როგორც წინა წლებში, ლანჩხუთის მუნიციპალიტეტის 2023 წლის ბიუჯეტშიც ერთ-ერთ მთავარ პრიორიტეტად სოციალური პროგრამების დაფინანსებაა წარმოჩენილი. სოციალური პრიორიტეტების დასაფინანსებლად წელს ბიუჯეტი 862 ათას ლარს გაიღებს, რაც ჯამში, 25 სხვადასხვა პროგრამაზეა გადანაწილებული.
ცელიაკიით დაავადებულთა (18 წლამდე) კვებითი დანამატებით უზრუნველყოფისთვის ბიუჯეტში 3 600 ლარის დაფინანსებაა გაწერილი და პროგრამა, გასული წლის მსგავსად, გათვლილია ერთ ბენეფიციარზე, რომელიც დახმარებას მიიღებს ყოველთვიურად, თვეში არა უმეტეს 300 ლარისა.
აუტისტური სპექტრის მქონე ბავშვთა სარეაბილიტაციო კურსის დაფინანსებისთვის კი, 82 ათასი ლარია გათვალისწინებული და პროგრამა, როგორც 2022 წელს, ამჯერადაც 15 ბენეფიციარზეა გათვლილი.
უკიდურესად შეჭირვებული ხანდაზმულებისა და შეზღუდული შესაძლებლობების მქონე პირთა უფასო კვებაში წელს 130 ათასი ლარია გათვალისწინებული პროგრამის დასაფინანსებლად და წელს ამ პროგრამით 115 ბენეფიციარი ისარგებლებს, რომელთა სარეიტინგო ქულა 0-დან 65 ათასის ჩათვლითაა.
მრავალშვილიანი ოჯახების დახმარების პროგრამის დასაფინანსებლად ბიუჯეტში წელს 40 ათასი ლარია გათვალისწინებული. პროგრამის მიხედვით, ლანჩხუთის მუნიციპალიტეტში რეგისტრირებული მრავალშვილიანი ოჯახები, რომელთაც ჰყავთ ოთხი და მეტი 18-წლამდე ასაკის შვილი, ყოველთვიურად, თითოეულ ბავშვზე მიიღებენ 40 ლარს.
პროგრამით ისარგებლებენ ის ოჯახები, რომლებიც არ არიან სოციალური შემწეობის მიმღებნი, ხოლო პროგრამის მიზანია მრავალშვილიანი ოჯახების ფინანსური ხელშეწყობა. ირკვევა, რომ ლანჩხუთში წელს ამ პროგრამით, როგორც გასულ 2022 წელს, 24 მრავალშვილიანი ოჯახი ისარგებლებს.
რაც შეეხება მძიმე საცხოვრებელ პირობებში მყოფი ოჯახებისთვის დროებითი თავშესაფრით უზრუნველყოფის პროგრამის დაფინანსებას, წელს საამისოდ ბიუჯეტში 80 ათასი ლარის ოდენობის დაფინანსებაა გამოყოფილი. თუ გასულ წელს ამ პროგრამით 58 ბენეფიციარმა ისარგებლა, წელს პროგრამა 44 ოჯახის დახმარებაზეა გათვლილი.
წლევანდელ ბიუჯეტში მუნიციპალიტეტმა თანხები უპატრონო მიცვალებულთა სარიტუალო მომსახურებისთვისაც გაითვალისწინა და წინა წლების მსგავსად ის 2500 ლარითაა განსაზღვრული. ცნობისთვის, მერიამ 2022 წელს დახმარება 9 უპატრონო მიცვალებულის სარიტუალო მომსახურებაზე გასცა.
ომის ვეტერანებისა და მათი ოჯახების დახმარების პროგრამისთვის დასაფინანსებლად წელს ბიუჯეტი 57 ათას ლარს გაიღებს, რომელიც 90 ბენეფიციარზეა გათვლილი.
სოფლებიდან მოსწავლეთა ტრანსპორტირების პროგრამის დაფინანსებისთვის, რომლითაც სასულიერო გიმნაზიის 99 მოსწავლე სარგებლობს, 20 ათასი ლარია გათვალისწინებული.
