გუშინ, იტალიურმა ტელეკომპანია „DAZN“ საქართველოსა და „ნაპოლის“ თავდამსხმელ ხვიჩა კვარაცხელიას ესაუბრა. ქართველმა ქალაქ ნეაპოლზე, იტალიელ გულშემატკივრებზე, კლუბის მთავარ მწვრთნელსა და მომავლის გეგმებზე ისაუბრა.
„ქალაქი ფანტასტიკურია თავისი სილამაზით და ნეაპოლელებიც განსაკუთრებულნი არიან. ჩემთვის ეს ქალაქი სიყვარულია. მოლაპარაკებები დიდი ხანი გაგრძელდა. ძალიან ბედნიერი ვიყავი, რომ გუნდი ჩემით იყო დაინტერესებული და ერთი სული მქონდა „ნაპოლის“ მაისური ჩამეცვა. როდესაც ვუყურებდი მათ მატჩებს, ვფიქრობდი, რომ ამ გუნდში კარგად თამაში შემეძლო. ძალიან მომწონდა „ნაპოლის“ თამაში.
ჯერ შორს ვარ საუკეთესო ფეხბურთელობისგან, მაგრამ ზრდისთვის ყველაფერს გავაკეთებ. ლუჩანო სპალეტის ყველა ფეხბურთელთან კარგი ურთიერთობა აქვს, ის ძალიან ღია ადამიანია და ჩემთვის განსაკუთრებულია.
სკუდეტო? წინ ჯერ კიდევ ბევრი თამაშია და ჩვენთვის თითოეული მატჩი მნიშვნელოვანი იქნება. რონალდუ თუ მესი? ძალიან რთულია მათ შორის არჩევანის გაკეთება, მაგრამ ჩემი კუმირი რონალდუა“, – განაცხადა ხვიჩა კვარაცხელიამ.
ბრაზილიური მასმედიის მტკიცებით, ამ ქვეყნის ეროვნულ გუნდს ახლო წარსულში გამოჩენილი ფრანგი ფეხბურთელი ზინედინ ზიდანი ჩაიბარებს.
ტიტეს წასვლის შემდეგ ბრაზილიური ფეხბურთის მამები ნაკრების მთავარი მწვრთნელის თანამდებობაზე ხოსეპ გვერდიოლას, კარლო ანჩელოტის, ჟოზე მოურინიოსა და რაფაელ ბენიტესს განიხილავენ. გუშინ გამოიკვეთა კიდევ ერთი რეალური ვარიანტი – ზინედინ ზიდანი. საფრანგეთის ფეხბურთის ფედერაცია ორჭოფობს და არ იცის, გაუშვას თუ დატოვოს დეშამი, რომელმაც ზედიზედ მეორე მუნდიალზე ნაკრები ფინალში გაიყვანა.
თავად დეშამი წასვლას არ აპირებს. სწორედ ამ სიტუაციის გარკვევას ელოდება ზიდანიც. თუმცა დიდი ცდუნებაა, როდესაც ბრაზილიის ნაკრებში გიხმობენ.
გუშინ, ცნობილი გახდა რომ ნიდერლანდური „პსვ“–ს შემტევი კოდი გაკპო, კარიერას „ლივერპულში“ გააგრძელებს, რომელიც ახალ გუნდს ზამთრის სატრანსფერო ფანჯრის გახსნის შემდეგ იანვარში შეუერთდება.
ახლახან დასრულებულ კატარის მსოფლიო ჩემპიონატზე გაკპომ ნიდერლანდების ნაკრებში ხუთი მატჩი ჩაატარა და სამი ბურთი გაიტანა. ის ერთ–ერთი ყველაზე გამორჩეული მოთამაშე იყო ტურნირზე.
