„ნაპოლი“ კვარაცხელიასთან კონტრაქტს ანახლებს

გუშინ იტალიურმა გამოცემამ „La Repubblica“ საინტერესო ინფორმაცია გაავრცელა. აღმოჩნდა რომ „ნაპოლი“ ხვიჩა კვარაცხელიას შენარჩუნებასა და მასთან კონტრაქტის განახლებას გეგმავს.

ნეაპოლელთა სპორტული დირექტორი კრისტიანო ჯუნტოლი ამ დღეებში ქართველის აგენტებს შეხვდა და მათთან ამ საკითხზე ისაუბრა.

„ჯუნტოლიმ მსოფლიოს ჩემპიონატის პაუზის წინ ვახშამზე კვარაცხელიას აგენტებთან ისაუბრა, რათა რეაგირება მოახდინოს პოტენციურ ვარიანტებზე, რომელიც სატრანსფერო ბაზარზე ქართველ ტალანტთან მიმართებაში ისმის. კვარა წელიწადში დაახლოებით 1.2 მილიონ ევროს იღებს, „ნაპოლი“ მზად არის გაზარდოს მისი ხელფასი შესაძლო პრეტენდენტების მოსაშორებლად. „ნაპოლისგან“ ეს საჭირო ნაბიჯებია“, – დაწერა იტალიურმა გამოცემა.

ნეაპოლური გუნდი ამ დღეებში თურქეთში იმყოფება და გუშინ ამხანაგურად ინგლისურ „კრისტალ პალასს“ დაუპირისპირდა.

მატჩის წინ ინგლისური გუნდის მარჯვენა მცველმა ჯოელ უორდმა ხვიჩა კვარაცხელიას შესახებ ისაუბრა.

„კვარაცხელიას შესანიშნავი თვისებები აქვს. რა თქმა უნდა, მის წინააღმდეგ თამაში ადვილი არ იქნება. ჩვენთვის ძალიან მნიშვნელოვანი მატჩია, იტალიის ჩემპიონატის ლიდერთან თამაში იქნება შესაძლებლობა გამოვცადოთ ჩვენი მდგომარეობა ძალიან კარგი ფეხბურთელების წინააღმდეგ“, – განაცხადა ჯოელ უორდმა.

გუშინდელ შეხვედრაში „ნაპოლიმ“ „კრისტალ პალასი“ დაამარცხა – 3:1. ხვიჩა კვარაცხელიამ მხოლოდ პირველ ტაიმში ითამაშა, რის შემდეგაც სპალეტიმ ის დაასვენა.

ქართველს გოლის გატანის კარგი შესაძლებლობა ჰქონდა, თუმცა კართან ახლოს ბურთის გაჩერება ვერ მოახერხა.

„კრისტალ პალასი“ პირველ ტაიმში ვილფრიდ ზაჰას გოლით დაწინაურდა, რასაც ოსიმენმა საპასუხო გოლით უპასუხა და ტაიმი 1:1 დასრულდა. მეორე ტაიმში „ნაპოლის“ მხრიდან ჯაკომო რასპადორიმ დუბლი შეასრულა და იტალიელებს თამაში მოაგებინა.

ქართველმა ფეხბურთელმა ბექა მიქელთაძემ „ნიუკასლ ჯეტსს“ ავსტრალიის ჩემპიონატის მეშვიდე ტურში მოაგებინა. 25 წლის შემტევმა ბექა დარცმელიას გადაცემით „სენტრალ კოუსტ მერინერსის“ წინააღმდეგ შეხვედრაში გამარჯვების გოლი გაიტანა. მან მატჩის შემდეგ თამაში შემდეგნაირად შეაფასა.

„ყოველთვის განსაკუთრებული გრძნობაა, როდესაც გამარჯვების გოლს იტან. მესმის, რომ გულშემატკივრებისთვის და „ნიუკასლ ჯეტსისთვის“ ეს დიდი თამაში იყო. მაგრამ, ჩვენთვის – ფეხბურთელებისთვის ყველა თამაში დერბია, ამიტომ ძალიან ბედნიერები ვართ გამარჯვებით. ბოლო ოცი წუთის განმავლობაში ტაქტიკა შევცვალეთ. ასეა, თუ გამარჯვება გინდა, უნდა იბრძოლო და ჩვენ ეს შევძელით, რაც სასიამოვნოა“, – განაცხადა ბექა მიქელთაძემ.

