გუშინ, იტალიურმა „Sky Sport“ „ნაპოლისა“ და საქართველოს ნაკრების შემტევი ხვიჩა კვარაცხელია აურელიო დე ლაურენტისის მმართველობის ეპოქაში ნეაპოლურ გუნდში საუკეთესო შენაძენად დაასახელა.
„ფაქტია, რომ ბოლო თვრამეტი წლის განმავლობაში ხვიჩა კვარაცხელია აურელიო დე ლაურენტისის საუკეთესო ტრანსფერია „ნაპოლიში“. ქართველის მიერ მოედანზე ნაჩვენები სტატისტიკა ამას ამტკიცებს. „სერია A“–ში 11 გოლში მიიღო მონაწილეობა, ყოველ 79 წუთში ან გოლს იტანს, ან საგოლე გადაცემას ასრულებს.
ეს არის ის, რამაც „ნაპოლის“ ლიდერის პოზიცია მოუტანა. პირველ სეზონში ნეაპოლში კვარაცხელიას შედეგები დე ლაურენტისის ეპოქაში არავის ჰქონია.“
ხვიჩა კვარაცხელიაზე ისაუბრა „იუვენტუსის“, „ნაპოლისა“ და იტალიის ნაკრების ყოფილმა ფეხბურთელმა ემანუელე ჯაკერინიმაც.
„ლეაუ თუ კვარაცხელია? ეჭვგარეშეა, ჩემს გუნდში კვარაცხელიას წავიყვანდი. ის არის ფეხბურთელი, რომელიც გამოირჩევა სტაბილურობით, გარდა იმისა, რომ ნიჭიერია და ხარისხი აქვს, რასაც ყველა ვხედავთ. ლეაუს აქვს ჩემპიონის თვისებები, მაგრამ ქართველის მრისხანება და სტაბილურობა უკეთესია“, – განაცხადა ემანუელე ჯაკერინიმ.
საკალათბურთო ევროლიგის მორიგ ტურში თორნიკე შენგელიას „ვირტუს ბოლონიამ“ ბერლინის „ალბას“ უმასპინძლა და მეტოქე დაამარცხა – 85:76.
თორნიკე შენგელიამ 26:15 წუთში 9 ქულა, 2 მოხსნა და 4 გადაცემა მიითვალა. ქართველმა კალათბურთელმა 6-დან 2 ორქულიანი, 1-დან 1 სამქულიანი და 3-დან 2 საჯარიმო ჩააგდო.
საკალათბურთო ჩემპიონთა ლიგის რიგით მეხუთე ტურში გიორგი შერმადინის „ლენოვო ტენერიფემ“ საბერძნეთის „პერისტერი“ დაამარცხა – 86:60 და მომდევნო ეტაპზე გავიდა.
ქართველმა კალათბურთელმა 21 წუთში 13 ქულა, 4 მოხსნა, 1 პასი, 1 ჩაჭრა და 1 დაფარება მიითვალა. შერმადინმა 7-დან 4 ორქულიანი და 6-დან 5 საჯარიმო ჩააგდო.
ცნობილი გახდა რომ კატარის მუნდიალის დატოვების შემდეგ, პორტუგალიელი კრიშტიანო რონალდო მადრიდში ჩაფრინდა და „რეალის“ ბაზაზე ინდივიდუალურად ვარჯიშობს.
37 წლის ვარსკვლავს ამჟამად შვებულების დრო აქვს, მაგრამ არ ისვენებს და თავისი ყოფილი კლუბის ბაზაზე, სადაც 2009-2018 წლებში თამაშობდა, ინდივიდუალური პროგრამით ემზადება, რომ ფორმა შეინარჩუნოს.
რონალდო ამჟამად გუნდის გარეშეა და წინადადებების მოლოდინშია. მიუხედავად იმისა, რომ მადრიდში იმყოფება, „რეალში“ მის შესაძლო დაბრუნებაზე საუბარი არ მიმდინარეობს.
რონალდომ „მანჩესტერ იუნაიტედთან“ კონტრაქტი გაწყვიტა და თავისუფალი აგენტია. პორტუგალიელს კლუბ „ალ–ნასრს“ უკავშირებენ, მაგრამ საუდის არაბეთის კლუბთან შეთანხმება არ დაადასტურა.
გუშინ ცნობილი გახდა რომ ახლო წარსულში ცნობილმა იტალიელმა ფეხბურთელმა ჯანლუკა ვიალიმ ეროვნულ გუნდში დაკავებული თანამდებობა დატოვა. ამ გდაწყვეტილების მიზეზად კიბოს დაავადების მკურნალობა სახელდება.
„შესანიშნავ ონკოლოგთა გუნდთან ხანგრძლივი საუბრის შემდეგ გადავწყვიტე, რომ დროებით შევაჩერო ჩემი დღევანდელი და მომავალი პროფესიული ვალდებულებები.
ჩემი უმთავრესი მიზანია მთელი ფსიქო–ფიზიკური ენერგია დაავადების ამ ფაზის დაძლევისკენ მივმართო, რათა, რაც შეიძლება მალე აღმოვჩნდე ახალი თავგადასავლების წინაშე და ყველა თქვენთაგანს გაგიზიაროთ ისინი“. – განაცხადა ჯანლუკა ვიალიმ
2017 წელს ვიალის პანკრეასის კიბო დაუდგინდა, რომელზეც იმავე წელს იმკურნალა, თუმცა 2021 წელს ვიალის მსგავსმა პრობლემებმა კვლავ შეაწუხა.
გუშინ ცნობილი გახდა, რომ ლონდონის „ჩელსი“ დორტმუნდის „ბორუსიის“ ახალგაზრდა თავდამსხმელი იუსუფა მუკოკოთი დაინტერესდა.
ლონდონურმა გუნდმა ფეხბურთელთან მოლაპარაკება უკვე დაიწყო. მუკოკოს გერმანულ კლუბთან კონტრაქტი მომავალი წლის ზაფხულში უსრულდება. „ჩელსის“ სურს რომ 18 წლის გერმანელი თავისუფალი აგენტის სტატუსით შეუერთდეს.
მიმდინარე სეზონში მუკოკომ დორტმუნდელთა მაისურით 22 მატჩში 6 ბურთი გაიტანა და 5 საგოლე გადაცემა შეასრულა. ის გერმანიის ნაკრების სამუნდიალო განაცხადშიც მოხვდა და ყატარის ტურნირზე ერთ მატჩში ითამაშა.
ავტორი
