საქართველოს ეროვნული გუნდისა და „სან ანტონიოს“ შემტევი სანდრო მამუკელაშვილი ამჟამინდელ გუნდში თანდათან წამყვან პოზიციებზე მკვიდრდება. ტეხასურ კლუბში უკვე არ მალავენ, რომ მომავალ სეზონში ქართველის დიდი იმედი გააჩნიათ.
გუშინ, საქართველოს ნაკრების თავდამსხმელმა მორიგი შედეგიანი შეხვედრა ჩაატარა და ახალ გუნდში ჩაგდებული ქულების პირადი რეკორდი გააუმჯობესა, თან თამაში ძირითად ხუთეულში დაიწყო.
მისი საუკეთესო მატჩი „ნიუ ორლეანს პელიკანსის“ წინააღმდეგ შედგა, სადაც მამუკელაშვილმა 25:20 წუთი გაატარა. ამ დროში სანდრომ 20 ქულა, 5 მოხსნა, 3 გადაცემა და 3 ჩაჭრა დააგროვა, თუმცა „სან ანტონიო“ დიდი ანგარიშით დამარცხდა – 84:119.
მატჩის შემდგომ პრესკონფერენციაზე სანდრო მამუკელაშვილმა შემდეგი განცხადება გააკეთა:
„ვფიქრობ დღეს ძალიან კარგი შეხვედრა ჩავატარეთ. მიუხედავად იმისა, რომ ბევრი მოთამაშე გვაკლდა, საკმაოდ კონკურენტუნარიანები ვიყავით. ვიცით, რომ დანაკლისი გვაქვს, თუმცა ჩვენი თამაში და ერთმანეთის ნდობა უნდა განვაგრძოთ. როდესაც გულით თამაშობ, ყველაფერი შესაძლოა გამოვიდეს.
ლიგაში ძალიან დიდი კონკურენციაა, ასე რომ, როდესაც შანსი გეძლევა, ეს შესაძლებლობა უნდა გამოიყენო. ძირითად შემადგენლობაში თამაში მეორედ დავიწყე, რის გამოც საშუალება მქონდა, რომ თავისუფლად მეთამაშა, შეცდომებიც დამეშვა, თუმცა შემდეგ, ამ შეცდომებზე მესწავლა. მადლიერი ვარ ამ შესაძლებლობით.
მწვრთნელი გვეუბნება, რომ ერთად განვაგრძოთ თამაში, ერთმანეთს ვენდოთ და ერთად ვიყოთ. ბოლო მატჩებია და გვსურს, რაც შეიძლება მეტად დავიხარჯოთ. დანარჩენს დრო აჩვენებს.
„მილუოკი“ ძალიან მიყვარს. ჩემი პირველი ნაბიჯები სწორედ იქ გადავდგი. მათ მე დრაფტზე ამიყვანეს, ოცნება ამისრულეს და შესაძლებლობა მომცეს, რომ ლიგის საუკეთესო მოთამაშეების გვერდით მეთამაშა. უკან დაბრუნებას და მათთან შეხვედრას მოუთმენლად ველი. ბობი პორტისთან და ჯრუ ჰოლიდეისთან დღემდე კარგი ურთიერთობა მაქვს. მე წავედი, თუმცა მათ დღემდე ვეხმიანები.
იანის ანტეტოკუნმპოსთან შეხვედრას ძალიან ველი. მის წინააღმდეგ 1.5 წელი ვითამაშე და ვერ ვიტყვი, რომ კარგი შედეგი მქონდა, თუმცა მისგან ვისწავლე, თუ როგორ ვიყო მენტალურად უფრო ძლიერი, როდესაც საქმეები კარგად არ მიმდის. მის წინააღმდეგ თავის დაცვას ველოდები, რათა გავიგო ის, თუ რა ვისწავლე. ვერ ვიტყვი, რომ მისი ყველა ხრიკი ვიცი. ის ლიგაში ერთ-ერთი საუკეთესო მოთამაშეა, თუმცა რაღაცები ნამდვილად ვიცი მის შესაჩერებლად. როგორც უკვე ვთქვი, უბრალოდ მსურს მოედანზე გავიდე და რაც შეიძლება მეტად დავიხარჯო. როდესაც ლიგის საუკეთესო მოთამაშის წინააღმდეგ თამაშობ, პარკეტზე რაც შეიძლება მყარად უნდა იდგე“.
