“თანხის გაცემა დაიწყო” _ თხილის წარმოების ხელშეწყობის პროგრამა და გამოწვევები

თხილის წარმოების ხელშეწყობის პროგრამის ფარგლებში ფართობების გარკვეულ ნაწილზე თანხა უკვე გაიცა.

პროგრამის ფარგლებში, თხილის ბაღების მფლობელებს, მცენარეთა მოვლის საშუალებების შესაძენად, ბარათზე ერიცხებათ ქულები _ 1 ჰექტარზე 500 ლარის ოდენობით. მნიშვნელოვანია, რომ მიმდინარეობს თხილის ბაღების მესაკუთრეთა კადასტრის შექმნაც, რომლითაც სრულად მოხდება არსებული ბაღების აღწერა და ინვენტარიზაცია.

“გურია ნიუსმა” სცადა, გაერკვია, როგორ მიმდინარეობს პროგრამა ჩოხატაურში, რამდენი ფართობია აღწერილი, რა სახის ხარვეზები ვლინდება რეგისტრაციის პროცესში. ამ საკითხების შესახებ სოფლის განვითარების სააგენტოს ჩოხატაურის საინფორმაციო-საკონსულტაციო ცენტრის ხელმძღვანელს, მანანა მინდაძეს ვესაუბრეთ.

როგორც მანანა მინდაძე ამბობს, ზუსტი ინფორმაცია იმის შესახებ, თუ თხილის რა ფართობს ფლობენ ჩოხატაურში, პროგრამის დასრულების შემდეგ ეცოდინებათ.

“აქამდე არსებული სტატისტიკური მონაცემებით, გვქონდა დაახლოებით 3000-მდე თხილის ფართობი აღწერილი. ეს აღწერა იყო ზეპირსიტყვიერი გამოკითხვით. მათ შორის, ზოგს ჰქონდა დარეგისტრირებული და ზოგს _ არა. ზუსტად თხილის რა ფართობს ვფლობთ ჩოხატაურში, გვეცოდინება რეგისტრაციის დასრულების შემდეგ, როცა კადასტრი მორჩება. ჯერ არ არის პროგრამა დახურული”, _ ამბობს მინდაძე.

რაც შეეხება ფერმერებზე თანხის გაცემას, ქალბატონი მანანა აღნიშნავს, რომ თანხა გაიცემა ყველა ფერმერზე, ვისი დარეგისტრირებაც 28 თებერვლამდე მოესწრო, თუმცა, ამ დროისთვის რამდენმა ფერმერმა შეძლო პროგრამით სარგებლობა, ვერ აკონკრეტებს:

“თანხა მიეცემა ყველას, ვისი დარეგისტრირებაც მოესწრო 28 თებერვლამდე. იმათი თანხები ნელ-ნელა, ეტაპობრივად გაიცემა. ჩვენ ვერ ვაკონტროლებთ, ვინ აიღო თანხა და ვინ _ არა. ჩვენ გადავეცით იმ ფერმერების მონაცემები შტაბს, ვისი კადასტრიც დასრულებულია, გაკეთებულია ხელშეკრულება “ლიბერთი ბანკთან” და როცა გადაამოწმებენ და ნახავენ, რომ ყველაფერი სწორადაა, შემდეგ ეგზავნება ბანკს”, _ ამბობს მინდაძე.

ჩვენს კითხვაზე, რეგისტრაციის პროცესში ხარვეზების გამოვლენის შესახებ კი გვპასუხობს:

_ არის შემთხვევები, როცა ფერმერი ვერ პოულობს თავის მიწის ნაკვეთს ელექტრონულ ნუსხაში, შემდეგ გვიწევს ადგილზე გასვლა და აღწერა. ზოგჯერ ისეც ხდება, ელექტრონულად ჩანს, რომ ფერმერის ნათქვამზე ნაკლებია ფართობი, ამას გადამოწმება სჭირდება, ხან ელექტრობა არ არის და ამითაც ხელი ეშლება რეგისტრაციის პროცესს. გარდა ამისა, ზოგმა ვერ მოახერხა მოსვლა, ზოგს ოჯახის წევრი ჰყავდა საზღვარგარეთ და მინდობილობა ვერ აიღო.

პროგრამის შესახებ საუბრისას მინდაძე აღნიშნავს, რომ პროგრამის მიზანი მეთხილეობის დარგის განვითარების და საექსპორტო პოტენციალის ზრდის ხელშეწყობაა.

