გუშინ, „ნაპოლის“ პრეზიდენტი აურელიო დე ლაურენტისი თანამემამულე ჟურნალისტებს ესაუბრა.
ლაურენტისის მტკიცებით, იმედი აქვს, რომ თუ „ნაპოლი“ იტალიის ჩემპიონატს მოიგებს, აღსანიშნავ ცერემონიალზე არეულობა არ იქნება.
ამის შემდეგ კინოპროდიუსერმა ხვიჩა კვარაცხელიას თემაზე ისაუბრა:
„კვარაცხელიას ახალი კონტრაქტი? არ გინდათ, რომ თავი დამანებოთ? კონტრაქტი ორ მხარეს შორის იდება. ეს რას ნიშნავს? მოლაპარაკებებს ერთი მხარე აწარმოებს, შემდეგ კი 5-წლიანი კონტრაქტი ფორმდება და არა ერთწლიანი“, – განაცხადა დე ლაურენტისმა.
„ნაპოლის“ თავდამსხმელი ვიქტორ ოსიმენი კი მომავალი სეზონიდან კარიერას, დიდი ალბათობით, პრემიერლიგის რომელიმე კლუბში ანაც ფრანგულ „პსჟ“-ში გააგრძელებს. ამის შესახებ ნიგერიელი თავდამსხმელის საფეხბურთო აგენტმა ანდრეა დ’ამიკომ ისაუბრა:
„სად გადავა ოსიმენი? არა მგონია, ამ მხრივ რაიმე პრობლემა გვქონდეს. უკვე იმდენი წინადადება გვაქვს, განსაკუთრებით, ინგლისიდან. ამ დროისთვის, ოსიმენი მსოფლიოში საუკეთესო ფორვარდია, ჩემი აზრით, უფრო მაგარია, ვიდრე – ჰაალანდი. გადაწყვეტილებას მხოლოდ სეზონის დასრულების შემდეგ მივიღებთ. ვფიქრობ, „პსჟ“-ს ვარიანტიც არ უნდა გამოვრიცხოთ., მითუმეტეს, რომ მათ ამ სეზონის მერე შეტევაში დიდი დანაკლისი ელით“.
გუშინ, ესპანურმა გამოცემამ „COPE“ „ვალენსიას“ ქართველი კარის დარაჯის, გიორგი მამარდაშვილი ლონდონის „ჩელსის“ დაუკავშირა.
გამოცემის მტკიცებით, ქართველი ფეხბურთელის წარმომადგენლები ლონდონში იმყოფებოდნენ, სადაც „ჩელსისა“ და „ლივერპულის“ შეხვედრას დაესწრნენ. აღმოჩნდა, რომ ლონდონური გუნდი მამარდაშვილის შეძენით დაინტერესებულია და მზადაა „ვალენსიას“ შეთავაზება მაშინვე გაუკეთოს, როგორც კი სატრანსფერო ფანჯარა გაიხსნება.
იტალიელი სპორტული ჟურნალისტის, ფაბრიციო რომანოს ინფორმაციით, ესპანელი ფეხბურთის სპეციალისტი, ლუის ენრიკე ლონდონში ჩაფრინდა, რათა „ჩელსისთან“ მოლაპარაკებები გამართოს.
რამდენიმე დღის წინ ლონდონურმა კლუბმა გრემ პოტერი თანამდებობიდან გაათავისუფლა, რის გამოც „ჩელსის“ „ლივერპულთან“ გამართულ შეხვედრაში ბრუნო სალტორმა უხელმძღვანელა.
ლონდონური კლუბის მომავალი მთავარი მწვრთნელის თანამდებობაზე რამდენიმე სპეციალისტის სახელმა გაიჟღერა, ლუის ენრიკესა და იულიან ნაგელსმანის ვარიანტები კი ყველაზე ხშირად გვხვდებოდა.
რამდენიმე დღის წინ ლუის ენრიკემ განაცხადა, რომ პრემიერლიგურ გუნდს სიამოვნებით გაწვრთნიდა, ამ ფაქტების გათვალისწინებით, კი დიდი შანსია, რომ 52 წლის სპეციალისტი სწორედ „ჩელსის“ ჩაუდგეს სათავეში.
საქართველოს ნაკრებისა და აზერბაიჯანული „ყარაბაღის“ მეკარე ლუკა გუგეშაშვილმა სეზონის შემდეგ შესაძლოა კლუბი შეიცვალოს.
„ქართველით არაერთი კლუბია დაინტერესებული. თურქული გუნდების გარდა, მისით ხორვატული „რიეკაც“ ინტერესდება, რომელიც ზაფხულში იჯარის განსახორციელებლად მოლაპარაკების დაწყებას აპირებს“, – დაწერა გამოცემამ „Azerisport“.
გუშინ ცნობილი გახდა, რომ „პარი სენ ჟერმენის“ ფეხბურთელ ლიონელ მესის საუდის არაბეთის კლუბი, „ალ ჰილალი“ წელიწადში 400 მილიონი ევროს ოდენობის ხელფასს სთავაზობს.
მესიმ „ალ ჰილალისგან“ ოფიციალური შეთავაზება უკვე მიიღო, მაგრამ ფეხბურთელის პრიორიტეტი ევროპაში დარჩენაა, რადგან „ბარსელონა“ ფინანსური პრობლემის მოგვარებას და მოლაპარაკებების დაწყებას ეცდება.
„ალ ჰილალმა“ თუ საწადელს მიაღწია, მესი და კრიშტიანუ რონალდუ ერთ ჩემპიონატში ითამაშებენ და მათი დუელი აზიის კონტინენტზე გაგრძელდება.
ლეო მესის „პარი სენ ჟერმენთან“ ხელშეკრულება მიმდინარე სეზონის ბოლოს ეწურება და სავარაუდოდ, მხარეები თანამშრომლობას არ გააგრძელებენ.
ავტორი