ცენტრ “იავნანას” თანადაფინანსებისთვის, რომლის მიზანია სოციალურად დაუცველი ბავშვების ფსიქო-სოციალური რეაბილიტაციის ხელშეწყობა, სოციალური პროგრამიდან მიმდინარე წელს 15 ათასი ლარი გაიხარჯება. ცენტრში 24 მზრუნველობამოკლებული ბავშვი ირიცხება.
ბიკარბონატული ჰემოდიალიზით ანუ თირკმლის ქრონიკული უკმარისობით დაავადებულთა პროგრამის დასაფინანსებელი თანხა წლევანდელ ბიუჯეტში 32 ათასი ლარია. პროგრამა 16 ბენეფიციარზეა გათვალისწინებული.
იძულებით გადაადგილებულ პირთა დახმარების პროგრამის დასაფინანსებლად გასული წლების მსგავსად წელსაც 15,3 ათასი ლარია გამოყოფილი. ეს თანხა მუნიციპალიტეტში რეგისტრირებულ დევნილ ოჯახებს საშეშე მერქნის შესაძენად გადაეცემათ, ერთჯერადად 250 ლარის ოდენობით და მუნიციპალიტეტში ასეთი 61 ოჯახია რეგისტრირებული.
სამკურნალო და საოპერაციო ხარჯებით დახმარების პროგრამისთვის წელს 150 ათასი ლარის დახარჯვაა გათვალისწინებული. საგულისხმოა, რომ იმ ბენეფიციარებს, რომლებსაც ესაჭიროებათ ოპერაციული ჩარევა, ქიმიოთერაპია, კორონალური სტენტირება და ა. შ. (რაც სადაზღვევო კომპანიისგან არ უფინანსდებათ), ასეთ შემთხვევაში, მათ შესაბამის სამედიცინო დაწესებულებაში ჩაერიცხებათ საჭირო თანხის ნახევარი, არა უმეტეს, 1000 ლარისა. პროგრამით კი ისარგებლებენ ის ადამიანები, რომელთა სარეიტინგო ქულა 0-დან 150 ათასია. ამავდროულად, შესაძლებელია მაგნიტო-რეზონანსული და კომპიუტერული ტომოგრაფიების თანადაფინანსება, ისევ 50 პროცენტით, ოღონდ 130 ათას ქულამდე მქონეებისთვის.
ცნობისთვის, 2022 წელს ზემოთ ნახსენები პროგრამით 664 ბენეფიციარმა ისარგებლა, საიდანაც 21 ბავშვი იყო. წელს ეს პროგრამა 470 ბენეფიციარის დაფინანსებაზეა გათვლილი.
“გამარჯვებულ ქალთა კლუბის” სარეაბილიტაციო პროგრამის დაფინანსება წლევანდელი სოციალური პროგრამის მიხედვით, 20,1 ათას ლარს შეადგენს და ის კლუბის რვა წევრის დახმარებას ითვალისწინებს.
ამ პროგრამის მიზანია ნაადრევ ეტაპზე კიბოს დიაგნოზით ნაოპერაციები ქალების მხარდაჭერა მათი შემდგომი რეაბილიტაციის მიზნით. პროგრამა ითვალისწინებს სამედიცინო კვლევებს, სარეაბილიტაციო ვარჯიშების ტრენინგებს, ფსიქოლოგიურ ტრენინგებს, მონაწილეობას სხვადასხვა კულტურულ ღონისძიებებში და ა. შ.
ხანდაზმულთათვის ერთჯერადი დახმარების გაწევის მიზნით სოციალური პროგრამის პროექტის შესაბამისად, ლანჩხუთის ბიუჯეტი 2023 წელს ოთხი ათას 500 ლარის დახარჯვას გეგმავს.
რაც შეეხება მძიმე საცხოვრებელ პირობებში, უბედური შემთხვევისა და სტიქიური მოვლენების შედეგად დაზარალებული ოჯახებისთვის ერთჯერადი ფულადი დახმარების გაწევის პროგრამას, წელს პროგრამა 20 ბენეფიციარზეა გათვლილი, რისთვისაც 50 ათასი ლარის გახარჯვაა გათვალისწინებული.
