პოლონეთისა და ბულგარეთის საგარეო საქმეთა სამინისტროები თავიანთ მოქალაქეებს რუსეთის სასწრაფოდ დატოვებისკენ მოუწოდებენ. ამის შესახებ ინფორმაციას ორივე ქვეყნის პრესსამასახური ავრცელებს.
პოლონეთმა თქვა, რომ“უსაფრთხოების სიტუაციის გაუარესების, საზღვრების ჩაკეტვისა და სხვა არაპროგნოზირებადი მოვლენების შემთხვევაში“, რუსეთიდან ევაკუაცია შესაძლოა რთული ან თუნდაც შეუძლებელი იყოს საჰაერო მიმოსვლის ნაკლებობის გამო.
პოლონეთის პოლიტიკა გამოწვეულია იმით, რომ რუსეთის მიერ უკრაინაში შეჭრის შემდეგ, ვარშავა მას არამეგობრულ სახელმწიფოდ აღიარებს.
,,რუსეთში პოლონეთის დიპლომატიური და საკონსულო პერსონალის რაოდენობის მნიშვნელოვანი შემცირების გამო, პოლონეთის მოქალაქეებისთვის პირდაპირი დახმარების გაწევის შესაძლებლობები ძალიან შეზღუდულია.
უსაფრთხოების სიტუაციის მკვეთრი გაუარესების, საზღვრის ჩაკეტვის ან სხვა გაუთვალისწინებელი გარემოებების შემთხვევაში, ევაკუაცია შეიძლება მნიშვნელოვნად გართულდეს ან შეუძლებელიც კი იყოს. ჩვენ ვურჩევთ პოლონეთის რესპუბლიკის მოქალაქეებს, რომლებიც რჩებიან რუსეთის ფედერაციის ტერიტორიაზე, დატოვონ იგი,“ – ნათქვამია განცხადებაში
ასევე ბულგარეთის საგარეო საქმეთა სამინისტრომ გაავრცელა განცხადება და “რთული სიტუაციის“ გამო მოქალაქეებს რუსეთის სასწრაფოდ დატოვება მოსთხოვა. სამინისტრო მოქალაქეებს ურჩევს, ყურადღებით აკონტროლონ როგორ განვითარდება ვითარება და დაუკავშირდნენ საელჩოს მოსკოვში და გენერალურ საკონსულოს სანქტ–პეტერბურგში.
,,რუსეთის ფედერაციის ტერიტორიაზე მყოფ ბულგარეთის მოქალაქეებს ვურჩევთ, გამოიჩინონ მეტი სიფრთხილე, მოერიდონ ხალხმრავალ ადგილებს, სათანადო ყურადღება მიაქციონ პირობებს და სიტუაციის განვითარებას. ბულგარეთის მოქალაქეებო, თუ დახმარება გჭირდებათ, მიმართეთ ბულგარეთის რესპუბლიკის საელჩოს მოსკოვში“, – წერია ბულგარეთის საგარეო საქმეთა სამინისტროს განცხადებაში.
ცნობისთვის, რუსეთში ნაწილობრივი მობილიზაციის გამოცხადების შემდეგ, ლატვიამ საკუთარი ჯარების მობილიზება დაიწყო.
ავტორი
