმა კომპანიამ “China Road & Bridge Corporation”-მა გაიმარჯვა.
რეაბილიტაცია უნდა ჩაუტარდეს, საჯავახო-ჩოხატაური-ოზურგეთის (მათ შორის ნასაკირალის მონაკვეთი), ჩოხატაური-ბახმაროს, ოზურგეთი-ნატანები-ურეკის, ოზურგეთი-ქობულეთის, ჩოხატაური-ზომლეთის და საავტომობილო გზების ცალკეულ მონაკვეთებს”.
როგორც ცნობილია, გურიის რეგიონის გზების რეაბილიტაცია, მსოფლიო ბანკის მხარდაჭერით ხორციელდება.
62 კმ სიგრძის გზის პროექტის ბიუჯეტი 58,5 მილიონ ლარს შეადგენს.
პროექტი, რომელიც გზების სრულ რეაბილიტაციას ითვალისწინებს, წლების მანძილზე ჭიანურდება და დღემდე დაუსრულებელია სამუშაოები. უფრო მეტიც, აქ მოსახლეობამ არაერთხელ მოაწყო აქცია. ისინი ამბობდნენ, რომ მტვერში და ნაგავში უჭირთ სუნთქვა, გადაადგილება, ხოლო მშენებლობის დროს წარმოქმნილ ორმოებში წყალი გუბდება. ერთ ოჯახს ძროხაც კი დაეხრჩო ამის გამო.
_ ძროხა კი არა, ადამიანი კინაღამ დაიხრჩო აქ ღამით. ორიოდე თვის წინ, არასწორად, საგზაო თუ უსაფრთხოების ნიშნის გარეშე დატოვებულმა ტრანსპორტმა (ექსკავატორი) ადამიანის სიცოცხლე შეიწირა _ ღამით მოძრავი მსუბუქი ავტომობილის მძღოლმა ვერ დაინახა უსაფრთხოების წესების გარეშე დაყენებული ტრაქტორი და შეეჯახა, _ გვითხრეს აქ.
აქციებმა, როგორც ჩანს, შედეგი ვერ გამოიღო. გზაზე მოძრავი ტრანსპორტის მძღოლები გამუდმებით წუწუნებენ, ადგილობრივი მოსახლეობა კი პროტესტს აღარ გამოთქვამს.
_ რა ქნან? დაიღალნენ. ამასთანავე, ზოგს ამ მშენებლობის დროს, კომპანიის ტრაქტორები თუ სხვადასხვა ტრანსპორტი ეზოებში ჰყავთ დაყენებული. ღამით ქუჩაში ხომ არ დატოვებენ? უხდიან გარკვეულ თანხას… რა ქნას ხალხმა _ უჭირთ, _ გვეუბნებიან აქ მცხოვრები ადამიანები და საკუთარი ვინაობის დასახელებაზე არ გვთანხმდებიან.
ნასაკირალი-ძიმითის გზის მონაკვეთებზე ამ დროისთვის, 17 მაისს, ორიოდე ტექნიკა მუშაობს. ე. წ. “კატოკი” გზის კიდეებს ტკეპნის, ხოლო ექსკავატორი არხებს ასწორებს.
_ რა ჯარიმა? ჩვენ არავის დავუჯარიმებივართ. მუშაობას ვაგრძელებთ. დრო კიდევ გვაქვს. მალე ასფალტს დავაგებთ და მოვრჩებით, _ გვეუბნება ადგილზე მყოფი ჩინური კომპანიის ქართველი წარმომადგენელი და იკვირვებს, რომ მათი კომპანია საგზაო დეპარტამენტმა დააჯარიმა.
კითხვაზე, რატომ არ დაიგო ასფალტი აქამდე, ამბობენ, რომ როგორც კი კარგი ამინდები დადგება, მაშინვე დააგებენ. თუმცა, კარგი ამინდები უკვე დამდგარია.
“გურია ნიუსს” წყარო აწვდის ინფორმაციას, რომ სინამდვილეში ოზურგეთში არსებულ ასფალტის ქარხანაში აპარატურას ნაწილი გაფუჭდა, ამიტომ ასფალტის დამზადება შეჩერებულია, დანადგარის შეკეთებისთანავე კი დაიწყება მომზადება. სწორედ ამიტომ არის შეფერხება ასფალტის დაგების საქმეში. ამინდი კი საბაბია.
ჩვენ “გზამშენი 18”-ის დირექტორს, თემურ ჯახვას დავუკავშირდით და ვკითხეთ, შეეფერება თუ არა სინამდვილეს ეს ინფორმაცია. ასევე ,ვკითხეთ დაჯარიმების შესახებ, რასაც კომპანიის წარმომადგენლები უარყოფენ:
_ დაზუსტებით ვერაფერს გეტყვით. დააჯარიმეს, თუმცა, ეს არ ნიშნავს ხელშეკრულების შეწყვეტას. თუ გაფუჭებულია რაღაც დანადგარი ქარხანაში, ალბათ, გაკეთდება და ამუშავდება. მეტს ვერაფერს გეტყვით, _ გვითხრა თემურ ჯახვამ.
