ევროკავშირის ლიდერები საგანგებო სამიტზე შეთანხმდნენ ემბარგოს დაწესებაზე რუსული ნავთობის იმპორტზე პორტების გავლით და რუსეთის უმსხვილესი ბანკის Sberbank-ის გათიშვას SWIFT -ის სისტემიდან, განაცხადა ევროსაბჭოს ხელმძღვანელმა შარლ მიშელმა, გვიან ევროკავშირის სამიტის პირველი შეხვედრის შემდეგ.
გარდა ამისა, მისი თქმით, ევროკავშირი აკრძალავს კიდევ სამ რუსულ სახელმწიფო მედიას ოპერირებას მის ტერიტორიაზე.
“სანქციების ეს პაკეტი მოიცავს სხვა მკაცრ ზომებს: რუსეთის უმსხვილესი ბანკის Sberbank-ის SWIFT-ის გამორთვა, კიდევ სამი რუსული სახელმწიფო მაუწყებლის აკრძალვა და სანქციების დაწესება უკრაინაში ომის დანაშაულებებზე პასუხისმგებელ პირებზე”, – დაწერა ტვიტერზე შარლ მიშელმა.
BBC წერს, რომ იმპორტი საზღვაო გზით, პორტების გავლით, შეადგენს ნავთობისა და ნავთობპროდუქტების ორ მესამედს, რომელსაც რუსეთი ყიდის ევროკავშირის ქვეყნებში. დარჩენილი მესამედი გადის მილსადენზე და ამ ტიპის იმპორტის აკრძალვას ეწინააღმდეგებოდა უნგრეთი, რომელიც მასზე დიდად არის დამოკიდებული.
ევროკომისიის ხელმძღვანელმა ურსულა ფონ დერ ლაიენმა, რომელიც იყო სანქციების მეექვსე რაუნდის ინიციატორი, ორშაბათს საღამოს განაცხადა, რომ ევროკავშირი იმედოვნებს, რომ წლის ბოლომდე რუსეთიდან ნავთობის იმპორტის 90%-ზე უარს იტყვის.
ავტორი
