ოზურგეთში, მდინარე ბჟუჟის მარცხენა სანაპიროსთან, ექადიის დასახლების მიმართულებით, წმიდა გიორგის ქუჩა მდებარეობს. ქუჩის აღმართზე, ექადიის მაღლობზე დგას ყველასთვის ცნობილი, ულამაზესი წმიდა გიორგის სახელობის ეკლესია, რომელიც ადგილობრივმა მკვიდრმა, ბიზნესმენმა, გვარად კონტრიძემ, საკუთარი სახსრებითა და ძალისხმევით აღადგინა და ააგო.
წმინდა გიორგის სახელობის ქუჩა, ოზურგეთი-ბათუმის ცენტრალური ტრასის მარჯვენა მხარესაა და იქვე შესახვევშივე იწყება. აქ დადგმული იყო დიდი ბანერი, ეკლესიის ხედით და მუდამ განათებული იყო. როგორც აქაურები გვეუბნებიან, ახლა ეს ბანერი მწყობრიდან არის გამოსული და უფუნქციოდაა.
_ არ ვიცით, ფოტო წაიშალა თუ გახუნდა. ფაქტია, არ ჩანს. ეს ბანერი კი დგას უფუნქციოდ, _ გვითხრეს აქ მცხოვრებლებმა.
წმიდა გიორგის ქუჩის მცხოვრებთა პროტესტი გამოიწვია გასულ წლებში აქ პროფესორ გენო ჩხაიძის სახელობის ქუჩის აღმნიშვნელი ტრაფარეტის დადგმამ.
ოზურგეთის მუნიციპალიტეტის საკრებულოს გადაწყვეტილებით, ექადიაზე მდებარე ქუჩას, სადაც დაიბადა და გაიზარდა პროფესორი, ეწოდა მისივე სახელი. თუმცა, აქედან ორ კილომეტრამდე მანძილია, ტრაფარეტი კი დგას წმიდა გიორგის ქუჩის დასაწყისში, ცენტრალური ტრასის მარჯვენა მხარეს. ამიტომაც იყო, რომ გაბრაზებულმა ხალხმა მოთხარა ეს აბრა და გადააგდო.
წმიდა გიორგის ქუჩის და აქ დადგმული ტრაფარეტის შესახებ, რომელიც პროფესორ გენო ჩხაიძის სახელობის ქუჩას მიუთითებს, “გურია ნიუსთან” ღვაწლმოსილმა პედაგოგმა, იქვე მცხოვრებმა ელიკო თავდუმაძემ ისაუბრა:
_ აქ მცხოვრებლებმა უკმაყოფილება მხოლოდ იმიტომ გამოთქვეს, რომ წმინდანის სახელობის ქუჩაა ეს. წმიდა გიორგის სახელობისაა. ზემოთ, პირდაპირ ხედავთ, წმიდა გიორგის სახელობის ეკლესია დგას. იქ ადრე იყო ხის ეკლესია. მერე ის კონსტრუქცია ზემოთ, ტყე-პარკში გადაიტანეს. დიდი ხანია, ეს უკმაყოფილება სუფევს, თან არაფრის გამო. პირველ რიგში რასაც გეტყვით, არის ის, რომ აწ გარდაცვლილ პროფესორის სახელის მინიჭების წინააღმდეგი არავინაა და მასზე ხომ მხოლოდ კარგი თქმა შეიძლება.
ბრწყინვალე მეცნიერი, საუკეთესო ადამიანი და ასეთივე ოჯახის პატრონი. თუმცა, უხერხულობაში გარდაცვლილის ოჯახი არ უნდა ჩააგდონ და მის ხსოვნას პატივი ღირსეულად სცენ და არა ტრაფარეტის უადგილო ადგილზე დამაგრებით. მუდმივი უკმაყოფილება რატომ უნდა დარჩეს დაპირისპირებად და არ მოგვარდეს? ვიცით, რომ ქუჩას სახელს არავინ უცვლის, მაგრამ ქუჩას არ აწერია თავისი სახელი და დგას ტრაფარეტი, რომელსაც აწერია გენო ჩხაიძის სახელობის ქუჩა! ამიტომ მოხდა ცუდი ფაქტი და მოთხარეს ეს ტრაფარეტი. არ შეიძლება ასე.