რაც შეეხება შშმ პირის სტატუსის მქონე ბენეფიციართა სარეაბილიტაციო კურსის დაფინანსებას, ამ კუთხით წელს ბიუჯეტში 20 ათასი ლარი ჩაიდო და პროგრამით, წინა წლის მსგავსად 20 ბენეფიციარი ისარგებლებს.
ერთჯერადი ფულადი დახმარების პროგრამისთვის კი, წლევანდელ ბიუჯეტში 40 ათასი ლარია გათვალისწინებული. პროგრამის მიხედვით, წლის განმავლობაში ერთჯერადად დახმარებას, 150 ლარის ფარგლებში, ის ადამიანები მიიღებენ, რომელთა ოჯახების სარეიტინგო ქულა 0-დან 65 000-ს არ აღემატება. 2022 წელს ამ პროგრამით 196-მა ბენეფიაციარმა ისარგებლა, წელს კი, პროგრამა 240 ბენეფიციარზეა გათვლილი.
რაც შეეხება ბავშვთა ადრეული განვითარების ხელშეწყობის, ბავშვთა რეაბილიტაცია-აბილიტაციის ქვეპროგრამით მოსარგებლე შშმ ბავშვებისა და მათი თანმხლები პირების ტრანსპორტირებას უზრუნველყოფს, 55 ათასი ლარის დახარჯვაა დაგეგმილი და ის 45 ბენეფიციარ ბავშვზეა გათვლილი.
მიმდინარე წლის სოციალური პროგრამიდან თანხა მიიმართება გენდერული თანასწორობის უზრუნველყოფისა და ოჯახში ძალადობის აღმოფხვრის ხელშეწყობისთვის, რისთვისაც ბიუჯეტიდან ლანჩხუთის მერია სამი ათასი ლარის გახარჯვას გეგმავს. როგორც სოციალური პაკეტის პროექტშია მითითებული პროგრამა სამ ბენეფიციარზეა გათვლილი და თითოეულზე ერთჯერადი დახმარების სახით ერთჯერადად ათასი ლარის გაცემას ითვალისწინებს.
მერიის სოციალურ პაკეტში შვიდი ათასი ლარის გახარჯვაა გათვალისწინებული სახელმწიფო ზრუნვის სისტემიდან გასული ახალგაზრდების დასახმარებლად, რაც მუნიციპალიტეტში რეგისტრირებული ამ კატეგორიის 18-დან 24 წლამდე ახალგაზრდისთვის ერთჯერად დახმარებას ითვალისწინებს. პროგრამა ამჯერად 11 ბენეფიციარზეა გათვლილი, გასულ წელს კი, ცხრა ბენეფიციარმა ისარგებლა.
ექვს ბენეფიციარზეა გათვლილი და სამი ათასი ლარითაა განსაზღვრული მინდობით აღზრდაში მყოფ ბავშვთა დასახმარებლად გათვალისწინებული სოციალური პაკეტი, რომელთაც ბიოლოგიურ ოჯახში დაბრუნებისას, საჭიროების შემთხვევაში, გაეწევათ ერთჯერადი ფულადი დახმარება.
წლევანდელ ბიუჯეტში ორი ათასი ლარია გაწერილი ერთჯერად დახმარებაზე, რომელიც 0-დან 18 წლამდე დედ-მამით ობოლი და შშმ ობოლი ბავშვებისთვისაა გათვალისწინებული, თითოეულზე 300 ლარის ოდენობით. ასეთი კი, როგორც პროგრამაშია გაწერილი, მუნიციპალიტეტში ექვსი ბავშვია.
ლანჩხუთის მუნიციპალიტეტის ტერიტორიაზე რეგისტრირებული რისკის ქვეშ მყოფი 0-დან 18 წლამდე ბავშვიანი ოჯახებზე, რომელთაც მძიმე ყოფითი პირობები აქვთ და არსებობს ძალადობის მაღალი რისკი, მიმდინარე წელს მუნიციპალიტეტი, ჯამში, 40 ათას ლარს გახარჯავს და წელს პროგრამა 33 ბენეფიციარზეა გაწერილი.
ავტორი
