რამდენიმე დღის წინ გავრცელდა ცნობა, რომ ინგლისის პრემიერშიპში მოასპარეზე კლუბი „ბარნლი“ საქართველოს ეროვნული გუნდისა და ფრანგული „მეცის“ შემტევი გიორგი მიქაუტაძით გაძლიერებას აპირებდა.
„ბარნლი“ გასულ სეზონში გავარდა პრემიერლიგიდან, მაგრამ აქვს ამბიცია რომ ინგლისური ფეხბურთის ელიტაში მალე დაბრუნდეს. გუნდის მწვრთნელს, ბელგიის ნაკრებისა და „მანჩესტერ სიტის“ ყოფილ მოთამაშეს, ვენსან კომპანის, თავდასხმის ხაზის გაძლიერება სჭირდება. აქ მას მხოლოდ ეშლი ბარნსი ჰყავს ჯანმრთელი, რომელსაც კონკურენცია ნამდვილად არ აწყენდა.
გუშინ, გამოცემამ „lancs.live“ გაავრცელა ინფორმაციაა, რომ კომპანის გიორგი მიქაუტაძის შეძენა დაუყოვნებლივ სურს. ცნობილი გახდა, რომ „ბარნლიმ“ უკვე გადადგა ნაბიჯი 21 წლის ფორვარდის წასაყვანად და ტრანსფერი სულ უფრო რეალური ხდება.
გიორგი მამარდაშვილი ძირითადი კონკურენტის გარეშე დარჩა. „ვალენსიამ“ ოფიციალურად გამოაცხადა, რომ იესპერ სილესენმა გუნდი დატოვა. 33 წლის ნიდერლანდელი კარის დარაჯი კარიერას სამშობლოში გააგრძელებს და „ნაიმეგენის“ კარს დაიცავს, სადაც 2010 წელს მისი პროფესიული კარიერა დაიწყო.
ამ კლუბის გარდა, სილესენი იცავდა „აიაქსისას“ და „ბარსელონას“ ღირსებას, ხოლო „ვალენსიაში“ 2019 წელს გადავიდა და 51 მატჩში მიიღო მონაწილეობა.
ამასობაში „ვალენსია“ უფრო დასუსტდა. კლუბს 25 წლის თავდამსხმელი გონსალო გედეში ტოვებს და კარიერას პრემიერლიგის „ვულვზში“ გააგრძელებს.
პორტუგალიელი შემტევის შესახებ გარიგება გუნდებს შორის უკვე შედგა და ესპანური მხარე ფეხბურთელის სანაცვლოდ 32 მილიონ ევროს მიიღებს, ამ თანხას სხვადასხვა ბონუსიც დაემატება. ნახევარმცველი სამედიცინო შემოწმების გასავლელად ვულვერჰემპტონში გუშინ გაემგზავრა.
პორტუგალიელმა „ლა ლიგის“ გასულ სეზონში 11 გოლი გაიტანა და კარლოს სოლერთან ერთად გუნდის საუკეთესო ბომბარდირი იყო.
„პარი სენ ჟერმენმა“ ხვიჩა კვარაცხელიას „ნაპოლის“ ესპანელ ნახევარმცველ ფაბიან რუისთან კონტრაქტის პირობები სრულად შეათანხმა და საქმის დასახურად იტალიურ კლუბთან დეტალების შეთანხმებაა საჭირო.
რუისის საკუთარ გუნდში ხილვა მადრიდის „რეალსაც“ სურდა, მაგრამ ის ფეხბურთელის დამატებას 2023 წელს, თავისუფალი სტატუსით განიხილავდა.
„პსჟ“-სა და „ნაპოლის“ შორის გარიგება კიდევ ერთ ფეხბურთელზე შეიძლება შედგეს. საქმე ეხება პარიზელთა 35 წლის კოსტარიკელ მეკარე კეილორ ნავასს, რომლის აყვანის სურვილიც ლუჩანო სპალეტის აქვს. მეკარის საჭიროება ნეაპოლიტანურ გუნდში მას შემდეგ გაჩნდა, რაც „ნაპოლიდან“ ალექს მერეტის წასვლა დადასტურდა.
ავსტრიული „ვოლფსბერგერის“ პრეზიდენტმა დიტმარ რაიგლერმა ლუკა ლოჩოშვილის ტრანსფერი სერია A-ში დაადასტურა. ოღონდ, 24 წლის ქართველი მცველი კლუბ „ვერონაში“ კი არა, „კრემონეზეში“ გადადის.
„კრემონეზე“ ლომბარდიული კლუბია. გასულ სეზონში „კრემონეზემ“ სერია B-ში მე-2 ადგილი დაიკავა და ელიტაში დაბრუნდა. გუნდს არსებობის ისტორიაში სულ 7 სეზონი აქვს გატარებული სერია A-ში, აქედან 5-ჯერ ის გავარდა.
გუშინ გავრცელდა ცნობა რომ თბილისის „დინამოს“ ყიდვით თურქული კომპანია „Alagoz Holding“-ია დაინტერესებული.
კლუბის პრეზიდენტმა რომან ფიფიამ რამდენიმე კვირის წინ „დინამოს“ გაყიდვის ამბავი დაადასტურა და თქვა, რომ მოლაპარაკებას ინვესტორებთან აწარმოებდა.
„Alagoz Holding“-ს სპორტთან მჭიდრო კავშირი აქვს. კომპანია მომავალ წელს კლუბ „ანკარგიუჯიუს“ გენერალური სპონსორი იქნება, რომელსაც სასპონსორო სახით 10 მილიონ ევროს მისცემს. ეს კომპანია ასევე „ფენერბაჰჩეს“ საფეხბურთო და საკალათბურთო გუნდის ერთ-ერთი გენერალური სპონსორია და თურქეთში უნივერსიტეტების, კლინიკების და გამაჯანსაღებელი ცენტრების მშენებლობაში იღებს მონაწილეობას.
უკრაინულ საფეხბურთო სამყაროში დიდი სკანდალი დაფიქსირდა. 25 წლის უკრაინელი ცენტრალური მცველი ოლექსანდრ მასალოვი კარიერას რუსეთის მე-2 ლიგის ბინადარ „უფაში“ განაგრძობს.
მასალოვი ბოლოს უკრაინაში ასპარეზობდა და „დესნას“ რიგებში ირიცხებოდა, საფეხბურთო კარიერას კი კიევის „დინამოში“ იწყებდა.
„ჩვენი კლუბი კმაყოფილია ოლექსანდრ მასალოვის ტრანსფერით. დარწმუნებული ვართ, რომ ეს ფეხბურთელი ჩვენ ძალიან დაგვეხმარება. მასთან ერთად „უფა“ პროგრესს გააგრძელებს. რაც შეეხება თავად ტრანსფერს, არანაირი პრობლემა არ ყოფილა, ყველაფერმა შეუფერხებლად ჩაიარა. არ მსურს მასალოვის მოქალაქეობის საკითხზე საუბარი“, – განუცხადა გამოცემა „Sport24“-ს „უფას“ გენერალურმა დირექტორმა შამილ გაზიზოვმა.
ავტორი
