გუშინ, ნორვეგიის ეროვნული გუნდისა და „ნაპოლის“ მცველი ლეო სკირი ოსტიგორი „Radio Kiss Kiss Napoli“-ს ესაუბრა და კვარაცხელია – ოსიმენის დუეტი განსაკუთრებით გამოყო.
„ალბათ, კვარას და ოსიმენის ტანდემი ამ ეტაპზე მსოფლიოში საუკეთესოა. ვარჯიშებზე მათთან დაპირისპირება ნიშნავს, რომ ყოველთვის მაქსიმალურად უნდა იყო კონცენტრირებული. ისინი, რასაც თამაშებზე აკეთებენ, იმავეს აკეთებენ ვარჯიშებზე. თუმცა, სხვა საოცარი ფეხბურთელებიც გვყავს, როგორებიც არიან დი ლორენცო და ლობოტკა, ყველა წარმოუდგენელ საქმეს აკეთებს“, – განაცხადა ლეო სკირი ოსტიგორმა.
გამოცემა „Il Mattino“-ს მტკიცებით, ვიქტორ ოსიმენი ამჟამად თავს უკეთ გრძნობს და დღეს, მოედანზე „ლეჩესთან“ დაბრუნება სურს.
ნიგერიელ შემტევს საზარდულის ტრავმა აწუხებდა, თუმცა, ვიქტორი დაბრუნდა და შეიძლება საკუთარ გუნდს წარმატებაში დაეხმაროს.
მიუხედავად ოსიმენის გამოჯანმრთელებისა, ნეაპოლური კლუბის სამედიცინო შტაბი ფეხბურთელს თამაშის უფლებას ჯერ არ აძლევს.
იტალიური მასმედიის ინფორმაციით, დიდი ალბათობით, ოსიმენი „ლეჩესთან“ მატჩს გამოტოვებს, 12 აპრილს ჩემპიონთა ლიგის მეოთხედფინალური ეტაპის პირველ შეხვედრაში კი „მილანთან“ სათადარიგო სკამზე იქნება და სპალეტი საჭიროების შემთხვევაში გამოიყენებს.
ბოლო დღეებში, „ნაპოლის“ პრეზიდენტმა აურელიო დე ლაურენტისმა რამდენჯერმე უარყო ხვიჩა კვარაცხელიასთან კონტრაქტის განახლების შესაძლებლობა, მაგრამ იტალიური მედია სხვაგვარ ინფორმაციას ავრცელებს.
გუშინ, გამოცემამ „Tuttomercatoweb“ გაავრცელა ინფორმაცია, რომ სეზონის ბოლოს „ნაპოლის“ ხელმძღვანელობას კვარაცხელიას აგენტ მამუკა ჯუღელთან შეხვედრა აქვს დაგეგმილი, რათა ქართველი ფეხბურთელის სიტუაცია შეაფასოს.
იტალიელები ხვიჩას გაყიდვას დამდეგ ზაფხულს არ აპირებენ, მიუხედავად გავრცელებული ჭორებისა, რომლის მიხედვით, კვარა რამდენიმე გრანდს დაუკავშირეს. ნეაპოლელთა მიზანი უცვლელია – კონტრაქტის 2028 წლამდე განახლება და ხელფასის მომატება.
საქართველოს ნაკრებისა და „ვალენსიას“ კარის დარაჯი გიორგი მამარდაშვილი ევროპული კლუბების ინტერესის სფეროშია და გუშინ ის არაერთ გუნდს დაუკავშირეს.
ჯერ გავრცელდა ცნობა, რომ 22 წლის მეკარით ლონდონის „ჩელსია“ დაინტერესებული. ოდნავ მოგვიანებით დაიწერა, რომ მამარდაშვილისთვის ბრძოლაში „ლესტერ სიტი“ დაწინაურდა.
გუშინ, ესპანურმა ესპანურ მედიამ გიორგი მამარდაშვილი „პორტუს“ დაუკავშირა, რომელიც დიოგო კოშტას შემცვლელს ეძებს, ასევე გაიჟღერა მილანის „ინტერის“ ვარიანტმაც. ახლო წარსულში მამარდაშვილი ახსენეს „ტოტენჰემსა“ და „იუვენტუსთან“ მიმართებაშიც.
გიორგი მამარდაშვილს „ვალენსიასთან“ ხელშეკრულება 2027 წლის ზაფხულამდე აქვს გაფორმებული და მისი გამოსასყიდი ფასი 100 მილიონი ევროა. თუმცა, ესპანური მედიის ცნობით, „ვალენსია“ მას 30-35 მილიონ ევროდ გაყიდის.
გუშინ, იტალიურმა გამოცემამ „Il Corriere dello Sport“ გაავრცელა ინფორმაცია, რომ „რომას“ მთავარმა მწვრთნელმა, ჟოზე მოურინიუმ შესაძლოა კარიერა საუდის არაბეთში გააგრძელოს.
საუდის არაბეთის შეიხებმა 60 წლის პორტუგალიელს სამი გუნდის არჩევანი შესთავაზეს: ეროვნული ნაკრები, „ალ-ნასრი“ და „ალ-აჰლი“ და ორწლიან კონტრაქტში 120 მილიონ ევროს სთავაზობენ.
მწვრთნელის მოქმედი კონტრაქტი „რომასთან“ 2024 წლის ზაფხულამდეა აქვს გაფორმებული.
გუშინ, ჟოზე მოურინიოს სახელი კიდევ ერთხელ გაჟღერდა. ლონდონის „ჩელსი“ ახალი მთავარი მწვრთნელის ძიებაშია. ბოლო ინფორმაციის თანახმად, ლონდონური კლუბის წარმომადგენლები ჟოზე მოურინიოს დაუკავშირდნენ.
„განსაკუთრებული“ „ჩელსის“ ორჯერ წვრთნიდა. მოურინიო კარგად იცნობს კლუბს და პრემიერლიგაში მუშაობის დიდი გამოცდილება აქვს. ინგლისური კლუბის ხელმძღვანელებს სურთ, რომ მოურინიომ „ჩელსი“ სეზონის დასრულების შემდეგ ჩაიბაროს.
ჟოზეს გარდა, კანდიდატები ლუის ენრიკე, იულიან ნაგელსმანი, ანტონიო კონტე და ფრენკ ლამპარდი არიან. ინგლისური მედიის მტკიცებით, დიდი ალბათობით „ჩელსის“ დროებით სეზონის დარჩენილ ნაწილში ლამპარდი ჩაიბარებს ხოლო ზაფხულში უკვე კლუბი ახალ მთავარ მწვრთნელს მოიყვანს.
გუშინ ოფიციალურად დადასტურდა, რომ იტალიური „მონცას“ პრეზიდენტი, ქვეყნის ყოფილი პრემიერ-მინისტრი, სილვიო ბერლუსკონი ლეიკემიით დაავადდა.
5 აპრილს, 86 წლის პოლიტიკოსი გულ-სისხლძარღვთა სისტემის პრობლემებისა და სუნთქვის უკმარისობის გამო საავადმყოფოში გადაიყვანეს. ის ინტენსიური თერაპიის განყოფილებაშია. ეს ჰოსპიტალიზაცია ბერლუსკონისთვის მეორე გახლდათ ბოლო რამდენიმე დღის განმავლობაში. ლეიკემია პოლიტიკოსს კლინიკაში პირველი ვიზიტის დროს აღმოაჩნდა.
ბერლუსკონი „მილანს“ 1986-2016 წლებში ფლობდა, 2018 წელს კი „მონცა“ შეიძინა.
ავტორი