“გურია ნიუსი” აგრძელებს მასალების მოკვლევას გურიის რეგიონში მსოფლიო ბანკის სოლიდური დაფინანსებით, შვიდ სხვადასხვა მონაკვეთზე გზის რეაბილიტაციის შესახებ.
როგორც ვთქვით, ამ პროექტების ღირებულება 58 მილიონ ლარს აჭარბებს და დღემდე დაუსრულებელია.
აქვე გავიხსენებთ საგზაო დეპარტამენტის განცხადებას, რომელიც ამ უწყებამ გასულ წელს, იმ აქციების შემდეგ გააკეთა, რომელიც გზების გაჭიანურებული სამუშაოების გამო, ადგილობრივმა მოსახლეობამ არაერთხელ გამართა:
“უღელტეხილის სარეაბილიტაციო სამუშაოები მაისის ბოლოს სრულდება.
გვსურს გამოვეხმაუროთ რამდენიმე მედიასაშუალების მიერ გავრცელებულ არასწორ და არასრულ ინფორმაციას შიდასახელმწიფოებრივი მნიშვნელობის საჯავახო-ჩოხატაური-ოზურგეთი-ქობულეთის (ნასაკირალის უღელტეხილის) გზის სარეაბილიტაციო სამუშაოებთან დაკავშირებით და მოსახლეობას მივაწოდოთ სწორი და სრული ინფორმაცია გურიაში მიმდინარე პროექტთან დაკავშირებით.
საქართველოს საავტომობილო გზების დეპარტამენტი, მსოფლიო ბანკის ფინანსური მხარდაჭერით, ახორციელებს გურიის რეგიონის გზების რეაბილიტაციას. სარეაბილიტაციო გზის მონაკვეთების სიგრძე ჯამურად შეადგენს 62 კმ-ს, ხოლო პროექტის ბიუჯეტი 58.5 მილიონი ლარია.
პროექტი ითვალისწინებს გზების სრულ რეაბილიტაციას, რაც მოიცავს ისეთ სამუშაოებს, როგორიცაა გზის საფუძვლის გამოცვლა, სანიაღვრე სისტემების მოწყობა, ხელოვნური ნაგებობებისა და საყრდენი კედლების აშენება, ასფალტო-ბეტონის საფარის დაგება.
პროექტის შემადგენელ შიდასახელმწიფოებრივი მნიშვნელობის საჯავახო-ჩოხატაური-ოზურგეთი-ქობულეთის (ნასაკირალის უღელტეხილის) 8.5 კმ-იანი გზის მონაკვეთზე, დღეის მდგომარეობით, აშენებულია საყრდენი კედლების 80%, წყალგამტარი ნაგებობების 72%, სანიაღვრე არხების 50% და სხვა აუცილებელი სამუშაოები, რომლის შემდგომაც მოხდება გზის საფარის მოწყობა.
ზემოთ ჩამოთვლილ სამუშაოებთან ერთად, გზის ამ მონაკვეთზე მიმდინარეობს შემასწორებელი ფენის შეტანა და ტექნოლოგიით გათვალისწინებული კლიმატური პირობების შესაბამისად, დაიწყება გზის საფარის ასფალტო-ბეტონით მოწყობა
ნასაკირალის მონაკვეთზე გზის სარეაბილიტაციო სამუშაოების შესრულების სახელშეკრულებო ვადად განსაზღვრული 12 თვე და სამუშაოების დასრულების საბოლოო ვადა 2022 წლის 27 მაისია.
შესაბამისი პროგრესით მიმდინარეობს სამუშაოები პროექტის დანარჩენ მონაკვეთებზეც, ხოლო ჩოხატაურის მონაკვეთის სარეაბილიტაციო სამუშაოები უკვე დასკვნით ფაზაშია – დაგებულია ასფალტო-ბეტონის საფარი და დასრულებულია გზის მონიშვნის სამუშაოები…
გურიის რეგიონის გზების რეაბილიტაციის სამუშაოებს ასრულებს ტენდერში გამარჯვებული კომპანია CHINA ROAD AND BRIDGE CORPORATION”, _ ნათქვამი იყო ინფორმაციაში.
როგორც განცხადებაში წერია, პროგრესით მიმდინარე სამუშაოების შესახებ მოსაუბრე, საავტომობილო გზების დეპარტამენტია. ამ დეპარტამენტმა კი ახლახან ეს კომპანია დააჯარიმა. კომპანიის წარმომადგენლები დაჯარიმების შესახებ, როგორც თავად თქვეს, არ არიან საქმის კურსში… ასე რომ, ვინ ვის ატყუებს, არაა ადვილი გასარკვევი!
ავტორი
