პარლამენტთან გუშინ “უცხოური გავლენების გამჭვირვალობის” შესახებ კანონპროექტის გასაპროტესტებელი მშვოდობიანი აქცია ძალადობაში გადაიზარდა. მომიტინგეების წინააღმდეგ სპეცრაზმმა წიწაკის სპრეი, ცრემლსადენი გაზი და წყლის ჭავლი არაერთხელ გამოიყენა. თავის მხრივ გაღიზიანებულმა დემონტრანტებმაც პარლამენტის შენობისა და შსს-ს თანამშრომლების მიმართულებით ქვები და აალებადი საშუალებები ისროლეს.გუშინ პარლამენტთან განვითარებული მოვლენების შეფასება “ლელოს” ლანჩხუთის ორგანიზაციის ხელმძღვანელს, გოჩა ჯანაშიას ვთხოვეთ.
_ ბატონო გოჩა, როგორ ფიქრობთ, იდგა აქციის მონაწილეების რამდენიმე ეტაპად დარბევის აუცილებლობა?
_ აუცილებლობა, როგორც ასეთი არ იყო, მაგრამ როცა მიტინგს ვატარებთ ვაკონტროლოთ უნდა. იქ ძალიან ბევრი ადამიანია. ეს 20 ივნისსაც გამოვლინდა და ახლაც ჩანდა, რომ არიან პროვოკატორები, რომლებიც წინა პლანზე დგებიან და სხვადასხვა პროვოკაციებს აკეთებენ და იქმნება იმის ილუზია, რომ მოხდეს დარბევა. ფაქტია, რომ ეს სადამსჯელო ოპერაცია დაიწყო უბრალო პროტესტის ფონზე და არავითარ კანონდარღვევას ადგილი არ ჰქონია. პირველად გამოიყენეს წიწაკის სპრეი, შემდეგ მოხდა გაღიზიანება. იქ შეიძლებოდა უფრო მშვიდობიანად წარმართულიყო პროცესები, მაგრამ სამწუხაროდ, ამ სიტუაციის არაკანონიერების ჩარჩოში მოქცევა აწყობდა ხელისუფლებას, რომ დაერბია მოქალაქეები”,_ გვიპასუხა ჯანაშიამ.
მან სოციალურ ქსელში პოსტიც გამოაქვეყნა, სადაც ამბობს, რომ ბიძინა ივანიშვილის და “ქართული ოცნების” ერთადერთი საფიქრალი კარს მომდგარი არჩევნების გადაგორებაა. რისთვისაც ე.წ. “აგენტების კანონი” მოიფიქრეს.
“ძალაუფლების შენარჩუნება ძალიან ძნელი საქმეა, “ქართული ოცნების” და ბიძინა ივანიშვილის ერთადერთი საფიქრალი, ხომ 2024 წლის არჩევნების მოგებაა. შიშს დიდი თვალები აქვს და მილიარდობით მოქუჩებული ქონების დაკარგვა არავის უნდა. ჰოდა, ვირეშმაკულად დაიწყეს ფიქრი, როგორ გადააგორონ ეს არჩევნები. პროპორციულ სისტემას ვერაფერს უზამენ და ერთი შანსი რჩებათ, მართლა ძალადობრივად და ხელების გადაგრეხვით მიაღწიონ მიზანს. ამისთვის მოიგონეს ეს ამერიკულ-რუსულ-უნგრული კანონი, რომლითაც ეცდებიან სამოქალაქო საზოგადოებისა და არასამთავრობო სექტორის განეიტრალებას. ყველაფერზე წამსვლელები რომ არიან, ეს ცხადია და ამ კანონით დიდ რეპრესიებს გეგმავენ. რა ევროკავშირი, რის ღირსება, მათთვის მხოლოდ ხელისუფლების შენარჩუნებაა თვითმიზანი და წარმოიდგინეთ, რას იკადრებენ საამისოდ. თან უცბად საყოველთაო გაწვევა მოუნდათ, განა იმიტომ, ჯარი ანაღვლებთ. არა, ბატონებო და ქალბატონებო, წვევამდელებს მასიურად გაიწვევენ და არჩევნებისას მათ ხმებს დაისაკუთრებენ. ეგაა მხოლოდ მათი ჩანაფიქრი.
მაგრამ ამ “ჭინჭიან აფერისტებს” არაფერი გამოუვათ. მალე მაშველ რგოლად მოციმციმე რუსული ურდოც დაეშლებათ და მარჩენალის ფულებსაც შავი დღე ელის. ჰოდა, რაღა იქნებიან ის მარიონეტი მონები, ვინც ახლა სპეცნაზით და პოლიციური მანქანებით ყოყლოჩინობენ, იმასაც ვნახავთ. ქოცხროვა, დგება თქვენი აღსასრულის ჟამი!!!“_ წერს ჯანაშია სოციალურ ქსელში.
როგორც ცნობილია, გუშინდელ აქციაზე წინააღმდეგობის გაწევისა და წვრილმანი ხულიგნობისთვის პოლიციამ 66 ადამიანი დააკავა. დაკავებულებს შორის არის ზურაბ გირჩი ჯაფარიძეც. გავრცელებული ინფორმაციით, ის ნაცემია.
“როგორც ამბობენ და შესაბამისი კადრებიც არსებობს, თუმცა მე არ მინახავს, რომ ძალადობრივად მოხდა მისი დაკავება და ფიზიკურ ანგარიშსწორებას ჰქონდა ადგილი. ძალიან ცუდია, რომ პარტიის ლიდერს ასე ექცევიან”,_ განაცხადა გოჩა ჯანაშიამ ჩვენთან საუბრისას და აღნიშნა, რომ აპირებს თბილისში აქციას შეუერთდეს.
“წასვლა ვერ შევძელი, თუმცა აქციას რამდენიმე დღეში შევუერთდები”,_ გვითხა მან.
