გუშინ, საქართველოს ეროვნული გუნდისა და „ნაპოლის“ თავდამსხმელი ხვიჩა კვარაცხელია, ქალაქ ნეაპოლის უნივერსიტეტს ეწვია და სპეციალურ ღონისძიებას დაესწრო. ქართველმა მოთამაშემ იტალიელ ჟურნალისტებთან სპეციალური კომენტარიც გააკეთა.
„პირველი რაც აქ ჩამოსვლისას შევამჩნიე, რომ ნეაპოლელი ხალხი ფეხბურთით ცხოვრობს. ჩემთვის ამ ქალაქში პირველი თამაში სასწაული იყო და მაშინ მივხვდი, რომ პროფესიონალი ფეხბურთელი ვიყავი. ძალიან დიდი მადლობა ნეაპოლელებსა და გულშემატკივრებს, რომ მათ სახლში ასე თბილად მიმიღეს.
რთულია ყოველთვის ერთ დონეზე იყო და ისე ითამაშო, როგორც დაიწყე, მაგრამ ალბათ, ფეხბურთელის მოვალეობაც ის არის, რომ ყოველთვის ერთ დონეზე იყო, იმიტომ, რომ დიდი პასუხისმგებლობაა, როცა ამდენ ხალხს უყვარს, პატივს გცემენ და ეს უნდა დაუფასო. ჩვენი მიზანია, რომ ტიტულები მოვიგოთ, რადგან ძალიან კარგი გუნდი გვყავს. თითოეული თამაში ძალიან მნიშვნელოვანია ჩვენთვის, ყველაფერს გავაკეთებთ და ვფიქრობ, რომ ყველაფერი კარგად დამთავრდება. მარტო ვერაფერს მიაღწევ, გუნდის გარეშე არაფერია შესაძლებელია.
ნეაპოლელი ხალხისთვის ძალიან მნიშვნელოვანია და საქართველოშიც ოჯახი პირველ ადგილზეა და ამიტომ, თავს ისე ვგრძნობ, როგორც საკუთარ სახლში“, – განაცხადა ხვიჩა კვარცხელიამ..
ამასობაში, „ნაპოლის“ მთავარი მწვრთნელი ლუჩანო სპალეტი იტალიურ მასმედიაში სასტიკად გააკრიტიკეს. ეს ყველაფერი ამასწინათ, ესპანურ „ვილიარეალთან“ ამხანაგურ შეხვედრაში განცდილი მარცხის შემდეგ დაიწყო.
გამოცემამ „La Repubblica“ „ნაპოლის“ თავკაცის მუშაობის მეთოდებზე დიდი ეჭვი შეიტანა.
„უსარგებლო ექსპერიმენტები, საუკეთესო შემთხვევაში, დროის ფლანგვაა. იმედი მაქვს, სპალეტი კარგად იაზრებს რამხელა პერსპექტივა აქვს მას, „ნაპოლის“, დე ლაურენტისს, ჯუნტოლის და „ნაპოლის“ ფანებს. ვერაფრით მოვიწონებ ახალ ტაქტიკას, რაც „ვილიარეალთან“ მატჩში გამოიცადა. ამან შეიძლება იტალიის ჩემპიონობის წაგება გამოიწვიოს. „ნაპოლი“ ლიდერობს, გუნდი უკვე მანქანაა, ამ ყველაფერს შეცვლა არ სჭირდება, მხოლოდ – გაძლიერება. ეს ნეაპოლია! სპალეტის ნარცისიზმზე ყოველთვის ვეჭვობდი, თუმცა ის სეზონის პირველ ნახევარში უნაკლო იყო და ასე უნდა გააგრძელოს მეორეშიც.
„ნაპოლი“ ფენომენალური იყო, სტანისლავ ლობოტკა სამკაციან შუახაზში კარგია, მაგრამ ორკაციანში – უსარგებლო. შესაძლოა, ანტიბიოტიკი დაავადების წინააღმდეგ სასარგებლოა, მაგრამ იმავე ანტიბიოტიკს დეპრესიის წინააღმდეგ აზრი არ აქვს.
ჩვენ ვნახეთ, რომ ხვიჩა კვარაცხელიაც პრობლემაა „ნაპოლისთვის“. მას საკმაოდ გაუცდა და „ვილიარეალთან“ გამოჩნდა, რომ ფეხბურთელი ჯერ ბოლომდე მზად არ არის“. – დაწერა იტალიურმა გამოცემამ.
მსოფლიო ფეხბურთში ახალი რევოლუციური ნაბიჯი მზადდება. ცნობილი იყო რომ 2025 წლიდან მსოფლიოს საკლუბო პირველობა გათამაშდება. ამას კიდევ ერთი საინტერესო პროექტი დაემატა.
გუშინ გამოცემამ „Daily Mail” გაავრცელა ინფორმაცია, რომ საკლუბო მსოფლიო ჩემპიონატის გარდა, ფიფას პრეზიდენტს, ჯანი ინფანტინოს, მსოფლიო ჩემპიონატების სამ წელიწადში ერთხელ ჩატარება სურს.
ინფანტინო დარწმუნებულია, რომ ევროპული ზამთრის შუაში ტურნირის ჩატარებამ გაამართლა, კატარის მუნდიალი გარდამტეხი მომენტი აღმოჩნდა და გვიჩვენა, რომ სპორტის ზრდა და გლობალურობა მეტად შესაძლებელია.
ინფანტინოს ახალი მიზანი გაუჩნდა – შექმნას რადიკალურად ახალი სატურნირო ციკლი, რომლის განმავლობაში მუნდიალები ყოველ სამ წელიწადში ერთხელ გაიმართება.
ეს ცვლილებები მხოლოდ 2030 წლის მსოფლიო ჩემპიონატის შემდეგ შეიძლება მოხდეს, რადგან მანამდე საერთაშორისო კალენდარი თითქმის შედგენილია.
გამოცემა „La Gazetta dello Sport“-ის მტკიცებით, ტურინის „იუვენტუსი“ არგენტინელ თავდამსხმელთან, ანხელ დი მარიასთან კონტრაქტის გახანგრძლივებას აპირებს.
34 წლის მოთამაშე „იუვენტუსში“ მიმდინარე წლის ზაფხულში გადავიდა და ერთწლიან ხელშეკრულებას მოაწერა ხელი.
ახლო წარსულში ცნობილმა ინგლისელმა ფეხბურთელმა უეინ რუნიმ კილიან მბაპეს შესახებ ისაუბრა და გარკვეული რჩევებიც მისცა.
„ვფიქრობ, მბაპემ „პსჟ“ უნდა დატოვოს და ინგლისის პრემიერლიგაში წავიდეს. „პსჟ“ დიდი კლუბია, მაგრამ კილიანმა საფრანგეთში უკვე ყველაფერს მიაღწია. ალბათ, „მანჩესტერ იუნაიტედში“ ან მადრიდის „რეალში“ უნდა წავიდეს, თუ მას სურს, რომ მესისა და რონალდუს დონემდე მიაღწიოს“, – განაცხადა უეინ რუნიმ.
ესპანური გამოცემა „Marca“–ს ინფორმაციით კი პორტუგალიელი კრიშტიანო რონალდუ უახლოეს დღეებში „ალ ნასრის“ ფეხბურთელი ოფიციალურად გახდება.
ცნობილი გახდა, რომ რონალდუ ამჟამად დუბაიში იმყოფება და რამდენიმე დღეში რიადში გაემგზავრება, სადაც 2,5 წლიან კონტრაქტს გააფორმებს და სეზონში 200 მილიონ ევროს მიიღებს.
ავტორი
