კატარის მსოფლიო პირველობის გუშინდელი სათამაშო დღის პირველ შეხვედრაში კოსტა რიკის ეროვნულმა გუნდმა ერთგვარი სენსაცია მოახდინა და პირველ ტურში გერმანელთა მძლეველი იაპონია დაამარცხა – 1:0.
დღის მეორე შეხვედრაში მიმდინარე მსოფლიო ჩემპიონატის კიდევ ერთი მოულოდნელი შედეგი დაფიქსირდა. მაროკოს ეროვნულმა გუნდმა პირველობის ერთ–ერთ ფავორიტად შერაცხულ ბელგიას აჯობა – 2:0.
ხორვატიის ნაკრებმა მატჩის დასაწყისში მიღებული გოლის მიუხედავად კანადას არანაირი შანსი არ დაუტოვა – 4:1.
გერმანიის ეროვნულმა გუნდმა ბეწვის ხიდზე გაიარა, ესპანეთის ნაკრებთან მატჩის მიწურულს ანგარიშის გათანაბრება მოახერხა და მერვედფინალში გასვლის შესაძლებლობა შეინარჩუნა – 1:1.
მექსიკასთან ჩატარებული დაძაბული შეხვედრის შემდეგ ცნობილი გახდა რომ არგენტინის ეროვნული გუნდის კაპიტანმა ლეო მესიმ დიდი დიეგო მარადონას რამდენიმე მიღწევა გაიმეორა.
მესიმ მუნდიალზე 21-ედ ითამაშა და არგენტინის ნაკრებში დიეგო არმანდო მარადონას გაუთანაბრდა.
ლეო მესი მუნდიალზე გოლებით (8) დიეგო მარადონასა და გილერმო სტაბილეს დაეწია. წინ მხოლოდ გაბრიელ ბატისტუტაა (10).
მექსიკასთან მატჩის შემდეგ ლიონელ მესიმ შემდეგი კომენტარი გააკეთა:
„ასე უნდა ვითამაშოთ, მექსიკა კარგი გუნდია, შესანიშნავი მწვრთნელი ჰყავს და მათ ბურთის ფლობით თამაში მოსწონთ. მეორე ტაიმში, როცა დავმშვიდდით, ის ვიყავით, რაც ვართ. პირველი მატჩის წაგების ფასი დიდია, მაგრამ ამას ბევრი განმაპირობებელი ფაქტორი ჰქონდა – ბევრისთვის ეს პირველი მსოფლიოს ჩემპიონატია, განრიგი და სხვა ფაქტორები. ეს არ არის საბაბი, მაგრამ პირველ ტურში ისე ვერ ვითამაშეთ, როგორც საჭირო იყო. სანტიმეტრების გამო საუდის არაბეთთან ანგარიში 2:0 ვერ გავხადეთ, თორემ განსხვავებული თამაში იქნებოდა. ახლა ჩვენთვის სულ სხვა მუნდიალი დაიწყო და გამარჯვება მოვახერხეთ. არ ვიცი, რატომ ამბობენ, რომ ფიზიკური პრობლემები მაქვს. კოჭზე საუბრობდნენ და კოჭზე არაფერი მჭირს, გუნდთან ერთად ვივარჯიშე, დღეს კი ის გავაკეთეთ, რაც უნდა გაგვეკეთებინა. აღარ უნდა დავნებდეთ, ყველა მომდევნო მატჩი ჩვენთვის ფინალია და შეცდომის დაშვება არ შეიძლება“.
მესისა და მის თანაგუნდელებს მერვედფინალურ სტადიაზე გასასვლელად კიდევ ოფლის დენა მოუწევთ. სამაგიეროდ საფრანგეთის ეროვნულმა გუნდმა ამ მიზანს უკვე მიაღწია და ჯგუფის ბოლო შეხვედრას დამშვიდებული ხვდება.