“ამ პროგრამას აქვს დიდი მნიშვნელობა, სოფლის მეურნეობის სამინისტროსთვის და ზოგადად, სახელმწიფოსთვის. როცა გინდა, ფერმერს დაეხმარო, უნდა იცოდე, რას ფლობს. ჩვენ გვქონდა ბაღები გაშენებული, ზოგი _ დარეგისტრირებული და ზოგი _ დაურეგისტრირებელი. წარმოდგენა არ გვქონდა, რა ფართობზე იყო თხილი გაშენებული. ახლა ვაკეთებთ ზუსტ აღრიცხვას, რომელ მუნიციპალიტეტში, რომელ სოფელში რა ჯიში არსებობს, როდის მოუარა ამ ფერმერმა, შეწამლულია თუ არა მისი ნარგავები, რა პროცედურები ჩაატარა. ეს მთელი ინფორმაცია არის მითითებული ამ საკადასტრო ველში და ეს უმნიშვნელოვანესია _ როცა საზღვარგარეთ გაგაქვს თხილი, დიდი ყურადღება ექცევა გეოგრაფიულ არეალს, ჯიშს. გარდა ამისა, როცა სახელმწიფოს სურს, დაეხმაროს ფერმერს, სახელმწიფომ უკვე იცის, რომ ამ ფერმერს აქვს ერთი ჰექტარი, ორი ჰექტარი და იმის მიხედვით ეხმარება. მაგალითად, როგორც წელს ვეხმარებით ფერმერებს შესაწამლი პრეპარატების შესყიდვაში. ფაქტობრივად, ვყიდულობთ იმის მიხედვით, ვის რამდენი ფართობი აქვს. თხილის ხარისხი ძალიან დავარდა, გაფუჭდა. შარშან ძალიან ცუდი ხარისხის თხილი იყო. ეს გამოიწვია კლიმატურმა პირობებმა, მაგრამ თუ კი თხილს სწორად მოვუვლით, იმ ცუდ კლიმატურ პირობებშიც შეიძლება კარგი ხარისხის მოსავლის მიღება, რადგან თუ თხილის შეწამლულია, ნაწილი დაავადებებისა მასზე აღარ მოქმედებს, მთელი რიგი ღონისძიებები უნდა ჩატარდეს, რომ მოსავალი მივიღოთ მაღალხარისხიანი”, _ ამბობს მინდაძე.

ინფორმაციისთვის, 2 მარტს, ურეკის საზოგადოებრივ ცენტრში აღნიშნული პროგრამის დეტალების განხილვის მიზნით, გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი, დასავლეთ საქართველოში, ადგილობრივი ხელისუფლების წარმომადგენლებს და ფერმერებს შეხვდა.

“გარკვეული პერიოდის განმავლობაში, მსოფლიო ბაზარზე თხილის ფასი შემცირდა, რის გამოც, მეთხილე ფერმერებმა, გარკვეულწილად, თხილის ბაღების მოვლის მოტივაცია დაკარგეს. ახალი პროგრამა იქნება სტიმული და ხელს შეუწყობს ფერმერების მოტივაციის ზრდას. თხილის მოვლის საშუალებების შეძენა, რომელსაც სახელმწიფო აფინანსებს, სერტიფიცირებულ მაღაზიებში იქნება შესაძლებელი”, _ განაცხადა გიორგი ხანიშვილმა.

ურეკის საზოგადოებრივ ცენტრში გამართულ სახელმწიფო რწმუნებულის მოადგილე გურიის რეგიონში ქეთევან მოისწრაფეშვილიც ესწრებოდა. მისი თქმით, გურიის რეგიონში აქტიურად მიმდინარეობს თხილის კადასტრის პროგრამა. უმეტეს სოფლებში მონაცემების შეჯამება უკვე დასრულდა.

როგორც სურსათის ეროვნული სააგენტოს უფროსმა, ზურაბ ჩეკურაშვილმა აღნიშნა, ფერმერების ინტერესების დაცვის მიზნით, სააგენტო მაქსიმალურად აკონტროლებს ბაზარზე განთავსებული პესტიციდებისა და აგროქიმიკატების ხარისხს. ამავდროულად, მავნებლებისგან თხილის დასაცავად, წელსაც გაგრძელდება აზიურ ფაროსანასთან ბრძოლის ღონისძიებები.

გარემოს დაცვისა და სოფლის მეურნეობის სამინისტროს ინფორმაციით, მთელი ქვეყნის მასშტაბით, პროგრამის ფარგლებში, დღეის მდგომარეობით, 37 ათასი ჰექტარი ფართობი თხილის ბაღია რეგისტრირებული; ბაღების მფლობელების, თანამესაკუთრეების ჩათვლით, რაოდენობა 85 ათასზე მეტს შეადგენს.