BBC– ის მიერ გავრცელებული ინფორმაციით, ირანში, საპროტესტო აქციებზე არეულობის დროს, 11 დღის განმავლობაში, უსაფრთხოების ძალებმა სულ მცირე 76 მომიტინგე მოკლეს. ასევე დაკავებულია ასობით ადამიანი, მათგან 20 ჟურნალისტი.
ცნობისთვის, საპროტესტო აქციები პატიმრობაში მყოფი ქალის სიკვდილმა გამოიწვია, რომელიც ჰიჯაბის ტარების წესის დარღვევისთვის დააკავეს.
ირანის ადამიანის უფლებათა დამცველი (IHR), ნორვეგიაში დაფუძნებული ორგანიზაცია, ხელისუფლებას ადანაშაულებს არაპროპორციული ძალისა და ცეცხლსასროლი იარაღის გამოყენებაში განსხვავებული აზრის ჩასახშობად.
“მომიტინგეების წამებისა და არასათანადო მოპყრობის საფრთხე სერიოზულია და მომიტინგეების წინააღმდეგ ცოცხალი საბრძოლო მასალის გამოყენება საერთაშორისო დანაშაულია“, – თქვა IHR-ის დირექტორმა მაჰმუდ ამირი-მოგადამმა. „მსოფლიომ უნდა დაიცვას ირანელი ხალხის მოთხოვნები მათი ძირითადი უფლებების შესახებ“.
გაეროს ადამიანის უფლებათა ოფისმა ასევე განაცხადა, რომ ძალიან შეშფოთებულია ხელისუფლების ძალადობრივი პასუხი და მოუწოდა მათ პატივი სცენ მშვიდობიანი პროტესტის უფლებას.
17 სექტემბერს, მაჰსა ამინის დაკრძალვის შემდეგ, ანტისამთავრობო დემონსტრაციები ირანის 80-ზე მეტ ქალაქში გავრცელდა.
22 წლის ქურთი ქალბატონი ჩრდილო-დასავლეთის ქალაქ საკეზიდან 13 სექტემბერს იმყოფებოდა დედაქალაქ თეირანში, სადაც პოლიციამ იმ კანონის დარღვევისთვის დააკავა, რომელიც ქალებს ავალდებულებს თმის ჰიჯაბით დაფარვას.
დაკავების შემდეგ საავადმყოფოში გადაიყვანეს, სადაც პოლიციის განცხადებით, გულის უეცარი უკმარისობის შედეგად გარდაიცვალა, მაგრამ მისმა ოჯახმა უარყო ეს და ამტკიცებენ, რომ მას სცემეს ოფიცრებმა.