ბექა მიქელთაძემ მიმდინარე სეზონში „ნიუკასლ ჯეტსის“ შემადგენლობაში ხუთი თამაში ჩაატარა და მეორე გოლის გატანა მოახერხა.

საქართველოს ნაკრებისა და ფრანგული „ბორდოს“ თავდამსხმელმა ზურიკო დავითაშვილმა ამხანაგურ შეხვედრაში ინგლისის პრემიერ ლიგის წარმომადგენელის „ბრენტფორდის“ წინააღმდეგ გამოიჩინა თავი.

ფრანგული კლუბი მსოფლიო ჩემპიონატით გამოწვეული პაუზის დროს საწვრთნელ შეკრებას გადის. „ბორდომ“ ესპანეთში ამხანაგური მატჩი ინგლისის პრემიერ ლიგის გუნდის წინააღმდეგ გამართა.

ზურიკო დავითაშვილმა მატჩი ძირითად შემადგენლობაში დაიწყო და თავი 24-ე წუთზე გატანილი გოლით გამოიჩინა. პირველ ტაიმში „ბორდოს“ მხრიდან გოლი კიდევ ერთმა შემტევმა, ჯოშ მაიამ გაიტანა, საბოლოოდ კი შეხვედრა ფრანგული გუნდის გამარჯვებით, 2:1 დასრულდა.

ზურიკო დავითაშვილზე ჩამოვარდა სიტყვა და გუშინ „ტორინოს“ გულშემატკივართა ვებგვერდმა მას წერილი მიუძღვნა.

„ნებისმიერმა, ვინც „სერია A“-ს თვალს ადევნებს, ალბათ იცის, თუ რამხელა გავლენა იქონია ლიგაზე მისმა თანამემამულე კვარაცხელიამ, რომელიც „ნაპოლის“ ზაფხულის სატრანსფერო ფანჯრის დროს შეუერთდა. ის „სერია A“-ს 2022/23 წლების სეზონის ერთ–ერთი ყველაზე საინტერესო სიურპრიზია. დავითაშვილი, რომლის გვარიც ისეთივე რთულად გამოსათქმელია, როგორიც „ნაპოლიში“ მისი თანამემამულის, კიდევ ერთი პოტენციური ტალანტია.

დაბადებული დავითაშვილი მარჯვენა ფეხით თამაშობს, მისი გამორჩეული თვისებები კი სისწრაფე და მეტოქის კართან მდგომარეობის გამწვავების უნარია. ძალიან წააგავს „ნაპოლიში“ მოთამაშე თავის თანამამემამულეს – ბრწყინვალედ პოულობს სივრცეს კარში დასარტყმელად და გამოირჩევა კარგი ალღოთი.

წელს „ტორინოს“ არ ჰყავს ფეხბურთელი, რომელსაც შეეძლება თამაშში გარდატეხის შეტანა, 21 წლის ქართველს კი ამ მდგომარეობის შეცვლა შეუძლია. მისი საბაზრო ფასი დაახლოებით 2 მილიონი ევროა, რაც „ტორინოს“ ბიუჯეტის გათვალისწინებით, მისაღები უნდა იყოს. ეს იქნებოდა ერთგვარი ინვესტიცია, მომავალში კაპიტალის გაზრდის პერსპექტივით. „ტორინოს“ მთავარ მწვრთნელ ივან იურიჩთან მუშაობით, ქართველი ფეხბურთელი პროგრესისთვის მშვენიერ შანსს მიიღებდა. აშკარაა, რომ ეს ბიჭი ავლენს საჭირო თვისებებს და სათანადოდ გაწვრთნა მას ბრწყინვალე მოთამაშედ გადააქცევს. გახდება ის იტალიაში მოთამაშე მორიგ ქართველად და შეუერთდება „ტორინოს?“. – დაწერა ვებგვერდმა.

საქართველოს საკალათბურთო ნაკრების წევრი დუდა სანაძის „ანორთოსისი“ კვიპროსის ჩემპიონატის მორიგ ტურში „აპოელ“–ს ესტუმრა და მეტოქეს უმძიმეს ბრძოლაში მოუგო. დუდამ მოედანზე 44:36 წუთი გაატარა, რა დროშიც 20 ქულას, 3 მოხსნას, 3 გადაცემასა და 2 ჩაჭრას მოუყარა თავი.

მატჩის ძირითადი დრო ფრედ დასრულდა – 78:78. „ანორთოსისმა“ ოვერტაიმი 1 ქულის სხვაობით მოიგო და „აპოელი“ მიმდინარე სეზონში პირველად დამარცხდა.