“ხალხო, მოდით, ხვალიდან მაინც ნუ გაგვიწყრება ღმერთი და გვიყვარდეს ერთმანეთი“

ოზურგეთის ალექსანდრე წუწუნავას სახელობის დრამატულ თეატრში დადგმულ სპექტაკლს “გაყრას“ მაყურებელის დიდი რაოდენობა დაესწრო.  მაყურებელს აშკარად მონატრებული ეს სპექტაკლი, რომელიც წლების განმავლობაში აქტუალობას, არ კარგავს.

თბილისის ვასო აბაშიძის სახელობის ახალი თეატრის მსახიობებმა ოზურგეთელი მაყურებლის გული მოიგეს და სპექტაკლის განმავლობაში რამდენჯერმე ოვაციებით გაამხნევს ისინი.

ცოტა რამ სპექტაკლის შესახებ:

გიორგი ერისთავის პიესა „გაყრა“ დაიწერა 1849 წელს და განსაკუთრებით აღსანიშნავია ის, რომ მისი პირველი წარმოდგენა 1850 წლის 2 იანვარს გაიმართა თბილისის გიმნაზიის დარბაზში და სწორედ ეს დღე (14 იანვარი) ითვლება ქართული თეატრის დაარსების დღედ.

ვასო აბაშიძის სახელობის ახალი თეატრისათვის განსაკუთრებით მნიშვნელოვანი იყო ამ პიესის დადგმა, რადგან გვეჩვენება, რომ იგი დღესაც ძალზედ აქტუალურია. ამ სპექტაკლის დადგმით თეატრის მიზანი იყო მოეზიდა საზოგადოების ყველა სოციალური ფენისა, თუ ასაკის წარმომადგენელი, განსაკუთრებით ახალგაზრდობა, რადგან კიდევ ერთხელ, ორიგინალური ფორმით შეახსენოს მას ქართული ტრადიციების მნიშვნელობა და ღირებულება და შეეცადოს, დაამკვიდროს მშვიდობიანი ურთიერთობა და ტოლერანტობა სხვადასხვა ეროვნებათა შორის, ამიტომ მაღალმხატვრულობასთან ერთად უზარმაზარია სპექტაკლის მორალური მნიშვნელობაც.

სპექტაკლ ,,გაყრა”-ს რეჟისორმა დავით დოიაშვილმა ოზურგეთის თეატრს და მაყურებელს მადლობა გადაუხადა.

“ძალიან დიდი პატივი ჩვენთვის თქვენი დასწრება ამ სპექტაკლზე. დიდი მადლობა მობრძანებისთვის. ჩვენ ვარსებობთ თქვენთვის“, – ასე მიმართა მაყურებელს დათო დოიაშვილმა სპექტაკლის დასრულების შემდეგ.

რეჟისორი: დავით დოიაშვილი კომპოზიტორი: რუსუდან მორჩილაძე; სცენოგრაფი: გიგა ლაპიაშვილი; კოსტუმების მხატვარი: ანანო მოსიძე; ქორეოგრაფი: კოტე ფურცელაძე

სიმღერის ტექსტების ავტორი: ირინა სანიკიძე

მონაწილეობდნენ: გიორგი ყველაშვილი, ლაშა რამიშვილი, ცისია მეტრეველი, ნინო მითაიშვილი, არჩილ სოლოღაშვილი, გოგა მოძმანაშვილი, ბუბა გოგორიშვილი, ალეკო ბეგალიშვილი, ბადრი ბეგალიშვილი, მარინა ჯოხაძე, შორენა კურტანიძე, ანა ზამბახიძე, ნინო გომართელი, გარი ბაღდასაროვი, თომა ბულაშვილი, კაკო თოფურია.სპექტაკლის ჩვენება ნოდარ დუმბაძის სახელობის საერთაშორისო ფესტივალის ფარგლებში გაიმართა ოზურგეთში. ფესტივალი 5 ივლისს გაიხსნა და 15 ივლისს  დასრულდება.

პ.ს. ასევე სპექტაკლის დასრულებამდე ერთ-ერთი მსახიობის ფრაზა ყველაზე მეტად აღმოჩნდა ჩემთვის მნიშვნელოვანი, რომელიც დღეს ყველაზე მეტად გვჭირდება: “ხალხო, მოდით, ხვალიდან მაინც ნუ გაგვიწყრება ღმერთი და გვიყვარდეს ერთმანეთი.“