გუშინ, გამოცემა „Sky Sport“-ის ჟურნალისტმა ლუკა მარკეტიმ ხვიჩა კვარაცხელიას მომავალზე ისაუბრა:
„სულ მცირე ერთი წელი ის „ნაპოლიში“ დარჩება. კონტრაქტი გახანგრძლივდება, რაც საშუალებას მისცემს მას გამოიმუშაოს ის, რასაც იმსახურებს, ხოლო კლუბს მისცემს საშუალებას ჰქონდეს ძალა, რომ მდიდარ კლუბებს კონკურენცია გაუწიოს. „ნაპოლი“ მომავალს კვარას გარშემო ააშენებს“.
ხვიჩა კვარაცხელიას „ნაპოლისთან“ კონტრაქტი 2027 წლის ზაფხულამდე აკავშირებს. იტალიური მედიის ცნობით, ხელშეკრულება 2028 წლამდე განახლდება, ხოლო ხელფასზე ორგვარი ინფორმაცია ვრცელდება: ერთი მხრივ, სეზონში 2.5 მილიონი ევრო და ბონუსები, მეორე მხრივ, 3 მილიონი ევრო და ბონუსები.
გუშინ, ესპანურმა გამოცემამ „Superdeporte“ საქართველოს ნაკრებისა და „ვალენსიას“ კარის დარაჯ გიორგი მამარდაშვილს სპეციალური წერილი მიუძღვნა.
„მართალია, გიორგი მამარდაშვილის სეზონს ბრწყინვალეს ვერ ვუწოდებთ, მაგრამ „ვალენსიას“ 2022/23 წლების სეზონში, რომელიც სწრაფად დასავიწყებელია, თუ ვინმე თამაშობდა რეგულარულად და საიმედოდ, ერთ-ერთი მათგანი სწორედ 22 წლის კარის დარაჯი იყო. საქართველოს ნაკრების მეკარე ერთ-ერთი იშვიათი დადებითი მოვლენაა „ვალენსიაში“ მას შემდეგ, რაც აგვისტოში ჩემპიონატი დაიწყო. მეკარე ხელშეუხებელი იყო როგორც ჯენარო გატუზოს და ვორო გონსალესის, ისე – რუბენ ბარახას გუნდში და ზედიზედ მეორე წელია, კარში ადგილი გარანტირებული აქვს. ცნობისთვის, მთელ გუნდში ყველაზე უსაფრთხო და სტაბილური რგოლი, თავდასხმის, ნახევარდაცვისა და დაცვის ფონზე, სწორედ კარია.
გიორგისთვის ეს წელი წარუმატებელი იყო, როგორც სხვა დანარჩენებისთვის. ქართველი უშვებდა მისი დონისთვის შეუფერებელ შეცდომებს, განსაკუთრებით მაღალ ბურთზე ბრძოლასა და ფეხით თამაშის დროს, მაგრამ მისი საერთო სარგებლიანობა უფრო მაღალია, ვიდრე მის გუნდში დანარჩენი მინდვრის მოთამაშეების. ამიტომაც იყო, რომ მას „ლა ლიგის“ საკმაოდ ბევრ ტურში გუნდში საუკეთესო მოთამაშედ ასახელებდნენ.
მეკარის მოქმედებების წყალობით, „ვალენსია“ რამდენიმე თამაშში წაგებას გადაურჩა, რამდენიმე კი მოიგო. ამ დროისთვის გუნდის აქტივში არსებული 26 ქულიდან 7 უშუალოდ მისი დამსახურებაა. ბევრი არ არის, მაგრამ საკმარისია იმისთვის, რომ გუნდმა „ლა ლიგაში“ ადგილის შენარჩუნებისთვის ბრძოლა გააგრძელოს. დასანანი ის არის, რომ მისი ბევრი სეივი არ აღმოჩნდა ვალენსიასთვის ქულების მომტანი.
მამარდაშვილი მოგერიებების რაოდენობით „ლა ლიგაში“ მეხუთე მეკარეა. ჯამში ქართველს 78 მოგერიება აქვს და საშუალო მაჩვენებლით (თამაშში 3) უკან იტოვებს მარკ ანდრე ტერ შტეგენს („ბარსელონა“), ტიბო კურტუას („რეალი“), იან ობლაკსა („ატლეტიკო“) და უნაი სიმონს („ატლეტიკი“).
მამარდაშვილმა „ვალენსიასთან“ ახალი კონტრაქტი გააფორმა და მის ღირსებას 2027 წლის 30 ივნისამდე დაიცავს, პირგასამტეხლო თანხა კი 100 მილიონი ევრო იქნება. მისით არაერთი ევროპული გუნდია დაინტერესებული და შესაბამისად, ზაფხულის სატრანსფერო ფანჯრის დროს ქართველზე სალაპარაკო აუცილებლად გვექნება. ბოლო სიტყვას კი, როგორც ყოველთვის, „ვალენსიას“ მფლობელი პიტერ ლიმი იტყვის“.
ავტორი
