მოლდოვას ყოფილი პრეზიდენტი, იგორ დოდონი კიშინიოვში დააკავეს. სასამართლოს თანახმად, გამოძიება დოდონს კორუფციას, სამშობლოს ღალატს, უკანონო გამდიდრებასა და პარტიის უკანონო დაფინანსებას ედავება,- ამის შესახებ ინფორმაციას euronews ავრცელებს.
როგორც პროკურატურაში აცხადებენ, ორდერის ფარგლებში სულ 10 შენობა და 3 მანქანა გაჩხრიკეს და ამოღებულია “დიდი ოდენობით” ფული და ძვირად ღირებული ნივთები.
„ჩხრეკისას ერთ-ერთმა პირმა სცადა გადაყლაპვა, რომ გაენადგურებინა საკუთარ სახლში აღმოჩენილი დოკუმენტები, რომლებიც ადასტურებდა დაახლოებით 700 000 ევროს ღირებულების უძრავი ქონების ყიდვა-გაყიდვის ოპერაციებს“, – წერია განცხადებაში.
47 წლის იგორ დოდონი ამჟამად მოლდოვის მთავარი ოპოზიციური ბლოკის, პრორუსული სოციალისტური პარტიის ლიდერია. ის ქვეყნის პრეზიდენტი 2016-2020 წლებში იყო.
იგორ დოდონის დაკავებას, კრემლის პრესსპიკერი დიმიტრი პესკოვი გამოეხმაურა. მისი თქმით, მოსკოვი “შეშფოთებულია” დოდონის “დევნით”, მაგრამ ასევე აღიარებს, რომ ეს მოლდოვის შიდა საქმეა.
”ჩვენ, რა თქმა უნდა, შეშფოთებულები ვართ, რომ კვლავ გამოიყენება ასეთი პრაქტიკა და დევნა იმ ადამიანების მიმართ, რომლებიც არიან რუსეთის ფედერაციასთან მეგობრული და ურთიერთსასარგებლო ურთიერთობების განვითარების მომხრეები”, – განუცხადა მან ჟურნალისტებს კონფერენციაზე.
ავტორი