დანიის ნაკრების დამარცხების შემდეგ ფრანგთა მთავარმა მწვრთნელმა დიდიე დეშამმა შემდეგი კომენტარი გააკეთა:
„ბევრი საინტერესო რამ გავაკეთეთ, მაგრამ რეალიზაციის მხრივ უკეთესად უნდა გვეთამაშა. გოლი ისეთი სიტუაციიდან გავუშვით, რაშიც მეტოქე ძალიან ძლიერია, მაგრამ ჩვენც სტანდარტულებზე მათ პრობლემები შევუქმენით. ლოგიკურად მგონია, რომ კარგი გუნდი დავამარცხეთ, რომელიც ხშირად დაუფასებელია. დანიამ დაამტკიცა, რომ ერთ–ერთი კარგი ნაკრებია. ჩვენთვის იდეალური მდგომარეობაა: 6 ქულა გაქვს და ორი ტურის შემდეგ ჯგუფიდან გავედით. პირველი ადგილის დაკავების დიდი შანსიც გვაქვს ბურთების კარგი სხვაობის წყალობით. პირველი მიზანი მიღწეულია, რაც ადვილი არასდროსაა. ეს გუნდი ძალიან ძლიერი, მყარი და მონდომებულია, რომ დიდი საქმეები გააკეთოს“.
პოლონეთის ეროვნული გუნდისა და კატალონიური „ბარსელონას“ თავდამსხმელმა რობერტ ლევანდოვსკიმ დიდი ხნის ოცნება აისრულა და მსოფლიო ჩმპიონატებზე პირველი გოლი გაიტანა.
„მსოფლიოს ჩემპიონატზე გოლის გატანა ახდენილი ოცნებაა. ნაკრებში თამაშისას უპირველესი გუნდია, თუმცა თავდამსხმელი ვარ და გოლის გატანაზე ყოველთვის ვფიქრობ. დაცვაში ძალიან კარგად ვითამაშეთ. შეგვეძლო დროდადრო უფრო მეტადაც შეგვეტია, ნახევარდაცვაში მეტი ბურთი ჩაგვეჭრა, უფრო აგრესიულად შეგვეტია და გაგვეტანა. ჩვენს შანსებს ველოდებოდით და სიტუაციას ვაკონტროლებდით. მშვიდად უნდა ვიყოთ და არგენტინასთან მატჩში უნდა ვაჩვენოთ რა შეგვიძლია. მათთან სხვა თამაში იქნება. 4 ქულა გვაქვს და ბოლომდე ბრძოლის გარდა სხვა გზა არ გვაქვს“, – განაცხადა რობერტ ლევანდოვსკიმ.
კატარში რამდენიმე სკანდალიც დაფიქსირდა.
ირანის ნაკრების მთავარმა მწვრთნელმა, კარლოს კეირუშმა გერმანელ იურგენ კლინსმანს მოუწოდა, რომ ფიფაში დაკავებული თანამდებობიდან უნდა გადადგეს და რომ ირანის ნაკრებზე მისი სიტყვები „ფეხბურთის სირცხვილია“.
უელსთან მოგებული მატჩის შემდეგ, „BBC“–ის ჟურნალისტმა გები ლოგანმა კლინსმანს მატჩის დროს ირანელების ქცევებზე და ჯენლტმენობაზე ჰკითხა, გერმანელის პასუხი კი ცოტა უცნაური გამოდგა – „დიახ ეს მათ კულტურაშია. მსაჯებთან მუდმივი კამათი და ა.შ – ეს მათი თამაშის წესია, სწორედ ამიტომ უხდება ამ ნაკრებს კარლოს კეირუშიც. მან ვერ იმუშავა სამხ. აფრიკაში, ვერც კოლუმბიაში, ვერც ეგვიპტეში, მაგრამ დაბრუნდა ირანში და წარმატებას მიაღწია. ეს შემთხვევითობა არ არის.“
კლინსმანის კომენტარებს პორტუგალიელი შემდეგნაირად გამოეხმაურა:
„არ აქვს მნიშვნელობა რამდენად გაფასებდი როგორც ფეხბურთელს, ეს კომენტარები ირანის კულტურაზე, ირანის ნაკრებზე, მოთამაშეებზე – ფეხბურთის სირცხვილია. როგორც გერმანელ–ამერიკელი მესმის, რომ ირანის ფანი არ ხარ. არ არის პრობლემა. მაგრამ მგონია, რომ ამ სიტყვების შემდეგ დაკავებული თანამდებობიდან უნდა გადადგე და ფიფასაც ამას მოვუწოდებ.“
იურგენ კლინსმანი ფიფას ტექნიკური კვლევების ჯგუფის წევრია და ტურნირის ფარგლებში ამ მიმართულებით მუშაობს.
