გუშინ იტალიურმა გამოცემამ „pazionapoli.it“ გაავრცელა ინფორმაცია, რომ პირველ ივლისს „ნაპოლი“ ოფიციალურად გამოაცხადებს, რომ გუნდმა ქართველი შემტევი ხვიჩა კვარაცხელია შეიძინა.
ქართველი 7 ივლისს, ჩაფრინდება ნეაპოლში, სადაც სამედიცინო შემოწმებას გაივლის და გუნდს საწვრთნელ ბაზაზე შეუერთდება. ამის შემდეგ ხვიჩა ამხანაგურ მატჩებშიც მიიღებს მონაწილეობას. „ნაპოლის“ 14 და 17 ივლისს ორი ამხანაგური შეხვედრა აქვს დაგეგმილი.
ხვიჩა კვარაცხელია ბათუმის „დინამოს“ რიგებში აღარ თამაშობს. რამდენიმე დღის წინ „ნაპოლიმ“ ბათუმის „დინამოს“ წერილი მისწერა და შეუთვალა, რომ ახალგაზრდა თავდამსხმელი აღარ ათამაშოს. სავარაუდოდ, ნეაპოლელებს ეშინიათ, რომ მან შესაძლოა, ტრავმა მიიღოს, თანაც ხვიჩას დასვენება სჭირდება და ეს გადაწყვეტილებაც ამიტომ მიიღეს.
სამწუხაროდ, ხვიჩას ბათუმური კარიერა უკვე დასრულდა. შესაბამისად, ის ჩემპიონთა ლიგის საკვალიფიკაციო ეტაპზე კლუბს ვერ დაეხმარება.
გუშინ ესპანურმა გამოცემამ „Valencianoticias“ „ვალენსიას“ ლეგიონერების მიერ გასულ სეზონში ნაჩვენები ასპარეზობა შეაფასა. გამოცემამ გიორგი მამარდაშვილზე განსაკუთრებული ყურადღება გაამახვილა:
„197 სანტიმეტრი სიმაღლის მქონე ქართველმა მეკარემ „ვალენსიას“ კარის დაცვის პასუხისმგებლობა აიღო და გუნდის მაისურით 21 შეხვედრა ჩაატარა. საერთო ჯამში, მან 21 გოლი გაუშვა და საშუალოდ მატჩში მიღებული ბურთების მხრივ, სილესენზე ბევრად უკეთესი შედეგი აქვს.
მისმა ასაკმა და სეზონის პირველ ნაწილში ნაჩვენებმა თამაშმა კლუბს მოტივაცია მისცა, რომ მისი კონტრაქტის დაცვა გადაეწყვიტა. მამარდაშვილის გაფორმება „ვალენსიას“ ხელმძღვანელთათვის დიდი წარმატება იყო და იგი უცნობი ფეხბურთელიდან გუნდის საკვანძო მოთამაშედ იქცა“.
საქართველოს ნაკრებისა და „გაგრას“ ფეხბურთელმა სოლომონ კვირკველიამ კი შესაძლოა, კარიერა რუმინეთში გააგრძელოს. გამოცემა „Digisport.ro“-ს მტკიცებით, მისი სამსახურით ბუქარესტის „სტიაუაა“დაინტერესებული და კლუბის პრეზიდენტი დაცვის ხაზის გაძლიერებას აპირებს.
„დიდი შანსია, რომ ცენტრალური მცველი დავიმატოთ, რადგან ამ რგოლში სერიოზული პრობლემები გვაქვს. ცენტრალური მცველი თუ არ გყავს, ჩემპიონატის მოგება ურთულესია და ამ ეტაპზე ბერძენ და ქართველ ფეხბურთელებს ვაკვირდებით“, – განაცხადა კლუბის პირველმა პირმა გიგი ბეჩალიმ.
გუშინ გამოცემამ „Calciomercato“ გაავრცელა ცნობა რომ ტურინის „იუვენტუსს“ „პარი სენ-ჟერმენის“ ფეხბურთელის, ნეიმარის გადაბირების შესაძლებლობა გააჩნია. პარიზელთა ახალი სპორტული დირექტორი, ლუიშ კამპუში ტურინული გუნდის ხელმძღვანელებს დაუკავშირდა და ბრაზილიელის იჯარის წესით გადაყვანა შესთავაზა.
„პსჟ“-ს სახელფასო ბიუჯეტის განტვირთვა სურს და რამდენიმე ფეხბურთელის გაშვებაზე ფიქრობს და ნეიმარი ერთ-ერთი მათგანია.
აღნიშნული ინფორმაცია, გუშინვე პარიზული კლუბის პრეზიდენტის ნასერ ალ-ხელაიფის სიტყვებმაც დაადასტურა:
„იქნება თუ არა ნეიმარი „პსჟ“-ს პროექტში? ამ თემაზე ღიად საუბარი არ შეიძლება. იქნებიან ფეხბურთელები, რომლებიც მოვლენ და ასევე წავლენ. ეს ყველაფერი კერძო მოლაპარაკებაა“.
აღმოჩნდა რომ მასიმილიანო ალეგრიმ პირადად მოითხოვა ნეიმარის ტრანსფერი. იტალიელი სპეციალისტი თვლის, რომ ბრაზილიელი შემტევი „იუვენტუსს“ მნიშვნელოვნად გააძლიერებს.
გუშინ ცნობილი გახდა, რომ მილანის „ინტერის“ ხელმძღვანელები ამჟამინდელი მთავარი მწვრთნელის შეცვლას არ აპირებენ.
სიმონე ინძაგი „ინტერში“ მუშაობას გააგრძელებს. მილანურმა გუნდმა გამოაცხადა, რომ 46 წლის სპეციალისტთან ახალი კონტრაქტი გაფორმდა, რომელსაც ვადა 2024 წლის ზაფხულამდე აქვს.
სიმონე ინძაგი „ინტერს“ 2021 წლიდან წვრთნის და პირველსავე სეზონში იტალიის თასი და სუპერთასი მოაგებინა.
ავტორი