ხელისუფალს მეტი მოეთხოვება და გააკეთონ აქ აბრა, რომ ეს არის წმიდა გიორგის სახელობის ქუჩა. თუ მინიშნება სურთ, რომ ზემოთ არის გენო ჩხაიძის სახელობის ქუჩა, ამ აბრაზე სხვანაირად უნდა ეწეროს მიმანიშნებელი შინაარსი. რაც დგას, ის აჩვენებს რომ ეს ქუჩაა ამ პიროვნების სახელობისაა. ასე ჩანს გარეგნულად. ქუჩა კი წმიდა გიორგის სახელობისაა. ასევე გეტყვით, რომ ოზურგეთს, ანასეულის ინსტიტუტს ჰყავდა როგორც საუკეთესო მეცნიერი გენო ჩხაიძე, ასევე, კორიფეები: ირაკლი გამყრელიძე, მექი ბზიავა, ვახტანგ ჯაყელი… თუმცა, მიწიერსა და წმნიდანს შორის ხომ მუდამ ზღვარია. აქ უნდა იყოს გაკეთებული წმიდა გიორგის ქუჩის აღმნიშვნელი ტრაფარეტი. მე იმ ეკლესიის ქვემოთ, იქვე ვცხოვრობდი. მერე გადმოვედით ცოტა აქეთ. 16 წელი ვიმუშავე ანასეულის კვლევით ინსტიტუტში. ვიმეორებ, არავინ გაიგოს ისე, რომ თითქოს, მე კონკრეტული პიროვნების საწინააღმდეგო რაიმე მქონდეს. უბრალო, ეს არ არის ლამაზი, რომ არსად დგას იმ ქუჩის აღმნიშვნელი ტრაფარეტი, _ გვითხრა ელიკო თავდუმაძემ.
_ ეს ქუჩა წმიდა გიორგის სახელობისაა და არც არასდროს შეიცვლება. აქ არავინ დაუშვებს ამას. ჩვენ გვსურს, განთავსდეს წმიდა გიორგის სახელობის ქუჩის აღმნიშვნელი წარწერა, _ გვითხრა აქ მცხოვრებმა ნინა კუტუბიძემ.
წმიდა გიორგის ქუჩაზე მცხოვრებლებმა, ასევე, გვითხრეს, რომ ოზურგეთი-ბათუმის ცენტრალური ტრასაზე, წმიდა გიორგის ქუჩის შესახვევთან დგას საკმაოდ მაღალი ბანერი, რომელზეც განთავსებული იყო წმიდა გიორგის სახელობის ტაძრის სურათი და მუდამ განათებული იყო:
_ ყველამ ვიცოდით, რომ ეს ქუჩის სახელსაც ნიშნავდა და ტაძრის მდებარეობასაც ვიზუალურად მიანიშნებდა. ახლა ესეც გამოსულია მწყობრიდან, _ გვეუბნებიან აქაურები.
“გურია ნიუსი” ოზურგეთის მუნიციპალიტეტის საკრებულოს წევრს, ექიმ დავით მდინარაძეს ესაუბრა და ჰკითხა, თუ იყო საქმის კურსში აღნიშნული პრობლემის შესახებ:
_ ვიცი, როგორ არ ვიცი. იქ გენო ჩხაიძის სახელობის ქუჩის მისანიშნებელი ტრაფარეტი დგას. ვანდალიზმის მეტი რა ერქვა იმ ფაქტს, რომ მოთხარეს თუ მოტეხეს და გადააგდეს?! არავის არ შეუცვლია ქუჩისთვის სახელი. ის არის წმიდა გიორგის სახელობის ქუჩა. ხოლო გენო ჩხაიძის სახელობის ქუჩის მიმანიშნებელი ტრაფარეტი დგას კუთხეში. წარწერა თავად პროფესორის ოჯახის წევრებმა გააკეთეს.
_ ბატონო დავით, სწორედ ამაზე დაობენ ქუჩის მცხოვრებლები. ცოტა კომიკურად ხომ არ ჩანს, როცა წმიდა გიორგის სახელობის ქუჩის დასაწყისშივე დგას სხვა ქუჩის აღმნიშვნელი ტრაფარეტი?
_ არაფერი არ აქვთ სადავო. არავის არ უფიქრია, რომ ამ ქუჩისთვის შეეცვალა სახელი. იქ დაიდგმება აუცილებლად წმიდა გიორგის სახელობის ქუჩის აღმნიშვნელი ტრაფარეტი. რომელიც დგას, ის მხოლოდ მიანიშნებს, რომ იქ არის არა წმიდა გიორგის, არამედ გენო ჩხაიძის ქუჩა.
_ იქ რომ დადგათ, სადაც ნამდვილად არის აღნიშნული ქუჩა?
_ აქ აუცილებლად დაიდგმება წმიდა გიორგის ქუჩის აღმნიშვნელი ტრაფარეტი, ანუ რაც მათ სურთ. ეს კი მხოლოდ მინიშნებაა, _ გვითხრა დავით მდინარაძემ.
აღნიშნული ტრაფარეტი კი არანაირ მინიშნებას არ აჩვენებს. დგას ქუჩის დასაწყისში და აწერია, რომ გენო ჩხაიძის ქუჩაა. როგორც ზემოთ ვთქვით, აქ მცხოვრებთა ზედმეტად გაღიზიანება სწორედ ამან გამოიწვია.
იმედია, მოსახლეობის მიერ არჩეული დეპუტატი დავით მდინარაძე, როგორც შეგვპირდა, თავის ამომრჩევლებს დაეხმარება საკითხის მოწესრიგებაში და სამომავლოდ დაპირისპირებას და უსიამოვნო ფაქტებს ადგილი არ ექნება.
ავტორი