კამერუნის ნაკრების ნახევარმცველმა გაელ ონდუამ კი კატარის მუნდიალზე შვეიცარიასთან შეხვედრაში ითამაშა ბუცით, რომელზეც კამერუნის და რუსეთის დროშები ჰქონდა გამოსახული. ბუნებრივია, ამან დიდი უკმაყოფილება და შეკითხვები გამოიწვია ევროპულ მედიაში, თუმცა როგორც ირკვევა, ფიფა 27 წლის ფეხბურთელის დასჯას არ აპირებს.
გერმანული „ჰანოვერის“ ნახევარმცველი კამერუნშია დაბადებული, მაგრამ რუსეთშია გაზრდილი და ამ ქვეყნის მოქალაქეობასაც ფლობს. ის მოსკოვის „ლოკომოტივის“ აღზრდილია, გამოდიოდა „ცსკა“–ს ახალგაზრდულ გუნდში და თამაშობდა „ანჟიში“.
ხორვატიის ნაკრების მთავარი მწვრთნელი ზლატკო დალიჩი ფიფა–ს დაუპირისპირდა. ხორვატები გუშინ კანადის ეროვნულ გუნდს თბილისის დროით 20:00 საათზე დაუპირისპირდნენ, თუმცა, პირველ ტურში მაროკოსთან 14:00 საათზე ითამაშეს, რის გამოც ხორვატიის ნაკრების მთავარმა მწვრთნელმა პრესკონფერენციაზე ამ საკითხზე ისაუბრა. ის გაბრაზებულია და აინტერესებს, რატომ თამაშობს ხორვატია ასეთ დროს, ხოლო გრანდები ყოველთვის საღამოს, როდესაც ფეხბურთის სათამაშოდ უკეთესი პირობებია.
„ხორვატიის ნაკრები პატივისცემას იმსახურებს და თან ყველასგან, რადგან ეს დაიმსახურა თავისი შედეგებით, თამაშებით და დამოკიდებულებით. ჩვენ 20 წლის განმავლობაში მსოფლიოს ჩემპიონატზე ორი მედალი მოვიპოვეთ და სხვებს პატივს ვცემთ, შესაბამისად, ჩვენი ოპონენტებისგანაც იმავეს ველით. არ არის პატივისცემა, როცა ხორვატია 14:00 საათზე თამაშობს. ამ დროს არც ინგლისი, არც საფრანგეთი, არც ესპანეთი, არც ბრაზილია არ თამაშობს. რატომ?! მიუხედავად ამისა, მოვემზადებით და მაღალ დონეზე ვითამაშებთ. ჩვენ ერთნაირ პატივისცემას ვიჩენთ კანადისა და მსოფლიოს ჩემპიონ საფრანგეთის მიმართ“, – განაცხადა დალიჩმა.
ცნობილი გახდა რომ გერმანიის ფეხბურთის ფედერაციას შესაძლოა ფიფამ ჯარიმა დააკისროს. გერმანელებმა ფიფას რეგლამენტი დაურღვევიათ.
ესპანეთთან მატჩის წინ პრესკონფერენციაზე მთავარი მწვრთნელი ჰანსი ფლიკი მარტო, ფეხბურთელის გარეშე გამოცხადდა და ეს იმით ახსნა, რომ ფეხბურთელი მნიშვნელოვანი მატჩის წინ არ უნდოდა ორსაათიანი მგზავრობით დაეტვირთა. სწორედ ამ დროის მანძილია გერმანელთა სასტუმროდან სტადიონამდე, სადაც მატჩი უნდა გაიმართოს.
ფიფას რეგულაციებით ყველა გუნდი ვალდებულია მატჩისწინა პრესკონფერენციაზე მწვრთნელთან ერთად ფეხბურთელიც ჰყავდეს, რაც გერმანელებმა არ გაითვალისწინეს.
პორტუგალიის ნაკრების ლიდერმა კრიშტიანო რონალდუმ მწვრთნელის მიერ მიცემული დასვენების დღე გამოიყენა და თანაგუნდელები სადილზე დაპატიჟა.
რონალდუმ პორტუგალიელი ფეხბურთელები ალ მაჰას კუნძულზე ახლადგახსნილ რესტორან „Tatel de Doha“–ში სადილად წაიყვანა. თანაგუნდელებმა სადილის წინ ჯგუფური ფოტო გადაიღეს, რომელზეც ბერნარდუ სილვა, ჟოაუ კანსელუ და ჟოზე სა არ ჩანან. როგორ გაირკვა, ამ ფეხბურთელებმა კატარში მყოფ ნათესავებთან ერთად გადაწყვიტეს თავისუფალი დროის გატარება.
ავტორი