„ნაპოლიში“ ხვიჩა კვარაცხელიას თანაგუნდელი, ვიქტორ ოსიმენით კი „მანჩესტერ იუნაიტედი“ სერიოზულად დაინტერესდა. ბრიტანული მედიის მტკიცებით, გუნდის მთავარი მწვრთნელი ერიკ ტენ ჰაგი გუნდიდან წასული კრიშტიანო რონალდოს შემცვლელის ძიებაშია და გასაძლიერებლად 23 წლის ნიგერიელ თავდამსხმელს განიხილავს.
ბოლო დრომდე „მანჩესტერ იუნაიტედში“ რონალდუს ადგილზე მთავარ კანდიდატად ნიდერლანდელი კოდი გაკპო სახელდებოდა, მაგრამ „ეინდჰოვენისა“ და ნიდერლანდების ნაკრების 23 წლის ფეხბურთელისთვის ბრძოლაში „ლივერპულმა“ დაასწრო და როგორც გუშინ გაირკვა, საკმაოდ წარმატებითაც.
„მანჩესტერ იუნაიტედს“ ვიქტორ ოსიმენის დამატება ზამთრის სატრანსფერო ფანჯრის პერიოდში სურს. ფეხბურთელს „ Transfermarkt” 70 მილიონ ევროდ აფასებს.
გუშინ, ნიდერლანდების ნაკრების ყოფილმა ვარსკვლავურმა მოთამაშემ, რუუდ გულიტმა გასული მსოფლიოს ჩემპიონატის შედეგები შეაფასა:
„არ მიმაჩნია, რომ მესი ყველა დროის საუკეთესოა. თანამედროვეობაში ის პირველია, თუმცა, ყველაფრის შედარება არ შეიძლება. თუკი თქვენ მსოფლიოს ჩემპიონატს სამჯერ მოიგებთ, ეს ნამდვილად შთამბეჭდავი შედეგი იქნება. სწორედ ამიტომ გასული საუკუნის 60–70-იანი წლები პელეს ეპოქა იყო, შემდეგ კი მარადონას დრო დადგა. რაც შეეხება მბაპეს, ვთვლი, რომ ის ნამდვილი ბოსია. მიუხედავად იმისა, რომ „რეალში“ ტრანსფერი არ შედგა და უდიდესი ზეწოლის ქვეშ თამაშობდა, უბრალოდ, გოლების გატანა განაგრძო. მსოფლიოს ჩემპიონატის ფინალში 70 წუთი არ სჩანდა, შემდეგ კი, ორ წუთში 2 გოლი გაიტან“. – განაცხადა რუუდ გულიტმა.
გუშინ, ახლო წარსულში ცნობილი ირანელი ფეხბურთელის ალი დაეის ოჯახს ქვეყნის დატოვების უფლება არ მისცეს და უკან, პირდაპირ თვითმფრინავიდან დააბრუნეს.
ირანის ნაკრების ყველა დროის საუკეთესო თავდამსხმელი მეუღლესა და ქალიშვილს დუბაიში ელოდა და მათ რეისზე რეგისტრაცია პრობლემების გარეშე გაიარეს.
თვითმფრინავი უკვე გზაში იყო, როდესაც მოულოდნელად ის სპარსეთის ყურის ერთ–ერთ კუნძულზე დასვეს და დაეის ოჯახის წევრები რეისიდან ჩამოსვეს.
„თუკი მათ ქვეყნის დატოვება აკრძალული ჰქონდათ, შეეძლოთ, ამის შესახებ საპასპორტო კონტროლის დროს ეთქვათ. შექმნილ სიტუაციაზე განმარტების გაკეთება არავის უფიქრია” – განაცხადა ალი დაეიმ.
53 წლის დაეი ერთ–ერთი პირველი იყო, რომელიც ირანსი აგორებულ პროტესტს შეუერთდა და ამის გამო მას პასპორტიც ჩამოართვეს, თუმცა ხალხის პროტესტის შემდეგ, ის მალევე უკან დაუბრუნეს.
ავტორი
